Hosea 1

Kalenjin Bible (BUKUIT NE TILIL)

Jump to: Chapter 2 →

1Ni ng’olyotab Jehovah ne kinyonji Hosea weritab Beri, eng’ betusiekab Usia, Jotam, Ahas, ak Hesekia, che ki laitorinikab Juda, ak eng’ betusiekab Jeroboam weritab Joas, laitoriatab Israel.

2Ye kingong’alale Jehovah Hosea eng’ tai, kolenji Jehovah Hosea, Ui imutyige chepkugoniot koek osotiondeng’ung’, ak lagokab kugoinatet: amu yaei emet kugoinatet ne o, kometoi Jehovah.

3Kiwa anyun kotun Gomer cheptab Diblaim; ak kimanach, ak kisikyi inendet werit.

4Ak kilenji Jehovah inendet, Kuure kainennyi Jesreel; amu tomo ne matia, si kayaakta mugetut agobo gorotikab Jesreel, eng’ gotab Jeu, ak agesu bounatetab gotab Israel.

5Ak tun airie kwangetab Israel eng’ atebwetab Jesreel eng’ betunoto.

6Ak kimanach kogeny, ak kosich chepto. Ak kolenji Jehovah inendet, Kuure kainennyi Lo-ruhama: amu ma arire gotab Israel, anyochini kaat eng’ kiy age tugul.

7Ago arire gotab Juda, ak asorune ichek eutab Jehovah Kamuktaindenywa, amasoru eng’ kwanget, anan eng’ rotwetab chok, anan eng’ luget, anan eng’ mbartanyisiek, anan eng’ bik che lanyei mbartanyisiek.

8Ak kingo kagoluge Lo-ruhama, komanach kogeny, ak kosich werit.

9Ak kile Jehovah, Kuure kainennyi Lo-ami: amu ma o bikyuk, amaegu Kamuktaindeng’wong’.

10Ago tenitu lagokab Israel ng’aniek che bo nyanjet, che magimuchi kirogendoe kiy anan kiit; ak eng’ ole kigimwachine icheget kele, Ma o bikyuk, ko tun kilenjin, O werikab Kamuktaindet ne sobei.

11Ak kiyum lagokab Juda ak lagokab Israel, ak kolewenjigei kandoindet agenge, ak kotogosta eng’ emonoto: amu egu betut ne o betutab Jesreel.

Jump to: Chapter 2 →