Hebrews 11

kumaoni

← Chapter 10 Jump to: Chapter 12 →

1विश्वास यो बातो में भरोसा करून छै कि हमून पक्का उई मिलोलो जैकी हम आश करनू और यो विश्वास करून जैस नै देख सकना उन सच्ची में छन।

2हमार पूर्वजून इसा तरीका को विश्वास छ्यो। सिर्फ यो कारण ले परमेश्वर उनून है खुश छ्यो।

3विश्वास का कारण हम जाणि जानू, कि पुर संसारा स परमेश्वरे ले बचन का द्वारा बनाछ छै। येक कारण हम जो ले देखनू उ उन चीजून ले बनिना छन जिनून देखी नै जा सकनो।

4विश्वासा का कारण आदम का च्योलो हाबिल ले अपून ठूला भाई कैन है महान बलिदान चढ़ाछ; और उक बलिदान का द्वारा परमेश्वरेले स्वीकार करछ्य कि हाबिल एक धर्मी आदिमी छ्यो। किलैकी परमेश्वर हाबिल का बलिदान है खुश छ्यो। हालाकि हाबिल मर चुक ग्योछ, फिरले हम परमेश्वर में विश्वास राखना का बारिमें उथैं सिखनू।

5विश्वास का कारण हनोक नामोको एक आदिमी स्वर्ग में ज्यूनो उठा ली ग्योछ, और येक कारण उ नै मर्यो, कैसे ले उको लाश नी मिली; किलैकी विश्वासका द्वारा परमेश्वरेले ऊस स्वर्ग में उठा लीछ, और उक स्वर्ग में उठाई जान है पैलि उक बारिमें पवित्रशास्त्र में कईना को छ्यो, कि हनोक ले परमेश्वरेस खुश करछ्य।

6केवल परमेश्वर में विश्वास करभेरन हम ऊस खुश कर सकनू। किलैकी परमेश्वरा का पास ऊँनवाला स विश्वास करून चैछो, कि उ छै; और उन जो ऊस सच्चाई ले खोजनान, उ उनून उको प्रतिफल दीछो।

7विश्वास का कारण नूह स एक बाढ़ का बारिमें परमेश्वरा का द्वारा चेतावनी दी गैछ जो उले कभै नी देखीना की छी, उले चेतावनी पाभेरन परमेश्वरा का हुकमो को पालन करछ्य, और अपून परिवार का बचाव खिन जहाज बनाछ, और नूह का विश्वास करून है पैलि, बाकि लोग जिनूनले विश्वास नै कर्यो, उन दोषी ठैहराई ग्या और उन डूब भेरन मर ग्या। नूह परमेश्वरा का नजरून में धर्मी बनछ्य, किलैकी उले परमेश्वर में विश्वास करछ्य।

8विश्वासा का कारण अब्राहम स जब परमेश्वरेले एक जाग में जान खिन बुलाछ, त उ परमेश्वरा का हुकुम स मानभेरन इसा जाग में निकल ग्यो, जाँ परमेश्वर ऊस उक हिस्सा की जमीन दीन वालो छ्यो, और अब्राहम नी जाण छ्यो, कि काँ जान खिन प्रभु ले उथैं नी कै राखछ्यो; लेकिन फिरले परमेश्वरो को हुकुम मानभेरन अब्राहम उ देश खिन न्हैग्यो।

9परमेश्वरेले जो जमीनो को वादा करिना को छ्यो, अब्राहम एक अजनबी की नियाती तम्बून में रूछ्यो। उक दगाड़, उको च्योलो इसहाक और उको नाती याकूब, जिनून परमेश्वरा का तरफ भटे उई वादा मिलीना को छ्यो, उन ले तम्बू में रूछ्या।

10किलैकी उ स्वर्ग में एक इसा शैहर में रूना का इंतजार करछ्या जो हमेशा बनिना को रौलो, और जैको रचूनवालो और बनूनवालो परमेश्वर छै।

11विश्वासा का कारण अब्राहम की घरवाली सारा ले बुढ़ियाकाल में ले गर्भ धारण करना की सामर्थ पाछ; किलैकी ऊस पुर भरोसा छ्यो कि परमेश्वर उई करोलो जैको उले वादा करिना को छै।

12जब अब्राहम भौत बूढ़ो हो गैछ्यो कि उ मौत का करीब छ्यो, फिरले आकाश का तारा और समुन्द्राक रेताक नियाती, अनगिनत वंश पैद भ्यान।

13इन सबै लोग जिनूनले परमेश्वर में विश्वास करछ्य, उन चीजून पाईन बिना मर ग्या जैको वादा परमेश्वरेले करिना को छ्यो। लेकिन उन यो बात स समझ ग्या कि परमेश्वर ऊँन वाला बखत में कि करोलो। उनूनले यो बात ले समझ लीछ कि हम यो धरती में अजनबी और परदेशी छा।

14यो उन लोगून का बारिमें बतूछो जो कुंना कि उन यो संसार में अजनबी और परदेशी छन। उन दिखनान कि उन एक इसा देश स पाना की उम्मीद करून मर्यान जो उनोरो होलो।

15अगर उन उ देशा का बारिमें सोचनान जा भटे उन आईना का छ्या त उन वापस जाँ सकछ्या।

16लेकिन सच्चाई यो छै कि उनून एक खास देश की आश छी, जो स्वर्ग में छै। येक कारण परमेश्वर उन लोगून को परमेश्वर कईजान में खुश छ्या, किलैकी उले उनून खिन एक शैहर तैयार करिना को छै।

17जब परमेश्वरेले अब्राहम स परखछ्य, त विश्वास ले अब्राहम इसहाक को बलिदान करून खिन तैयार हो ग्यो। इसहाक अब्राहम को एकलौत च्योलो छ्यो। परमेश्वरेले अब्राहम थैं यो च्याला का बारिमें वादा करिना को छ्यो कि, “इसहाक का द्वारा ही त्येरो वंश जाणि जालो।” अब्राहम स यो पुरो विश्वास छ्यो, कि परमेश्वर मरिनान ज्यून कर सकछो। और तरीका ले अब्राहम ले अपून च्याला इसहाक स मरिनान में भटे वापस ज्यूनो पा लीछ।

20विश्वास का कारण इसहाक ले अपून द्वीवै च्यालान याकूब और एसाव स वादा का बातुन का बारिमें आशीष दीछ।

21विश्वास का कारण याकूब ले मरून बखत यूसुफ का द्वीवै च्याला में भटे एक-एक स आशीष दीछ, और अपूनी लठ्ठी का सहारा ले झुकभेरन उले परमेश्वरै की अराधना करछ्य।

22विश्वासा का कारण यूसुफ ले, जब उ मरून वालो छ्यो, त उले पुर विश्वास ले क्योछ कि इस्राएल का लोग मिस्र देश भटे निकलाल, या तक कि उले उनून यो हुकुम दीछ कि। “जब तुम मिस्र देश भटे जाला, त म्यारा मरना का बाद मेरि हड्डीन अपून दगाड़ कनान देश ली जाया।”

23फिर जब मिस्र देशा का राजा ले यो हुकुम दीछ कि जन्म हुन तक सब इस्राएली का च्यालान मार दी जानो चैछो, तब विश्वासा कारण मूसा का ईजा-बबा ले ऊस पैद हुना का बाद ऊस तीन मैंन तक लुका भेरन राखछ्य; किलैकी उनूनले देखछ्य, कि यो साधरण बच्चा नाहातिन, और उन राजा का हुकुम स तोड़ून है नै घबराया।

24मिस्र देशा का फरौन राजा फिरौन की चेलि ले मूसास पालछ्य। जब मूसा ठूलो हो ग्यो, त विश्वास का कारण उ नी चाँछ्यो कि लोग ऊस राजकुमारी को च्योलो कुंन।

25यो येक कारण भ्योछ कि मूसा ले थ्वाड़ा बखत खिन पाप को सुख को आनंद लीना का बजाय परमेश्वरा का लोगून का दगाड़ दुख भोगुन निको समझछ्य।

26मूसा जाण छ्यो कि मिस्र देशा का खजाना की तुलना में मसीह खिन दुख भोगून निको छै, किलैकी इसो करना ले परमेश्वर ऊस स्वर्ग में ईनाम द्योलो।

27विश्वास का कारण राजा का क्रोध ले नै डरभेरन मूसा ले मिस्र देश स छोड़ दीछ, किलैकी उ समझ ग्यो छ्यो कि यो माना इसो छ्यो जसो उले परमेश्वरेस देखछ्य, जो अदृश्य छै।

28विश्वास का कारण मूसा ले इस्राएली लोगून हुकुम दीछ, कि उन द्वारून और मोलून में मेम्ना को खून छिड़क भेरन फसह का त्यारे की रस्म पुरी करा, ताकि पैलि सन्तानून नाश करून वालो दूत, इस्राएला का पैलि सन्तानून नै छू सको।

29विश्वास का कारण इस्राएली लोग लाल समुद्रा स पार इसकैं कर ग्या, जसकैं सुखी जमीन में हिटून मर्यान हुन। लेकिन जब मिस्र देशा का लोग ऊस पार करून लाग्‍यान त समुन्द्रो को पानि पैलि नियाती हो भेरन उनून बगा भेरन ली ग्योछ।

30किलैकी इस्राएली लोगून ले परमेश्वर में विश्वास करछ्य, येक कारण विश्वास का कारण उन सात दिनून तक यरीहो शैहरा का दीवार का चारू तरफ चक्‍कर लगायान, तब दीवार खिती गै।

31विश्वास का कारण राहाब वेश्या परमेश्वरा का हुकुम नै मान्या वालान का दगाड़ नाश भैछ; किलैकी उले उन इस्राएली भेदियान शरण दीछ जो यरीहो शैहरो को भेद लीन खिन आईना का छ्या।

32मैंस और के कुंना की के जरूरत नाहातिन। अगर मैं इसा लोगून का विश्वास का बारिमें ले चर्चा करून लागू जसकैं गिदोन, बाराक, शिमशोन, और यिफ्ताह, और दाऊद और शमूएल और परमेश्वरा का तरफ भटे संदेश दिनवाला का लोगून का बारिमें बतुन खिन म्यारा पास बखत नाहातिन।

33इनूनले विश्वास का द्वारा राज्य जीत्यान; भल काम कर्यान; और वादा करिना का चीजून पायान, बाघ ले उनून नै खा सक्या।

34आगा की लपट ले उनून नै जला सकी, और तलवारै की धार ले उनून नै मार सकी। एक बार कमजोर हुना का बाद उनून दुबारा ताकतवर बनाई ग्योछ; लड़ाई में बीर निकल्यान; और उनूनले अपून दुश्मनून की सेनान दूर भगा दीछ।

35कुछ स्यैनिन ले अपून मरिनाका लोगून ज्यूनो पाछ; कतुक त मार खानै-खानै मर ग्या; और उन अपूनो विश्वास नी छोड़ून चाँछ्या ताकि उन कैद भटे रिहा हो जियून; येक कारण मरिभेरन दुबारा ज्यून हुना का बाद उन परमेश्वरा दगाड़ हमेशा खिन जीन चाँछ्या।

36कुछ लोगून को मजाक उड़ाछ और कोड़ो को सामना करून पड़छ्य जब की कुछून जंजीरों ले जकड़ भेरन जेल में डाल दी ग्यान।

37उनूनमें भटे कुछ विश्वासी लोगून ढूंगान ले लोड़ियाई ग्योछ। और कुछ लोगून आरी ले चीरभेरन द्वी हिस्सा कर दी ग्यान, कईन तलवार ले मौत का घाट उतार दीछ ग्योछ। उन गरीब छ्या, और उनार दगाड़ अत्याचार और बुरा बरताव करि ग्योछ। उन भेड़-बाकरान का खालून ओढ़भेरन इथकै-उथकै और जंगलून, और पहाड़ून, और गुफान में, और धरतीका हुडियारून में मारा-मारा फेरीन र्यान।

39यो बुरा संसार इन विश्वासी लोगून का योग्य नी छ्यो। विश्वासा का द्वाराई इन सबून का बारिमें परमेश्वर उनून खिन खुश छै, फिरले उनून उ नै मिल्यो जैस दीना को वादा परमेश्वरेले उनूनथैं करिना को छ्यो।

40किलैकी परमेश्वरा का पास सिर्फ उनून खिन नै, बल्कि हमून खिन ले एक बड़िया योजना छै। परमेश्वर उनून सिर्फ हमार दगाड़ मिलाभेरन सिद्ध बनूनो चाछो।

← Chapter 10 Jump to: Chapter 12 →