Mark 11

Kikuyu Bible (IBUKU RĨRĨA ITHERU RĨA NGAI)

← Chapter 10 Jump to: Chapter 12 →

1NA maakuhĩhĩria Jerusalemu, maakinya Bethifage na Bethania, kĩrĩma-inĩ kĩa Mĩtamaiyũ-rĩ, agĩtũma arutwo ake erĩ,

2akĩmera atĩrĩ, Thiĩi mũtonye mũciĩ ũrĩa mũringaine naguo: o mwatonya kuo nĩmũkuona njaũ ya ndigiri ĩĩ njohe, ĩtarĩ yahaicwo nĩ mũndũ; mũmĩohore mũrehe.

3Na mũngĩũrio nĩ mũndũ, Mũgwĩka ũguo nĩkĩ? muuge atĩrĩ, Nĩ Mwathani ũbatairio nĩyo; na nĩekũmĩcokia gũkũ o narua.

4Nao magĩthiĩ, magĩkora njaũ ya ndigiri yohereirũo mũromo-inĩ, nja, o njĩra-inĩ; makĩmĩohora.

5Na andũ arĩa maarũngiĩ ho, amwe ao makĩmoria, Mũgwĩka atĩa, mũkĩohora njaũ ĩo?

6Nao makĩmera o ta ũrĩa Jesu oigire: nao makĩmetĩkĩria.

7Magĩtwara njaũ ĩo kwĩ Jesu makĩmĩtandĩka nguo ciao; nake akĩmĩhaica.

8Ningĩ andũ aingĩ makĩara nguo ciao njĩra-inĩ; na angĩ makĩara mathĩgĩ maatuĩte mĩgũnda-inĩ.

9Na andũ arĩa maamũtongoretie, o na arĩa maamuumĩte thutha, magakĩanirĩra makoiga atĩrĩ, Hosana; Kũrathimwo-rĩ, nĩ ũrĩa ũgũũka na rĩĩtwa rĩa Mwathani:

10Kũrathimwo-rĩ, nĩ ũthamaki ũrĩa ũgũũka, ũrĩa wa ithe witũ Daudi: Hosana igũrũ o igũrũ.

11Agĩgĩtonya Jerusalemu, agĩthiĩ hekarũ; na aarĩkia kwĩrorangĩra maũndũ mothe, akiuma kuo agĩthiĩ Bethania hamwe na arĩa ikũmi na erĩ, tondũ hĩndĩ ĩo kwarĩ hwaĩ-inĩ.

12Na mũthenya ũyũ ũngĩ, maarĩkia kuuma Bethania, akĩigua ahũtiĩ.

13Na ona mũkũyũ wĩ haraya wĩ na mathangũ, agĩthiĩ kũrora kana hihi aakora wĩ na kĩndũ: na aakinya harĩ guo, akĩaga kĩndũ, no mathangũ matheri; tondũ gũtiakinyĩte hingo ya ngũyũ.

14Nake akĩwarĩria akĩwĩra, Mũndũ ndakanarĩe maciaro maku thutha ũyũ nginya tene na tene. Nao arutwo makĩigua ũguo oiga.

15Magĩgĩkinya Jerusalemu: nake agĩtonya hekarũ, agĩitĩka kũrutũrũra arĩa maathogoranagĩra kũu hekarũ, na akĩng’aũrania metha cia arĩa maakũũranagia mbia, o na itĩ cia arĩa mendagia ndutura;

16na ndangĩĩtĩkĩria mũndũ ahungurĩrie kĩndũ kũu hekarũ.

17Akĩrutana, akĩmera atĩrĩ, Githĩ ũhoro ndwandĩkĩtwo atĩ, Nyũmba yakwa ĩgetagwo nyũmba ya kũhoyagĩrũo nĩ ndũrĩrĩ ciothe? Inyuĩ-rĩ, mũtũmĩte ĩtuĩke ngurunga ya atunyani.

18Nao athĩnjĩri-Ngai arĩa anene o na aandĩki-marũa makĩigua ũhoro ũcio, magĩgĩcaria ũrĩa mangĩmũũragithia: tondũ nĩmaamwĩtigĩrĩte, nĩ gũkorũo kĩrĩndĩ gĩothe nĩkĩagegete nĩ ũhoro ũrĩa aarutanaga.

19Na o mũthenya gwakinya hwaĩ-inĩ nĩ kuuma oimaga itũũra rĩu.

20Ningĩ rũcinĩ makĩhĩtũka, makĩona mũkũyũ ũcio ũũmĩte nginya o mĩrita.

21Nake Petero aaririkana, akĩmwĩra atĩrĩ, Rabii, ta rora, mũkũyũ ũrĩa ũrarumire nĩũũmĩte.

22Nake Jesu akĩmacokeria, akĩmera, Wĩhokagei Ngai.

23Ngũmwĩra atĩrĩ na ma, Mũndũ o wothe ũkera kĩrĩma gĩkĩ, Ũrogũũka ũikio iria-inĩ thĩinĩ; na ndathanganie ngoro-inĩ yake, no etĩkie atĩ ũguo ekuuga nĩũgwĩkwo nĩagekĩrũo o ũguo.

24Tondũ ũcio ngũmwĩra atĩrĩ, Maũndũ o mothe marĩa mũhoyaga mũkoiga mũheo, ĩtĩkagiai atĩ nĩmũrĩkĩtie kũheo, na nĩmũkagĩa namo.

25Na ihinda o rĩothe mũrũngiĩ mũkĩhoya, muohanagĩre, akorũo mũrĩ ũthũ na mũndũ; nĩ getha Ithe wanyu ũrĩ Igũrũ nake amuohagĩre mehia manyu inyuĩ.

26[Ĩndĩ mũngĩkorũo mũtiohanagĩra mehia, nake Ithe wanyu wĩ Igũrũ ndarĩmuohagĩra mehia manyu].

27Magĩkinya o rĩngĩ Jerusalemu: na rĩrĩa aacangacangaga hekarũ-inĩ agĩkorũo nĩ athĩnjĩri-Ngai arĩa anene na aandĩki-marũa o na athuri;

28makĩmũũria atĩrĩ, Wĩkaga maũndũ maya na wathani ũrĩku? ningĩ nũ wakũheire wathani ũcio wĩkage maũndũ maya?

29Nake Jesu akĩmera atĩrĩ, Nĩngũmũũria kiugo kĩmwe, na inyuĩ mũnjokerie, na niĩ njoke ndĩmwĩre wathani ũrĩa njĩkaga maũndũ maya naguo.

30Nĩ atĩrĩrĩ, ũbatithania wa Johana woimire Igũrũ, kana woimire kũrĩ andũ? Njokeriai.

31Nao magĩĩciria, makĩĩrana atĩrĩ, Tũngĩkiuga atĩ, Woimire Igũrũ, aatũũria, Ningĩ nĩ kĩ kĩagiririe mwĩtĩkie ũhoro wake?

32Na tũngiuga atĩ, Woimire kũrĩ andũ - hau nĩ andũ metigagĩra: nĩ gũkorũo andũ othe nĩmaatuaga kũna atĩ Johana aarĩ mũnabii.

33Magĩgĩcokeria Jesu, makiuga, Tũtiũĩ. Nake Jesu akĩmera, Na niĩ-rĩ, ndimwĩra wathani ũrĩa njĩkaga maũndũ macio naguo.

← Chapter 10 Jump to: Chapter 12 →