Leviticus 21

Kikuyu Bible (IBUKU RĨRĨA ITHERU RĨA NGAI)

← Chapter 20 Jump to: Chapter 22 →

1NINGĨ Jehova akĩĩra Musa atĩrĩ, Arĩria athĩnjĩri-Ngai, ariũ a Haruni, ũmere ũũ: Thĩinĩ wanyu gũtikanagĩe mũndũ o na ũmwe ũkwĩgwatia thahu akĩhutia kĩimba kĩa andũ ao,

2tiga o kĩa mũndũ wa nyũmba yao ũrĩa ũkuhanĩrĩirio nake mũno, naguo ũguo nĩ ta kuuga nyina, kana ithe, kana mũriũ, kana mwarĩ, kana mũrũ wa nyina;

3ningĩ mwarĩ wa nyina ũrĩa wĩ riiko, angĩkorũo e mũirĩtu gathirange, atarĩ aagĩa mũrũme, aahota kwĩgwatia thahu nĩ ũndũ wake.

4Mũthĩnjĩri-Ngai ũcio-rĩ, tondũ nĩ mũndũ mũtongoria thĩinĩ wa andũ ao, ndakanegwatie thahu.

5Matikanetue ihara mĩtwe yao, kana menjwo mĩthia-inĩ ya nderu ciao, kana meke ũndũ o na ũrĩkũ wa gwĩtemenga mĩĩrĩ yao.

6No mũhaka matuĩke atheru maamũrĩirũo Ngai wao, na matikanathahie rĩĩtwa rĩa Ngai wao, nĩ ũndũ nĩo matwaragĩra Jehova indo iria irutagwo cia gũcinwo na mwaki, nacio nĩcio irio cia Ngai wao; tondũ ũcio nĩmatuĩke aamũre.

7Matĩkanahikie mũndũ-wa-nja mũmaraya, kana ũrĩa ũthũkĩtio nĩ mũndũ mũrũme, kana mahikie mũndũ-wa-nja ũteetwo nĩ mũrũme; nĩ gũkorũo mũthĩnjĩri-Ngai nĩaamũrĩirũo Ngai wake.

8Tondũ ũcio nĩũkamwamũra, ũmũtue mũtheru, nĩ gũkorũo nĩwe ũrutagĩra Ngai waku irio ciake magongona-inĩ; tondũ ũcio nĩakonwo arĩ mũtheru nĩwe, nĩ gũkorũo niĩ Jehova ũrĩa ũmwamũraga akamũtheria ndĩ mũtheru.

9Ningĩ-rĩ, mwarĩ wa mũthĩnjĩri-Ngai o na ũrĩkũ angĩĩgwatia thahu ethũkie we mwene akĩhũra maraya, nĩarehereire ithe thahu; mũirĩtu ũcio nĩ gũcinwo agacinwo na mwaki.

10Nake mũndũ ũrĩa ũtuĩkĩte mũthĩnjĩri-Ngai ũrĩa mũnene thĩinĩ wa ariũ a ithe, o ũcio ũitĩrĩirio maguta marĩa maitanagĩrĩrio mũtwe, akaamũrũo agatherio nĩ getha ehumbage nguo cia mũthĩnjĩri-Ngai ũrĩa mũnene-rĩ, ndakanareke njuĩrĩ ya mũtwe wake ĩikare ĩrĩ nguũrie, kana atembũrange nguo ciake,

11kana atonye handũ he kĩimba, kana egwatie thahu nĩ ũndũ wa ithe, kana nyina;

12kana oime handũ harĩa haamũre, kana athahie handũ harĩa haamũre ha Ngai ahathũkie; nĩ gũkorũo ũhoro wa kwamũrũo na maguta marĩa maitanagĩrĩrio ma Ngai wake wĩ mũtwe wake; niĩ nĩ niĩ Jehova.

13Nake akahikia mũka e mũirĩtu gathirange.

14Ndakanahikie mũka wa ndigwa, kana mũndũ-wa-nja ũteetwo nĩ mũrũme, kana ũthũkĩtio nĩ mũndũ mũrũme, kana mũmaraya no rĩrĩ, mũirĩtu gathirange wa rũrĩrĩ rũao nowe akahikia, atuĩke mũka,

15nĩguo ndakanathahie mbeũ yake thĩinĩ wa andũ ao amĩthũkie; nĩ gũkorũo niĩ nĩ niĩ Jehova ũrĩa wamũraga mũndũ ũcio, ngamũtheria.

16Ningĩ Jehova agĩgĩcoka akĩarĩria Musa, akĩmwĩra atĩrĩ,

17Arĩria Haruni, ũmwĩre ũũ: Mũndũ o wothe wa mbeũ yaku thĩinĩ wa njiaro ciao ciothe ũrĩa wĩ na kaũũgũ ndakanathengerere magongona-inĩ arutĩre Ngai wake irio ciake.

18Nĩ gũkorũo mũndũ o wothe ũrĩa wĩ na kaũũgũ, ndagathengerera ho, o na angĩtuĩka nĩ mũtumumu, kana mũndũ ũgũthua, kana mũndũ mũtuĩku iniũrũ, kana wĩ na kĩĩga o na kĩrĩkũ kĩĩongereire thĩinĩ wa mwĩrĩ wake,

19kana kĩonje kiunĩkĩte kũgũrũ, kana guoko,

20kana mũndũ mũgondoku rũcuthĩ, kana kĩũgũ gĩa ũkuhĩ, kana mũndũ wĩ na kaũũgũ o na karĩkũ riitho, kana mũrũaru kĩmaĩ, kana muomboku mwĩrĩ, kana mwatũku nyee;

21gũtirĩ mũndũ o na ũmwe wa mbeũ ya Haruni mũthĩnjĩri-Ngai wĩ na kaũũgũ ũgathengerera ho arutĩre Jehova magongona ma gũcinwo na mwaki; ũcio e na ũũgũ; ndagathengerera ho arutĩre Ngai wake irio cia magongona.

22Kũrĩa nĩakarĩa irio cia Ngai wake, iria theru mũno, o na iria ingĩ theru o ro ũguo.

23Ũndũ atageka, no gũtonya atagatonya athengerere gĩtama gĩa kũhakania, kana kĩgongona, nĩ gũkorũo e na ũũgũ, nĩguo ndagathahie handũ hakwa harĩa haamũre ahathũkie; nĩ ũndũ niĩ nĩ niĩ Jehova ũrĩa ũmaamũraga ngamatheria.

24Nake Musa agĩkĩhe Haruni, na ariũ ake, o na ciana cia Isiraeli ciothe ũhoro ũcio.

← Chapter 20 Jump to: Chapter 22 →