Hosea 9

Kalenjin Bible (BUKUIT NE TILIL)

← Chapter 8 Jump to: Chapter 10 →

1Amat ibaibaitu, ee Israel, ko u ye boiboitu bororiosiek; amu kiiyaate kugoinatet imete Kamuktaindeng’ung’, ak kiicham tuguk che kigoigoisie eng’ ruanyut age tugul.

2Mabaei ichek ruanyut ne kiborse ak ole kitue sabibuk, ak kobetyi inendet divaik che leelach.

3Mamenyei ichek emetab Jehovah; ago weekyingei Epraim Misri, ak koam amitwogik che ma tililen eng’ Asuria.

4Marong’jin Jehovah kagochinoikab divaik, amaiboiboi inendet: u tiseiywekwak eng’ ichek amitwogikab bik che rirtos; king’waniti ichek tugul che amei: bo amitwogikwak magenywa; magiibu kobwa gotab Jehovah.

5Tos oyae nee eng’ betutab tuiyet ne kiging’at, ak eng’ betutab igortab Jehovah?

6Ogeero, kigoistoegei ng’emisiet, ago iyumi Misri ichek, ak tubei Mempis ichek: bunjin siwek tugukwak che kororon che bo feda: mi katok emaisiekwak.

7Kagoit betusiek che kiitu biret, kagoit betusiek che kiyaaktoisie; naei Israel noto: berber maotiot, amei iywek chito ne tinyei tamirmiriet, amu oindab tengektang’ung’, ak amu o bunyondit.

8Ki ribindet Epraim koboto Kamuktaindennyu: ago ne u maotiot, komi mestetab taritik ortinwekyik tugul, ak komi bunyondit gotab Kamuktaindennyi.

9Kigong’emgei mising’, ko u eng’ betusiekab Gibea: ibwati inendet tengektanywa, iityin biret amu tengekwogikwak.

10Kiageer ale u Israel sabibuk eng’ ong’atet; kiageer kwanisiekwok ale u tongoaniatab mogoiywet eng’ kenyinnyi ne bo tai: ago kibwanji Baal-Peor, kotabanjigei kioto samis, ak koek ichek kit ne kiwechei ko u kioto kichamei ichek.

11Tirireni torornatetab Epraim ko u taritiet: mabiitu sigisiet, ama mi ne chio, anan ne manachi.

12Agot nganda igui lagokwak, agochini kobegune lagok, si mang’et chi: ee, bwa kogeny eng’ ichek ye amete!

13Kigiminji Epraim komasta ne kararan ko u ye kiageer Turo: ago imutyin Epraim lagokyik barindet.

14Igochi, ee Jehovah, tos igochini nee? Igochi moet ne rorogu ak kinaik che yaamnyotin.

15Mi yaitienywa tugul Gilgal; amu kiawech ichek eng’ oloto: aone ichek koba eng’ gonnyu amu yaitietab boisionikwak: ma achame kogeny; bistoik bounikwak tugul.

16Kogibir Epraim, kogoyaam tigitiondenywa, maiyiei logoek: ee, nganda iitos abare kora iyotenywa ne chamat.

17Onei Kamuktaindennyu ichek, amu kima kas it inendet: ak koek bik che ombenioti eng’ bororiosiek.

← Chapter 8 Jump to: Chapter 10 →