Mark 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1MATUKŨ maathiranga, aacoka gũtonya Kaperinaumu rĩngĩ, gũkĩĩranwo atĩ e kuo nyũmba thĩinĩ.

2Andũ magĩkĩũngana aingĩ, gũkĩaga ha gũcoka gũikarũo, o na mũromo-inĩ: nake akĩmahe ũhoro ũrĩa wake.

3Na andũ magĩũka mamũreheire mũndũ wĩ na mũrimũ wa gũkua ciĩga, akuuĩtwo nĩ andũ ana.

4Na maaremwo nĩ gũkinya hakuhĩ nake nĩ ũndũ wa kĩhatĩkano kĩa andũ, magĩtharũria nyũmba igũrũ hau aarĩ; na maarĩkia kũmĩtũrĩkia ihoro, makĩrekarekia kĩbarĩ thĩ, kĩrĩa mũndũ ũcio mũrũaru aakomeire.

5Nake Jesu ona ũrĩa metĩkĩtie, akĩĩra ũcio mũrũaru atĩrĩrĩ Mũriũ, nĩwoherũo mehia maku.

6Na kwarĩ na aandĩki-marũa amwe maikaire kuo magĩĩciragia na ngoro ciao atĩrĩ,

7Nĩ kĩ gĩatũma mũndũ ũyũ oige ũguo? Nĩ kũruma aaruma Ngai. Nũ ũngĩhota kuohanĩra mehia tiga o ũmwe, nĩwe Ngai?

8Nake Jesu, tondũ nĩaamenyaga na roho wake atĩ nĩguo megwĩciria na ngoro ciao, kahinda o kau akĩmoria atĩrĩ, Mũgwĩciria ũguo na ngoro cianyu nĩ ũndũ kĩ?

9Ũndũ ũrĩa ũtarĩ hinya nĩ ũrĩkũ, nĩ kwĩra mũndũ ũyũ mũrũaru, Nĩwoherũo mehia maku; kana nĩ kuuga, Ũkĩra, woe kĩbarĩ gĩaku, wĩtware?

10No nĩguo mũkĩmenye atĩ Mũrũ wa Mũndũ nĩarĩ na hinya gũkũ thĩ wa kuohanĩra mehia (agĩcoka akĩĩra ũcio wĩ na mũrimũ wa gũkua ciĩga),

11Ndakwĩra atĩrĩ, Ũkĩra, woe kĩbarĩ gĩaku, ũinũke gwaku.

12Nake agĩũkĩra, akĩoya kĩbarĩ o rĩmwe, akiuma nja makĩĩonagĩra othe; magĩkĩgegeara othe, makĩgooca Ngai, makiugaga; Kaĩ tũtirĩ twona ũguo-ĩ!

13Na rĩngĩ akiumagara agĩceeranga rũtere-inĩ rũa iria; nakĩo kĩrĩndĩ gĩothe gĩgĩthiĩ kũrĩ we, nake agĩkĩruta ũhoro.

14Na akĩhĩtũka-rĩ, nĩonire mũndũ wetagwo Lawi wa Alufayo aikaire harĩa haarutagĩrũo mbia cia igoti akĩmwĩra atĩrĩ, Nũmĩrĩra. Nake agĩũkĩra akĩmũrũmĩrĩra.

15Ningĩ gũgĩkinya atĩrĩ, nĩ gũikara aaikaire nyũmba ya mũndũ ũcio makĩrĩa irio, nao etia mbia cia igoti o na andũ ehia nĩmaaikaire ho aingĩ hamwe na Jesu na arutwo ake: amu maarĩ aingĩ, na nĩmaamũrũmagĩrĩra.

16Nao aandĩki-marũa a thiritũ ya Afarisai mona akĩrĩa irio hamwe na andũ ehia na arĩa metagia mbia cia igoti, makĩũria arutwo ake atĩrĩ, Anga nĩarĩanagĩra na arĩa metagia mbia cia igoti na andũ ehia, na akanyuanĩra nao?

17Nake Jesu aaigua ũguo akĩmera atĩrĩ, Arĩa agima matibataragio nĩ mũthondekani, no arĩa arũaru: niĩ ndiokire gwĩta arĩa athingu, no arĩa ehia.

18Na rĩrĩ, arutwo a Johana na Afarisai nĩ hĩndĩ mehingĩte kũrĩa irio: na andũ magĩũka makĩmũũria atĩrĩ, Arutwo a Johana o na arutwo a Afarisai mehingaga kũrĩa, na arutwo aku matiĩhingaga nĩ ũndũ kĩ?

19Nake Jesu akĩmera atĩrĩ, Andũ a kĩhikanio-inĩ nĩmangĩhota kwĩhinga kũrĩa irio rĩrĩa mũhikania e nao? Ihinda rĩu rĩothe me na mũhikania matingĩhota kwĩhinga kũrĩa.

20No kwĩ matukũ magoka rĩrĩa mũhikania agathengio kũrĩ o, na hĩndĩ ĩo nĩmakehinga kũrĩa, matukũ macio maakinya.

21Gũtirĩ mũndũ ũngĩrata nguo ngũrũ na ndamĩ ya tama mwerũ: tondũ angĩĩka ũguo, ndamĩ ĩo ĩmĩratĩte yamĩgucia, tama ũcio mwerũ ũgucie ũrĩa mũkũrũ, nguo ĩo no ĩtembũke makĩria.

22Na gũtirĩ mũndũ ũngĩĩkĩra mondo ngũrũ ndibei ya mũhihano: tondũ angĩĩkĩra, ndibei yaya gũtembũra mondo, nayo ndibei o na mondo ciũre: ndibei ya mũhihano nĩ ya gwĩkĩrũo mondo njerũ.

23Ningĩ gũgĩkinya atĩrĩ, nĩ gũthiĩ aathiaga na mũthenya wa thabatũ akagera mĩgũnda-inĩ ya ngano; nao arutwo ake makĩrika gũtua igira cia ngano magĩthiaga.

24Nao Afarisai makĩmwĩra, Ta rora, megwĩka ũrĩa ũtaagĩrĩire gwĩkwo mũthenya wa thabatũ nĩ ũndũ kĩ?

25Nake akĩmoria atĩrĩ, Kaĩ mũtarĩ mwathoma ũrĩa Daudi ekire, rĩrĩa aabataire, akahũta, we na arĩa maarĩ nake?

26Agĩtonya nyũmba ya Ngai rĩrĩa Abiatharu aarĩ mũthĩnjĩri-Ngai ũrĩa mũnene, akĩrĩa mĩgate ĩrĩa yaigagĩrũo Ngai, ĩrĩa ĩtaagĩrĩire kũrĩo nĩ mũndũ tiga o athĩnjĩri-Ngai, o na akĩhe arĩa maarĩ nake?

27Agĩcoka akĩmera atĩrĩrĩ, Mũthenya wa thabatũ wekĩrirũo nĩ ũndũ wa andũ, na ti andũ mekĩrirũo nĩ ũndũ wa mũthenya wa thabatũ:

28gũgagĩtuĩka atĩ Mũrũ wa Mũndũ nĩ mwathani o na wa gwathaga mũthenya wa thabatũ.

← Chapter 1 Jump to: Chapter 3 →