Hebrews 13

kumaoni

← Chapter 12 Jump to:

1आपस में भाई-बैनिन की नियाती एक-दुसरा से प्रेम करनै रौ।

2उन लोगून को आदर-सम्मान करा, जो जरूरतमंद मुसाफिर छन, किलैकी येका द्वारा कतकून ले अनजाना में स्वर्गदूतून को आदर-सम्मान करिना को छै।

3कैदीन को इसकैं हाल-चाल पुछनै रौ, समझा कि तुम ले उनार दगाड़ कैद में छा। जो लोग दुखी करि जानान, उनोरो ले यो समझभेरन हाल-चाल पुछा करा, जसकैं कि तुम ले उनार दुख में शामिल छा।

4ब्या सब लोगून में सम्मान की बात समझी जौ, और यो रिश्ता में घरवाली और घरवालो एक-दुसरा का प्रति वफादार रून। किलैकी परमेश्वर ब्यभिचारीन, और दुसरा स्यैनिन का दगाड़ नाजायज रिश्ता राखूनवालान को का न्याय करोलो।

5तुम अपूनास धन-दौलत का लालच है दूर राखा और जो तुमार पास छै, उमेंई खुश रौ। किलैकी परमेश्वरेले खुद के रैछ, “मैं तैंस कभै ले नी छोडूलो, और तैंस कभै ले नी त्यागूँलो।”

6येक कारण हम विश्वास ले दगाड़ कुंनू, “प्रभु, मेरि मद्दत करछो; मैं नी डरूँलो; मैंस के डर नी होलो कि कोई ले आदिमी म्यारा दगाड़ कि कर सकछो।”

7जो तुमार अगुवा छ्या, और जिनूनले तुमून परमेश्वरो को बचन सुणाछ, उनून याद राखा; और ध्यान ले उनार जीवन स देखा, कि कसीकैं उनूनले अपूनो जीवन जीछ, और मरून तक परमेश्वरा का विश्वास में वफादार बनिना का रियान। येक कारण हमून ले ऊसोई परमेश्वर में विश्वास करूनो चैछो जसो उनूनले करिना को छ्यो।

8यीशु मसीह बैलिया और आज और हमेशा एक जसो छै।

9किलैकी यीशु मसीह कभै नै बदलनो, तुमून इन सबै नय्या और अलग-अलग शिक्षान को पालन नै करून चैनो जो तुमून गलत बाटान में ली जानान। किलैकी तुमार मनून खिन यो निकोछ कि परमेश्वरा का अनुग्रह का द्वारा मजबूत बना, नै कि उन नियमून का मानना का द्वारा जो खानाका बारिमें छन, खाना-पीना सम्बन्धी प्रार्थनान का द्वारा केको भलो नै भ्यो।

10जो याजक यहूदी रीति-रिवाज का अनुसार परमेश्वरै की सेवा करछो, उनून यीशु का बलिदान द्वारा के फैदा नै मिलूनो। लेकिन हमून फैदा मिलछो।

11पैलि वादा का अनुसार महायाजक हर साल जानवरून को खून इस्राएली लोगून पापून की माफी खिन महापवित्र जाग में ली जाछो।

12योई कारण, यीशु ले लोगून अपून खून का द्वारा पवित्र करून खिन यरूशलम शैहर भ्यार दुख सहन करछ्य और मर ग्यो।

13येक कारण, आ हम यहूदीन का नियम-कानून स छोड़ दीनू, और यीशु में विश्वास करा और उक दगाड़ निन्दा सहन करा।

14किलैकी यो संसार में हमोरो हमेशा रून खिन घर नाहातिन, लेकिन हम उ स्वर्गीय घरा का खोज में छा, जो हमेशा खिन छै।

15येक कारण हम यीशु का द्वारा अपून मुँख ले परमेश्वर की स्तुति और अराधना करनू। जो परमेश्वर खिन हमोरो बलिदान छै।

16तुम लोग भलाई करून और एक-दुसरा की मद्दत करून खिन तैयार रौ, किलैकी परमेश्‍वर इसा बलिदानून ले खुश हुछो।

17अपून अगुवान की माना; और उनार अधीन रौ, उन तुमून नजर राखिना का छन ताकि तुम भटक नै जा। किलैकी उनून अपूनी सेवा को लेखा परमेश्वरेस दीन पड़ोलो। तुम उनेरि माना, ताकि उन यो काम स खुशी ले करून, किलैकी उदास होभेरन सेवा करून है के फैदा नी होलो

18हमून खिन प्रार्थना करनै रौ, किलैकी हमून विश्वास छै, कि हमोरो जमीर साफ छै; हम उन सब चीजून में परमेश्वरो को आदर-सम्मान करून चानू जो हम करनू।

19प्रार्थना करून खिन मैं तुमून और ले हौंसला दीछूँ, ताकि मैं जल्दी तुमार पास फिर आ सकूँ।

20और अब, शान्ति दीन वाला परमेश्वर, हमार प्रभु यीशु मसीह स हमेशा की वाचा का द्वारा ज्यूनो कर दीछ, तुमून उन सब चीजून है भरपूर करौ जिनरी तुमून उकी इच्छा पुरी करून खिन जरूरत छै। यीशु मसीह का सामर्थ के द्वारा उ तुमूनमें उ सब उत्पन्न करौ जो ऊस खुश करछा। यीशु महान वाचा द्वारा भेड़ून को महान ग्वाला बन ग्योछ, जैमें उक खून का द्वारा दसकत करि ग्यान। उकी महिमा हमेशा-हमेशा हुनै रौ। आमीन।

22हे म्यारा विश्वासी भाईयो, मैं तुम थैं बिनती करछूँ, कि यो चिठ्ठी को संदेश की बातुन धैर्य ले सुणा, जो मैंले तुमून हौंसला दीन खिन लिखीनाक छन। मैंले तुमून यो चिठ्ठी में भौत ज्यादा बात नै लिख राँख्या।

23तुमून यो याद छै कि, हमोरो विश्वासी भाई तीमुथियुस जेल भटे छुट ग्योछ, और अगर उ जल्दी आग्यो, त मैं उक दगाड़ तुमूनथैं मिलून ऊँलो।

24अपून सब अगुवान और परमेश्वरा का लोगून म्येरो नमस्कार कया। इटली देशा का विश्वासी तुमून नमस्कार कुंन मर्यान।

25मैं प्रार्थना करछूँ कि, परमेश्वरो को अनुग्रह तुम सब में होनै रौ। आमीन।

← Chapter 12 Jump to: