Leviticus 17

Kikuyu Bible (IBUKU RĨRĨA ITHERU RĨA NGAI)

← Chapter 16 Jump to: Chapter 18 →

1NINGĨ Jehova akĩarĩria Musa, akĩmwĩra atĩrĩ,

2Arĩria Haruni, o na ariũ ake, o na andũ othe a ciana cia Isiraeli, ũmere ũũ: Ũyũ nĩguo ũndũ ũrĩa Jehova aathanĩte, akoiga atĩrĩ,

3Mũndũ o na ũrĩkũ wa nyũmba ya Isiraeli ũrĩa ũgathĩnjĩra ndegwa ĩkoniĩ igongona, kana gatũrũme, kana mbũri kĩraaro-inĩ thĩinĩ, kana amĩthĩnjĩre na kũu gĩthaka-inĩ mbarĩ ĩrĩa ĩngĩ ya kĩraaro,

4na aage kũmĩtwara mũromo-inĩ wa hema-ya-gũtũnganwo, amĩrute ĩtuĩke kĩndũ kĩrĩa kĩrutĩirũo Jehova o hau mbere ya gĩikaro kĩa Jehova, mũndũ ũcio nĩaitĩte thakame, na nĩagacokererũo nĩ thakame ĩo, nake nĩakaingatwo athengio kũrĩ andũ ao;

5nĩ getha magongona marĩa ciana cia Isiraeli imenyerete kũrutĩra werũ-inĩ imatwaragĩre Jehova, o kũu mũromo-inĩ wa hema-ya-gũtũnganwo, kũrĩ mũthĩnjĩri-Ngai, nĩguo imarute matuĩke magongona marĩa marutĩirũo Jehova ma ũiguano.

6Nake mũthĩnjĩri-Ngai aminjaminje thakame yamo igũrũ rĩa kĩgongona kĩa Jehova, o kũu mũromo-inĩ wa hema-ya-gũtũnganwo, na acine maguta mamo ma gũtũma mũtararĩko ũrĩa ũnungaga wega ũiguwo nĩ Jehova

7Naho ha ũhoro wa magongona marĩa irutaga-rĩ, itikanacoke kũmarutĩra marimũ marĩa mahaana thenge cia njamba o na rĩ, o macio ciĩriragĩria kũrũmĩrĩra. Naguo ũndũ ũcio ũtuĩke kĩrĩra kĩa watho wa kũrũmĩrĩrũo nĩcio njiaro-inĩ ciacio ciothe tene na tene.

8Nawe ũciĩre atĩrĩ, Mũndũ o wothe ũrĩa ũgakorũo arĩ wa nyũmba ya Isiraeli, kana arĩ mũgeni ũtũũranĩtie nacio ũrĩa ũkaruta ihaki rĩa njino, kana igongona rĩa thĩnjo,

9na aage kũrĩtwara mũromo-inĩ wa hema-ya-gũtũnganwo, nĩguo akarĩrutĩre Jehova-rĩ, mũndũ ũcio nĩakaingatwo athengio kũrĩ andũ ao.

10Na rĩrĩ, mũndũ o wothe ũrĩa ũgakorũo arĩ wa nyũmba ya Isiraeli, kana wa ageni arĩa matũũranĩtie nao, ũrĩa ũkarĩa thakame ya mũthemba o na ũrĩkũ, nĩngaheta ũthiũ wakwa nĩ ũndũ wa mũndũ ũcio ũkũrĩa thakame, na nĩngamũingata ndĩmũthengie kũrĩ andũ ao.

11Nĩ gũkorũo muoyo wa mwĩrĩ wĩ thĩinĩ wa thakame; na nĩyo ndĩmũheete ĩigagwo kĩgongona-inĩ ya kũhorohagĩria mĩoyo yanyu; nĩ gũkorũo thakame nĩyo ĩhorohanagĩria nĩ ũndũ wa muoyo ũrĩa ũrĩ thĩinĩ wayo.

12Tondũ ũcio nderire ciana cia Isiraeli atĩrĩ, Gũtirĩ mũndũ o na ũmwe wanyu ũkarĩa thakame, kana mũgeni o na ũrĩkũ ũrĩa ũtũũranĩtie na inyuĩ arĩe thakame.

13Na rĩrĩ, mũndũ o na ũrĩkũ wa ciana cia Isiraeli, kana wa ageni arĩa matũũranĩtie nacio, ũkanyita nyamũ ya magũrũ mana, kana ĩrĩa yũmbũkaga ya mũthemba ũrĩa ũngĩrĩo akĩguĩma-rĩ, nĩ gũita agaita thakame yayo thĩ, acoke amĩthike na tĩri.

14Nĩ gũkorũo ha ũhoro wa muoyo wa kĩndũ o gĩothe kĩrĩa kĩĩ naguo-rĩ, thakame yakĩo no kĩndũ o ro kĩmwe na muoyo wakĩo; tondũ ũcio nderire ciana cia Isiraeli atĩrĩ, Mũtikanarĩe thakame ya mũthemba o na ũrĩkũ wa nyamũ; nĩ gũkorũo muoyo wa kĩndũ o gĩothe kĩrĩa kĩĩ naguo wĩ thĩinĩ wa thakame yakĩo; nake mũndũ o wothe ũrĩa ũkamĩrĩa nĩakaingatwo athengio biũ.

15Ningĩ mũndũ o wothe o na arĩ wa bũrũri wanyu, kana mũgeni wanyu, ũrĩa ũkarĩa nyamũ ĩĩũragĩte, kana ĩtinangĩtio nĩ nyamũ cia werũ, nĩagathambia nguo ciake, na ethambe na maĩ, na atinde e na thahu nginya o hwaĩ-inĩ; na thutha wa ũguo nĩakonagwo arĩ mũtheru.

16No rĩrĩ, angĩkaaga gũcithambia, kana aage gwĩthamba mwĩrĩ, nĩagacokererũo nĩ ũũru ũcio wake.

← Chapter 16 Jump to: Chapter 18 →