Hebrews 9

kumaoni

← Chapter 8 Jump to: Chapter 10 →

1उ पैलि वाचा, जो भौत बखत पैलि मूसा का द्वारा इस्राएली लोगून दीईना की छी, उमें परमेश्वरे की अराधना करना का पुर नियम-कानून छ्या और यो धरती में अराधना खिन लोगून का द्वारा बनाई को एक मिलाप वालो पवित्र तम्बू ले छ्यो।

2यो तम्बू जानवरून का खाल ले बनिना को छ्यो। उ तम्बू का बीच में, उनूनले एक परदा लटका दीछ और उक द्वी कमरा बनायान। पैला कमरा में एक धूपदान छ्यो और एक मेज छी जैमें परमेश्वरे स भेंट में चढ़ाई जानवाला रोटा राखि जाछ्या। यो कमरा स पवित्र जाग कई जाछ्यो।

3तम्बू का दुसरा कमरा जो परदा का पीछ छ्यो, ऊस परम पवित्र जाग कुंनान।

4यो दुसरा कमरा में, एक सुना की वेदी छी, और वाँ एक सन्दूक ले छ्यो जो भितर और भ्यार भटे सुना ले मढ़िना को छ्यो और उ सन्दूक स वाचा को सन्दूक कई जाँछ्यो। यो सन्दूक का भितर तीन चीज छ्या। सबून है पैलि, एक सुना की मर्तबान छ्यो जैमें एक बिशेष खानो छ्या जैस “मन्ना” कई जाछ्यो, और दुसरी उमें हारून की लठ्ठी ले छी, जैमें पात निकलीना का छ्या। और येमें ढूंगा का पाथरून का द्वी पाठी छ्या, जैमें परमेश्वरेले उ दस हुकुम लिखीना का छया, जो उले मूसास दीईना का छ्या।

5येक अलावा सोना का सन्दूक का मलिमें द्वी करूँब छ्या, जिनारा पंख उ सन्दूक का मलिमें फैलीना का छ्या, जो यो बातोको इशारा करछ्यो कि परमेश्वर यो जाग में छ्यो। उक खुलीना का पंख सन्दूक का मलिवाला हिस्सा स ढकछ्या जैमें खून छिड़की जाछ्यो ताकि लोगून का पापू माफ करि जा सकून। लेकिन हम अब इन सब चीजून एक-एक करभेरन नै बता सकना।

6इसीकैं उनूनले उन सारी चीजून तम्बू का द्वीवै कमरान में तैयार कर्यान। तब हर बखत जब ले याजक अपून काम करून खिन उछ्या त उन सिर्फ पैला वाला कमरा में उछ्या।

7लेकिन केवल महायाजक साल में एक्कै बार जानवरून को खून लीभेरन परम पवित्र जाग में जाछ्यो, और उ येस अपून और लोगून का पापून का माफी खिन परमेश्वरे स चढ़ूछ्यो जो उनूनले अनजाना में करिना का छ्या।

8इन नियमून का द्वारा पवित्र आत्मा हमून यो समझूछो कि जब तक यो धरती में मिलाप वाला तम्बू और उक नियमून को पालन करि जाछो, तब तक स्वर्ग में परमेश्वरा का परम पवित्र जाग में जाना को बाटो अब तक खुलीना को नाहातिन।

9यो सब चीज सिर्फ इन बातुन को उदारण छ्यो जो कि अब मसीहक कारण पुरी हुन मरैछ। किलैकी उन सब भेंट और बलिदान जो उन लोगून का द्वारा परमेश्वरेस चढ़ाई जाछ्या जो उकी अराधना करछ्या, उन लोगून का मनून और जमीर स शुद्ध करून योग्य नी छी।

10किलैकी उन सिर्फ लोगून का खान-पीना का बारिमें और भौतसा नान-धुना का नियमून का बारिमें बतुनान जिनारा द्वारा लोगून को शरीर तै साफ हो जाछो। यो जरूरी छ्यो कि इन नियमून तब तक पुर करि जानो जब तक कि परमेश्वर लोगून का दगाड़ एक नय्या वादा नै करनो।

11लेकिन अब मसीह महायाजक होभेरन आछ जो नय्या वाचा की सारी निकी-निकी चीज दीछो। उले स्वर्ग में और ज्यादा महान, ज्यादा सिद्ध मिलाप का तम्बू में प्रवेश करछ्य, जो आदिमीन का हातून का द्वारा बनाईना को नाहातिन, म्येरो कुंना को मतलब, जो यो संसारो को हिस्सा नाहातिन।

12यीशु मसीह परम पवित्र स्थान में जानवरून का खून स लीभेरन नै ग्यो, लेकिन उ खुद अपूनो खून लीभेरन ग्योछ। उले यो सिर्फ एक बार करछ्य, और फिर येस कभै करना की जरूरत नी होलि। उक द्वारा हमून उद्धार मिलग्योछ।

13पुराना नियम-कानून का अनुसार याजक जानवरून को खून और बलि का छारा स लोगून में छिड़की जाछो जो नियम का अनुसार अशुद्ध हुनान। इसो करभेरन उनोरो शरीर फिर शुद्ध हो जाछो, अगर येमें आदमीन का शरीरून शुद्ध करना की सामर्थ छै,

14तो जरा सोचभेरन देखा कि मसीह को खून हमार दिलून उन कामून भटे कतुक शुद्ध करोलो जो मौत का तरफ भटे ली जाछो, ताकि हम जीवित परमेश्वरै की अराधना कर सका। किलैकी अनन्त आत्मा का सामर्थ का द्वारा, मसीह ले हमार पापून खिन अपूनास निर्दोष बलिदानाक रूप में परमेश्वरेस भेंट चढ़ा दीछ।

15यो कारण ले मसीह लोगून का दगाड़ एक नय्या वाचा बाँधछो, ताकि उ लोग जो परमेश्वरा का द्वारा बुलाई ग्यान, उन, उन अनन्त आशीषून पा सकून जिनोरो वादा परमेश्वरेले करिना को छ्यो। इसो येक कारण हो सकछो किलैकी मसीह उनून पापून की सजा भटे आजाद करून खिन मर ग्यो जो उनूनले पैलि वाचा का अधीन रैभेरन करछ्य।

16हम जाणनू कि अगर कोई आदिमी अपूनी मौता का बाद अपूनी संपत्ति को बँटवारा का बारिमें आखरी फैसला लिखछो, त यो जरूरी छै कि पैलि उकी मौत हो ताकि उक फैसला स पुरो करि जा सको।

17तब वारिस उ सब प्राप्त कर सकछो जो वसीयत में ऊस दीई ग्योछ। किलैकी अगर वसीयत करूनवाला एल ज्यूनो छै, त यो जरूरी नाहातिन कि उक द्वारा दीईना को फैसला लागू करौ जौ।

18यो कारण छै, कि परमेश्वरै द्वारा दीईना की पैलि वाचा ले पक्की हुना है पैलि एक बलि करि जानो जरूरी छ्यो।

19सबून है पैलि, मूसा ले सब लोगून नियम-कानून को हर हुकुमा का बारिमें बताछ। येक बाद उले जानवरून को खून लीछ और ऊस पानि में मिलाछ। फिर उले ऊस नियम-कानून का किताब और सब लोगून में छिड़कून खिन लाल उन और जूफा नामोको रूखा का हांगा को इस्तमाल करछ्य।

20और मूसा ले लोगून थैं क्योछ, “यो खून उ वाचा स शुरू करछो जैस मानना को हुकुम परमेश्वरेले तुमून दीईना को छ्यो।”

21और इसीकैं मूसा ले तम्बू और अराधना का पुर चीजून में खून छिड़कछ्य।

22मूसा का नियम-कानून कुंछो कि लगभग हर चीज स खून छिड़क भेरन साफ करि जान चैछो। खून बगाये बिना, परमेश्वर लोगून उनार पापून खिन माफ नै कर सकनो।

23येक कारण सांसारो को तम्बू और उमें मौजूद हर चीज स जानवरून का खून ले शुद्ध करून पड़छ्यो। यो उन चीजून की नकल छै जो स्वर्ग में छै। लेकिन स्वर्ग में की चीजून शुद्ध करून खिन जानवरून का खून है बढ़भेरन महान बलिदान का द्वारा शुद्ध करना की जरूरत छी।

24उक कारण, मसीह उ पवित्र जाग में नै ग्यो जैस लोगून ले बनाछ, जो कि परम पवित्र जाग की सिर्फ एक छवि छै। लेकिन उ स्वर्ग में ग्योछ जैले उ हमार फैदा खिन परमेश्वरा का सामुनि हाजिर हो सको।

25महायाजक हर साल एक जानवरो को खून लीभेरन परम पवित्र जाग में जाछो। लेकिन मसीह अपूनास बार-बार बलिदान चढ़ून खिन नै ग्यो। अगर ऊस इसोई करून पड़ूनो त फिर ऊस संसारा का बनून बखत भटे कई बार दुख उठूनो पड़ूनो। लेकिन अब तो अंतिम युग में मसीह हमून खिन अपूनो बलिदान का द्वारा पाप की शक्ति स हमेशा खिन मिटून खिन एक बार सब खिन प्रकट भ्योछ।

27हरेक आदिमी को एक बार मरून तय छै। मौता का बाद, परमेश्वर हरेक आदिमी को न्याय करोलो।

28उसीकैं, मसीह ले सब लोगून का पापून अपून मलिमें लीभेरन एक बार बलिदान हो ग्यो। जब उ दुबारा आलो तब उ पापून खिन बलिदान हुन खिन नी आलो बल्कि उनून बचुन खिन जो उको इंतजार करून मर्यान।

← Chapter 8 Jump to: Chapter 10 →