Hebrews 12

kumaoni

← Chapter 11 Jump to: Chapter 13 →

1हमार आस-पास इसा कई लोग छन जिनरी जीन्दगी हमून बतूछी कि विश्वास को मतलब कि हुछो। येक कारण आ हम हरेक रूकावट और पाप स दूर करभेरन, हमून जै बाटा में जानो चैछो, उमें हमून जरूर चलून चैछो।

2हमून यीशु का तरफ देखनै रून चैछो, जो हमून अघिल बढ़ूछो और हमोरो विश्वास पुरो करछो। उले लज्जा की के चिन्ता नै करभेरन सूली को दुख सह लीछ; किलैकी उ जाण छ्यो कि बाद में ऊस खुशी होलि कि उले इसो करछ्य। अब उ परमेश्वरा का सिंहासन का दैन तरफ बैठिना को छै।

3यीशुक उदारणा का बारिमें सोचा, कि उले जिन पापिन का द्वारा दीईना का घोर कष्टून येक कारण सह लीछ, जो उहै इतुक नफरत करछ्या, कि तुम निराश होभेरन हिम्मत नै छोड़ दी।

4जब तुम बुराईन की ताकतून का खिलाफ संघर्ष करछा त तुमून ले इसी लड़ाई नै लड़ी, कि तुमेरि मौत होज्यौ।

5लेकिन तुम उ हिम्मत वाला उपदेश स भूल चुक गैछा, जैस परमेश्वरेले तुमून अपूनो च्योलो समझभेरन दीईना को छ्यो, “हे म्यारा च्याला, जब प्रभु तुमून यो एहसास करूँछो कि तुमूले गलत करिना को छै। और जब उ तुमून डाँटछो त तुम हार जन माना।”

6किलैकी प्रभु, जैस प्रेम करछो, ऊस डाँटछो ले; जैस परमेश्वर अपूनो च्योलो मानछो, ऊस सजा ले दीछो

7तुम जो दुख सहछा, ऊस परमेश्वरै की डाँठ समझा; परमेश्वर तुमून च्योलो समझभेरन तुमार दगाड़ इसो बर्ताव करछो, उ को च्योलो छै, जैस बबा नै डाँठनो?

8अगर उ डाँठ जो सबून पड़छी, अगर तुमून में नै पड़नी, त तुम परमेश्वरा का सच्चा च्याला नाहातिन।

9फिर जब कि हमार शारीरिक बबा ले हमून डाँठ छ्या और हमूनले उनोरो आदर करछ्य, त हमून अपून स्वर्गीय पिता को कतुक सम्मान करूनो चैछो और उकी बात सुणूनी चैछी ताकि हम हमेशा खिन ज्यूना रै सका जब उ हमून सुधारो।

10हमार संसारिक बबा जसो उनून सबून है निको लागछो, हमून थ्वाड़ा बखत खिन डाँठ छ्या लेकिन परमेश्वर हमेरि भलाई खिन हमून डाँटछो कि हम उकी पवित्रता में भागीदार हो ज्या।

11जै बखत डाँठ पड़छी, उ बखत डाँठ निकी नै लागनी, बल्कि उ बुरो लागछो। लेकिन बाद में, जब हम येले सिख लीनू, त हमून शांति मिलछी, किलैकी हम सही ढंगले जीनो शुरू करनू।

12येक कारण अपून थकिनाक हातून मलि उठा, और अपून कमजोर घुणान मजबूत करा।

13और याँ वाँ देखना का बजाय, यीशु का पास पुजून वाला सीधा बाटा में हिटनै रौ ताकि हमार बीच में जो लोग आत्मिक रूप में कमजोर छन, उन भटक नै जून, बल्कि उनोरो विश्वास मजबूत हो ज्यो।

14सबून का दगाड़ मेल मिलाप राखा, और पवित्र जीवन जीन खिन हर तरीका ले कोशिश करनै रौ। जैका बिना कोई प्रभु स कभै ले नै देख सकनो।

15सतर्क रौ, कई इसो नै हो, कि कोई ले आदिमी परमेश्वरा का अनुग्रह का बिना नै रै ज्यो। और ध्यान दी कि कोई ले आदिमी स अविश्वास में कड़वा रूखा का जड़ा का नियाती जन बनून दी जो उक जहर का दगाड़ कई परेशानीन का कारण बनछो, जैले उ आदिमी परमेश्वर है दूर हो ज्यो।

16तुमूनमें कोई ले आदिमी व्यभिचारी जन हो, और ना तुमून में अब्राहम का नाती एसाव का नियाती बुरा काम हुन, किलैकी उ जियोठौ च्योलो छ्यो, ऊस खास उत्तराधिकारी हुना को अधिकार छ्यो। लेकिन उले जन्मसिद्ध अधिकारो को सम्मान नै कर्यो और येक कारण उले अपून नाना भाई याकूब स खान का कारण बेच दीछ।

17तुम जाणछा, कि जब उले बाद में अपून बबा इसहाक थैं आशीष पान चाछ, त ऊस नै दी ग्यो, और आँसू बगा भेरन ले उ, उ आशीष स अपून हिस्सा में नै कर पायो।

18तुम सीनै पहाड़ जसा जाग में नै आया, जैस देखी और छुई जा सकछो। कोई भयंकर आग या काला बादल या तूफान नाहातिन, और लोग इसा जाग में छ्या जा परमेश्वरेले अपून नियम-कानून दीयान।

19तुम तुरी की आवाज और बोलूनवालान का इसा आवाजा का पास नै आया, जैका सुणून वालान ले बिनती करछ्य, कि अब हमून थैं और बात नै करि जौ।

20उनूनले यो येक कारण क्योछ, किलैकी उन यो हुकुम स बरदास नी कर सकछ्या जो परमेश्वरेले उनून दीईना का छ्या, “अगर जानवर ले यो पहाड़ स छू लेलो, त उ ढूंगा ले लोड़ियाई भेरन मारी जालो।”

21और उ दर्शन इसो डरावना छ्यो, या तक कि मूसाले ले क्योछ, “मैं भौत डरछूँ और काँपछूँ।”

22तुम सिय्योन पहाड़ा का पास आईना का छा, जो स्वर्गीय यरूशलम शैहर छै, और जीवित परमेश्वरो को शैहर छै, जाँ लाखू स्वर्गदूत खुशी को पर्व मनूनान।

23तुम परमेश्वरा का पहलौठान का सभा में आईना का छा, जिनारा नाम स्वर्ग में लिखी ग्यान। तुम खुद परमेश्वरा का पास आछा, जो सब चीजून को न्याय करून वालो छै उ स्वर्ग में धर्मी लोगून की आत्मा छन जिनून अब सिद्ध बनाई ग्योछ।

24तुम यीशु का पास आ रैछा जो परमेश्वर और लोगून का बीच में नय्या वाचा छै, और छिड़कीना का खून का पास आईना छा, जो हाबिल का खून का नियाती न्याय खिन रूना का बजाय पापून की माफी बात करछो।

25सतर्क रया, और परमेश्वर जो तुमूनथैं बोलून मरियोछ उक हुकमून को पालन करा। इस्राएला का लोगून सजा मिलछ्य जब उनूनले सुणून है इन्कार कर दीछ और मूसा ले उनून चेतावनी दीछ। येक कारण यो हमून खिन और ले बुरो होलो अगर हम परमेश्वरा का हुकमून को पालन करून है इन्कार करनू जो हमून स्वर्ग भटे चेतावनी दीछो।

26जब परमेश्वरेले सीनै पहाड़ भटे बात करछ्य, त उ बखत उकी आवाज ले धरती हिलगै, लेकिन अब उले यो वादा करिना को छै कि, “ मैं एक बार फिर केवल धरती स नै, बल्कि आकाश स ले हिला द्यूलो।”

27और यो बोल “एक बार फिर” यो बात स दिखूनान, कि बनाईना का चीज हिल जाला और हटा दी जाला। जो चीज हिलाई नै जानी, उन हमेशा बनिना का रूनान।

28हमून जो राज्य मिलीना को छै, उ हिलाई नै जा सकूनो। येक कारण हम परमेश्वरो को धन्यवाद दीनै रूँ, और उकी इच्छा का अनुसार अराधना करा, जैले उ खुश हुछो।

29किलैकी याद राखा कि हम जो परमेश्वरै की सेवा करनू, उ एक आगा जसो छै जो अपवित्र हुन वाली हर चीज स भस्म कर दीछो।

← Chapter 11 Jump to: Chapter 13 →