Hebrews 4

kumaoni

← Chapter 3 Jump to: Chapter 5 →

1परमेश्वरेले हमूनथैं वादा करिना को छै कि हम आराम का जाग में जूला, येक कारण आरामा का जाग में पुजना को वादा आजि ले छै। त हमून भौत सतर्क रूनो चैछो; और तुमून में भटे कैसे ले उ आरामा का जाग में जाना को मौका नै छोड़ून चैछो।

2जसीकैं हमून यीशु मसीह का बारिमें सुसमाचार सुणछ्य, उसीकैं इस्राएल का लोगून ले आरामा जाग में पुजना को सुसमाचार सुणछ्य। लेकिन उनूनले उमें विश्वास नै कर्यो। किलैकी, उ सुसमाचार उनून खिन बेकार छ्यो।

3येक कारण हम लोग जो उ बात में विश्वास करनू जो परमेश्वरेले कईना की छै, आरामा का जाग में पूजला; और जसो दुसरान का बारिमें परमेश्वरेले क्योछ, “मैंले अपून गुस्सा में कसम खाछ, कि उन म्यारा आरामा का जाग में नी जा पाला।” परमेश्वरे ले यो येक कारण नै कयो किलैकी आरामा की जाग एल तैयार नी छी। यो संसार स बनून बखत भटे ही तैयार हो चुक गैछी।

4किलैकी सातवाँ दिन का बारिमें परमेश्वरे ले पवित्रशास्त्र में इसीकैं कईना को छै, “परमेश्वरे ले सातवाँ दिन अपून सब कामून पुरो करभेरन आराम करछ्य।”

5हमूनले पवित्रशास्त्र में यो ले पढ़ीना को छै, “उन म्यारा आरामा का जाग में नी जा सकाला।”

6इस्राएलाक उन लोग, जिनारा बीच पैलि बार सुसमाचार सुणाई ग्योछ, उन वाँ जान में असफल हो ग्यान किलैकी उनूनले परमेश्वरा का हुकमून नै मान्यो। लेकिन उनून खिन उ आरामा का जाग में जाना को आजि ले मौका छै।

7येक कारण परमेश्वरे ले अपून आरामा का जाग में जान खिन एक बखत तय कर रैछ, और उ बखत आज छै। और कई साल बाद, उले दाऊदाका द्वारा इन बातुन कुंछो, जो पैलि भटे कयी गैछ्या। “अगर आज तुम परमेश्वरे की आवाज सुणछा, त अपून मन स कठोर जन करा।”

8और इस्राएला का लोगून का बारिमें, अगर यहोशू ले उनेरि अगुवाई करभेरन उनून उ आरामा का पुजाछ जो परमेश्वरे ले तैयार करिना को छ्यो, त फिर यो जरूरी नाहातिन कि परमेश्वर फिर हमून एक बार उ बखत का बारिमें बतूनो जब लोगून उमें भेजि जाला।

9येक कारण परमेश्वरा का लोगून खिन आजि ले एक जाग तैयार छै, जाँ उन पुर तरीका ले आराम कर सकनान। उन उई तरीका ले आराम कराला जसीकैं परमेश्वरे ले सातवाँ दिन आराम करछ्य।

10परमेश्वरेले अपूनो काम स खतम करना का बाद आराम करछ्य। और यो उन सबून का नियाती छै जो परमेश्वरा का पास आराम करून जानान। उन अपूनो काम खतम करना का बाद आराम कराला।

11येक कारण हम उ आरामा का जाग में पुजना की कोशिश करा, किलैकी कोई ले आदिमी स उन लोगून की नकल नै करूनी चैनी जिनूनले परमेश्वरा हुकमून मानून है मना कर दीछ। तब हम उ आरामा का जाग में पूजला।

12किलैकी परमेश्‍वर का बचन जीवित और असरदार छै, और उ द्वी धारी तलवार है ले ज्यादा तेज छै, जो हमार भितर आभेरन हमेरि आत्मा, प्राण, जोड़ून और गुदा-गुदा स भेद दीछो, और यो हमार मनै की इच्छान और बिचारून परखछो।

13परमेश्वरा का नजरून में यो संसारो को कोई ले आदिमी लुकीना को नाहातिन, हमून सब कामून को हिसाब दीन पड़ोलो उक सामुनि सब चीज खुलीना का और प्रगट छन।

14यीशु जो स्वर्ग खिन ग्योछ, उ परमेश्वरो को च्योलो छै। उ हम सबून को महायाजक छै। येक कारण आ हम उ विश्वास स छोड़े बिना मजबूती ले बनिना का रौ, जैस हमूले सबून का सामुनि स्वीकार करिना को छ्यो।

15किलैकी यो महायाजक, जो यीशु मसीह छै, हमेरि हरेक कमजोरी स समझछो। शैतान ले हमार नियाती हर बात में यीशु मसीह की परीक्षा लीछ; लेकिन उले कोई ले पाप नै कर्यो।

16येक कारण आ हम बिना केका डरले परमेश्वरा सामुनि आ, तब परमेश्वर हमून में दया और अनुग्रह दिखालो, और जब हमून जरूरत होलि तब उ हमरि मद्दत करोलो।

← Chapter 3 Jump to: Chapter 5 →