Hosea 11

Kalenjin Bible (BUKUIT NE TILIL)

← Chapter 10 Jump to: Chapter 12 →

1Kiachame Israel ko ta ko ming’in, ak kiaguur werinnyu komong’ eng’ Misri.

2Kingoguur ichek bichoto, kotes koistoegei: kieng’ji Baalik, ak kibeelji nyamdutik kanamonik che kigiwai.

3Ago kianet Epraim kowendot; kiaganabate eng’ eunekyuk; ago kima nai kole kiasoobi ichek.

4Kiachuutune ichek boroonikab chi, koboto rogoonikab chamnyet; ak kia u eng’ ichek icheget che istoi chogit eng’ tagilgilikwak, ak kiande amitwogik tainywa.

5Maweekyingei inendet emetab Misri; ago egu Asuriaindet laitoriandennyi, amu kiesio ichek koweeigei.

6Ak kobutyi rotwetab chok nganasokyik, ak koges temeleiywekyik, ak koam ichek, amu kiruogutikwak.

7Kagobegechi bikyuk kochuchuigei kometa: agot ngo kuurso ichek koguurji ichek inendet ne mi barak, ko mabiitu ne itorori inendet.

8Amuktoi ano ameten, inye Epraim? Amuktoi ano asorun, inye Israel? Amuktoi ano ayain iige Adma? Amuktoi ano ayain iige Seboim? Kagowalak muguleldanyu, kagorira mo.

9Mayae koromnatetab neregekyuk, maweeksei ang’eme Epraim: amu a Kamuktaindet, ma a chi; Inendet ne Tilil ne mi kwenung’ung’: machute nganaset.

10Bendoti ichek kosuboti Jehovah, ne boriseni ko u ng’etundo: amu boriseni inendet, ak kobwa lagok kobotanionu kobunu cherongo.

11Bwanei kobotanionu ko u taritiet ne mong’une Misri, ak ko u cheptuget ne mong’une emetab Asuria: ak agochi ichek komeny gorikwak, mwaei Jehovah.

12Yiemena Epraim lembechek, koyiemena gotab Israel ng’alset: ago bounisiei Juda kora koboto Kamuktaindet, ak koyanat eng’ Inendet ne Tilil.

← Chapter 10 Jump to: Chapter 12 →