Jeremiah 44

Kikuyu Bible (IBUKU RĨRĨA ITHERU RĨA NGAI)

← Chapter 43 Jump to: Chapter 45 →

1ĨNO NĨYO ndũmĩrĩri ĩrĩa yakinyĩrĩire Jeremia ĩkoniĩ Ayahudi othe arĩa maatũire bũrũri wa Misiri, o acio maatũire Migidoli, na Tahapanihesi, na Nofu, o na bũrũri wa Pathirosi, akĩĩrũo atĩrĩ,

2Jehova Mũnene wa Ita, o we Ngai wa Isiraeli, ekuuga ũũ: Nĩmwĩoneire ũũru wothe ũrĩa ndehithĩirie Jerusalemu, o na matũũra mothe ma Juda; na rĩrĩ, ũmũthĩ nĩmatigĩtwo o ro ũguo magakira ihooru, na gũtirĩ mũndũ ũtũũraga kuo,

3nĩ ũndũ wa waganu ũrĩa andũ akuo mekaga wa gũ’thirĩkia nĩguo ndakare; nĩ ũndũ nĩmaathiaga gũcinĩra ngai ingĩ ũbumba, magacitungatĩra, o iria mataatũire moĩ o ene, kana inyuĩ, o na kana maithe manyu.

4No rĩrĩ, nĩndatũire ndĩmũrekagĩria ndungata ciakwa ciothe cia anabii, ta arĩ kũroka ndarokaga gũũkĩra rũcinĩ tene ndĩcirekie, ngiuga atĩrĩ, Hĩ! Tigai gwĩka ũndũ ũyũ wĩ thahu, o ũyũ ’thũũrĩte mũno.

5No matiigana kũigua, o na kana gũtega matũ, nĩguo magarũrũke matige waganu wao, na matige gũcinĩra ngai ingĩ ũbumba.

6Ũndũ ũcio nĩguo watũmire mang’ũrĩka o na marakara makwa maitĩke, maakane matũũra-inĩ ma Juda, o na njĩra-inĩ cia Jerusalemu; namo nĩmakĩanangĩtwo magatigwo o ro ũguo makirĩte ihooru, o ta ũũ gũtariĩ ũmũthĩ.

7Rĩu-rĩ, tondũ ũcio Jehova Ngai Mũnene wa Ita, o we Ngai wa Isiraeli, ekũũria ũũ: Atĩrĩrĩ, nĩ kĩ gĩtũmĩte mwĩhie wĩhia mũnene ũũ, ta arĩ kwenda mwendete kwĩyũkĩrĩra inyuene, nĩ getha mwĩninithie, inyuĩ arũme, na andũ-a-nja, na ciana, o na tũkenge, mũthenge kũu Juda, nĩguo kwage gũtigwo mũndũ o na ũmwe,

8nĩ ũndũ wa ũrĩa mũ’thirĩkagia mũgatũma ndakare nĩ ũndũ wa mawĩra marĩa mũrutaga na moko manyu, mũgĩcinĩra ngai ingĩ ũbumba gũkũ bũrũri wa Misiri, o gũkũ mũũkĩte kũrĩĩra ũgeni? Anga no mũrenda kũninwo mwehere biũ, na mũgwatwo nĩ kĩrumi, o na mũmeneke ndũrĩrĩ-inĩ ciothe cia thĩ?

9Kaĩ mũriganĩirũo nĩ waganu ũrĩa wekagwo nĩ maithe manyu, na waganu wa athamaki a Juda, na waganu wa aka ao o na waganu ũrĩa mwekaga inyuene, o na wa aka anyu ũrĩa mekaga o kũu bũrũri wa Juda, o na njĩra-inĩ cia Jerusalemu?

10Nao matirĩ marenyihia o na ũmũthĩ, o na kana magetigĩra, o na kana makarũmĩrĩra watho wakwa, o na kana irĩra cia watho wakwa wa kũrũmĩrĩrũo, iria ndamwathire, o na ngĩatha maithe manyu.

11Tondũ ũcio, Jehova Mũnene wa Ita, o we Ngai wa Isiraeli, ekuuga ũũ: Atĩrĩrĩ, nĩngũmũũmĩria ũthiũ wakwa ndĩmũgere ngero njũru, naguo ũguo nĩ ta kuuga ’ng’ũrie Juda guothe o gũkũng’ũria biũ.

12Nĩnganyita matigari ma Juda, o maya merekeire Misiri atĩ nĩguo makarĩĩre ũgeni kuo, nao nĩmakaninwo biũ. O bũrũri wa Misiri nokuo makagũa maninĩtwo na rũhiũ rũa njora o na ng’aragu, nao magĩkue kuuma o ũrĩa mũnyinyi mũno, nginya o ũrĩa mũnene gũkĩra arĩa angĩ, maninĩtwo na rũhiũ rũa njora, o na ng’aragu; nao matuĩke o ta kĩndũ gĩthemenge, o na ũndũ wa kũmakania, na magwatwo nĩ kĩrumi, o na mameneke.

13Nĩ ũndũ-rĩ, andũ arĩa matũũraga bũrũri wa Misiri nĩngamaherithia, o ta ũrĩa ndaherithanirie Jerusalemu, ndĩmaherithie na rũhiũ rũa njora, o na ng’aragu, o na mũthiro,

14o nginya gũtuĩke atĩ gũtirĩ mũndũ o na ũmwe ũhonokete wa matigari ma Juda, marĩa mokĩte bũrũri wa Misiri marĩĩre ũgeni kuo, o na kana agatigara, nĩguo atĩ macoke bũrũri wa Juda, kũu meriragĩria gũcoka magatũũre kuo; nĩ gũkorũo gũtirĩ mũndũ ũgacoka kuo tiga o arĩa makeyũrĩra methare.

15Hĩndĩ ĩo andũ othe arĩa maamenyete atĩ aka ao nĩmacinagĩra ngai ingĩ ũbumba, o na atumia othe arĩa maarũgamĩte hakuhĩ, magĩcokeria Jeremia ũhoro marĩ kĩũngano kĩnene, naguo ũguo nĩ ta kuuga andũ othe arĩa maatũũrĩte bũrũri ũcio wa Misiri, o kũu Pathirosi, magĩkĩmwĩra atĩrĩ,

16Ha ũhoro ũcio ũtũheete ũkĩgwetaga rĩĩtwa rĩa Jehova-rĩ, tũtingĩũigua o na atĩa.

17No nĩ kũhingia tũkũhingia ũhoro wothe ũrĩa twarĩtie na tũnua twitũ, wa atĩ tũcinagĩre mũthamaki mũndũ-wa-nja wa kũrĩa igũrũ ũbumba, na tũmũrutagĩre indo iria irutagwo cia kũnyuwo, o ta ũrĩa twekaga, ithuene, na maithe maitũ, na athamaki aitũ, o na anene aitũ, kũu matũũra-inĩ ma Juda, o na njĩra-inĩ cia Jerusalemu nĩ ũndũ hĩndĩ ĩo twarĩ na irio nyingĩ, na twarĩ agaacĩru, na tũtionaga ũũru.

18No kuuma hĩndĩ ĩrĩa twatigire gũcinĩra mũthamaki mũndũ-wa-nja wa kũrĩa igũrũ ũbumba, o na tũgĩtiga kũmũitangĩra indo cia kũnyuworĩ, tũtũire tũũrĩirũo nĩ indo ciothe, na tũkaninagwo na rũhiũ rũa njora, o na ng’aragu.

19Na rĩrĩ, hĩndĩ ĩrĩa twacinagĩra mũthamaki ũcio mũndũ-wa-nja wa kũrĩa igũrũ ũbumba, na tũkamũitangĩra indo iria irutagwo cia kũnyuwo-rĩ, kaĩ twakĩmũthondekagĩra tũmĩgate twĩ na mũhianĩre wake, na tũkamũitagĩra indo cia kũnyuwo cia igongona, athuri aitũ matarĩ ho ũhoro-inĩ ũcio?

20Hĩndĩ ĩo Jeremia agĩkĩhe andũ acio othe ũhoro, arũme o na andũ-a-nja, naguo ũguo nĩ ta kuuga andũ othe arĩa maamũcokeirie ũhoro ũcio, akĩmera atĩrĩ,

21Ũbumba ũcio mwacinagĩra matũũra ma Juda, o na njĩra-inĩ cia Jerusalemu, inyuene, na maithe manyu, na athamaki anyu, na anene, o na andũ othe a bũrũri wanyu-rĩ, githĩ Jehova ndaaũririkanire, o na akĩrũmbũiya ũhoro waguo?

22Jehova agĩkĩremwo nĩ gũcoka gũkirĩrĩria ũhoro wanyu nĩ ũndũ wa ũũru wa ciĩko cianyu, o na ũndũ wa maũndũ me thahu marĩa mwekaga. Naguo ũndũ ũcio nĩguo ũtũmĩte bũrũri wanyu ũkire ihooru, na ũtuĩke ũndũ wa kũmakania, o na ũgwatwo nĩ kĩrumi, ũkaaga andũ maũtũũrĩte, o ta ũũ gũtariĩ ũmũthĩ.

23Gũtuĩkĩte ũguo nĩ ũndũ wa ũrĩa mwacinagĩra ngai ingĩ ũbumba, o na ningĩ nĩ ũndũ nĩmwĩhĩtie Jehova, na mũkarega kũigua mũgambo wa Jehova, o na kana mũkarũmĩrĩra watho wake, o na kana irĩra cia watho wake wa kũrũmĩrĩrũo, o na kana maũira make; ũndũ ũcio nĩguo watũmire mũkorũo nĩ ũũru ũyũ o ta ũũ gũtariĩ ũmũthĩ.

24O na ningĩ Jeremia akĩĩra andũ acio othe, o na gwata andũ-a-nja, atĩrĩ, Ta iguai ũhoro wa Jehova, inyuĩ andũ othe a Juda arĩa mũrĩ bũrũri wa Misiri.

25Jehova Mũnene wa Ita, o we Ngai wa Isiraeli, ekuuga ũũ: Inyuĩ inyuene, o na aka anyu, nĩmwarĩtie na tũnua twanyu, o na mũkahingia ũndũ ũcio na ũndũ wa kũwĩka na moko manyu, mũkoiga atĩrĩ, Nĩtũkũhingia mĩĩhĩtwa iitũ ĩrĩa twehĩtire, ya atĩ tũcinire mũthamaki mũndũ-wa-nja wa kũrĩa igũrũ ũbumba, o na tũmũitangire indo iria irutagwo cia kũnyuwo; rĩu gĩtũũrei mũrũmĩtie mĩĩhĩtwa ĩo yanyu, o na mũhingie maũndũ macio mwĩhĩtĩte.

26Ningĩ tondũ wa maũndũ macio, ta iguai ũhoro wa Jehova, inyuĩ andũ othe a Juda arĩa mũtũũraga bũrũri wa Misiri. Jehova ekuuga ũũ: Atĩrĩrĩ, niĩ o na niĩ nĩndĩĩhĩtĩte ngĩĩgwetaga rĩĩtwa rĩakwa inene mũno, ngoiga atĩ rĩĩtwa rĩakwa rĩtigacoka kũgwetwo o na rĩ na kanua ka mũndũ o na ũrĩkũ wa andũ a Juda arĩa matũire bũrũri ũyũ wothe wa Misiri, akiuga atĩrĩ, O ta ũrĩa Mwathani Jehova atũũraga muoyo.

27Atĩrĩrĩ, ngũtũũra ndĩmacũthĩrĩirie nĩguo ndĩmareherere ũũru, na ndimareherere wega nao andũ othe a Juda arĩa marĩ bũrũri wa Misiri nĩ kũninwo makaninwo na rũhiũ rũa njora, na ng’aragu, o nginya mathire biũ.

28Nao arĩa makahonoka kũũragwo na rũhiũ rũa njora nĩmakahũndũka bũrũri wa Juda moime bũrũri wa Misiri marĩ anyinyi mũno magĩtarũo; namo matigari mothe ma Juda, ma andũ arĩa maathiĩte Misiri kũrĩĩra ũgeni kuo, nĩmakamenya kana nĩ kiugo gĩakwa kĩrĩĩru kana nĩ kĩao.

29Naho ha ũhoro wanyu-rĩ, ũndũ ũyũ nĩguo ũgatuĩka kĩmenyithia kĩanyu: nĩngamũherithia mwĩ gũkũ, nĩ getha mũmenye atĩ ti-itherũ ũhoro wakwa wa atĩ nĩngamũrehithĩrie ũũru nĩguo mũrĩĩru; ũguo nĩguo Jehova oiga.

30Ningĩ Jehova ekuuga ũũ: Atĩrĩrĩ, nĩngarekereria Firauni, ũcio wĩtagwo Hofira, o we mũthamaki wa Misiri, ndĩmũneane moko-inĩ ma thũ ciake, o moko-inĩ ma andũ arĩa macaragia kũmũruta muoyo; o ta ũrĩa ndarekereirie Zedekia, mũthamaki wa Juda, ngĩmũneana moko-inĩ ma Nebukadirezaru, mũthamaki wa Babuloni, thũ yake, o we ũrĩa wacaragia kũmũruta muoyo.

← Chapter 43 Jump to: Chapter 45 →