Hosea 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Ogas nito, ee okwek tisiik, ak koeb it, okwek gotab Israel, ak ogas komie, ee, gotab laitoriat, amu nyonjinok kiruoget; amu kioegu mestet eng’ Mispa, ak mestet ne u regereiywot ne kiitoi eng’ Tabor.

2Kigotes mising’ bistoik barisiet; ago agere kong’ ichek tugul.

3Angen Epraim, ama ung’at Israel eng’ ane: amu koiyai kugoinatet inye, ee, Epraim, kigong’wanit Israel.

4Machamjin ichek boisionikwak koweekyigei Kamuktaindenywa: amu tinyei tamirmirietab kugoinatet, amaingen Jehovah.

5Ak baoriani menotetab Israel eng’ tainnyi: ibutos anyun Israel ak Epraim eng’ tengektanywa; ibuti Juda agine koboto ichek.

6Bendi ichek koboto akwotisiekwak che bo kechirek ak che bo tuga, kocheng’ei Jehovah; ago manyoru inendet: kigoistoegei inendet ichek.

7Kigoberber Jehovah; amu kigosich lagok che kipsagarek; amei arawet ne kaleel ichek koboto mbarenikwak.

8Oguut igondit eng’ Gibea, ak oguut iriaget eng’ Rama: owaach eng’ Bet-aben; eng’ ole bo let eng’ inye, ee Benjamin.

9Egu karatia Epraim eng’ betutab keretab kong’: kiaboru eng’ kwenutab bororiosiekab Israel kit ne tun biitu.

10U bounikab Juda bik che inaktoe kiwotet: arong’jini ichek neregekyuk ko u beek.

11Kisastoe Epraim, kitiekyin ng’ony eng’ kiruoget; amu kichamei kosub ng’atutiet.

12A u anyun eng’ Epraim kiptorotiot, ak a u nunatet eng’ gotab Juda.

13Kigogeer Epraim miandanyi, ak kogeer Juda ng’otobosiekyik, kwo anyun Epraim Asuria, ak koyokto keguur laitoriat Jareb: ago maimuchi kosoobok, amainyaiywok ng’otobosiekwok.

14Amu aigeitu ng’etundo eng’ Epraim, ak aigeitu ng’etundo ne neran eng’ gotab Juda: agereri anendet ak awe; amuti, ama biitu chi ne soru.

15Aweekyinige anyun oldanyu, agoi kong’any chalwoktanywa, ak kocheng’a: cheng’a eng’ kagiiletab ge eng’ nyalildanywa.

← Chapter 4 Jump to: Chapter 6 →