Hosea 12

Kalenjin Bible (BUKUIT NE TILIL)

← Chapter 11 Jump to: Chapter 13 →

1Baegei Epraim usonet, ak kosuboti usonetab kong’asis: tesei kotugul lembechek ak ng’emisiet; ak koyomisegei koboto Asuria, ak keib mwanik koba Misri.

2Ibeligei kogeny Jehovah ak Juda, ak kobir Jakobo ko u ortinwekyik; yaakyin inendet ko u boisionikyik.

3Kinam kwariatab ng’etab kamet komi mo; ak kitinyei kimnatet koboto Kamuktaindet ko kagoeet:

4ee, kitinyei kimnatet koterter malaikaiyat, ak kiiterter: kirir, ak kosa inendet: kinyorji inendet Bet-el, ak king’alalwech eng’ oloto;

5inendet Jehovah Kamuktaindet ne bo lugosiek; Jehovah ko kabwatennyi.

6Iweekyige anyun Kamuktaindeng’ung’: rib rirenet ak kiruoget, ak igen Kamuktaindeng’ung’ kotugul.

7Chemung’araindet inendet, mi eunnyi tuguk che kirogendoisie che bo ng’alset: chamei kosastais.

8Ak kimwa Epraim kole, Iman, kaaegu magoriot, kaanyoru magornatet: matun nyoru ichek yaitiet ne ki tengekto, eng’ boisionikyuk tugul.

9Ago a Jehovah Kamuktaindeng’ung’ koboch emetab Misri; taagonin kogeny imeny emaisiek, ko u eng’ betusiekab igorta ne kiging’at.

10Kiang’alalji maotik, ak kiates ng’ang’utik; ak kiaboisie kalewenaik eng’ boisietab maotik.

11Tos tengekto Gilead? Ichek tugul ko tangoita; enyei kirugik eng’ Gilgal: ee, u kapkorosusiekwak karurugutik eng’ mbaret ne ibatat.

12Ak kimwechi Jakobo emetab Aram, ak kiotis Israel agobo osotiot, ak kiiyagis si kobiit konyor osotiot.

13Ak kiimoong’ Jehovah Israel eng’ emetab Misri eng’ maotiot, ak kiribot maotiot inendet.

14Kitagis mising’ Epraim: noto anyun tebe korotikyik inendet, ak koweekyi Kiptaiyandennyi inendet tewernatennyi.

← Chapter 11 Jump to: Chapter 13 →