Hosea 4

Kalenjin Bible (BUKUIT NE TILIL)

← Chapter 3 Jump to: Chapter 5 →

1Ogas ng’olyotab Jehovah, okwek lagokab Israel: amu ting’e Jehovah ng’olyot bik che menyei emet, amu mamitei imanit, anan rirenet, anan naet ne bo Kamuktaindet eng’ emet.

2Mami kit age kobate chubisiet ak lembechek, ak rumisiet, ak chorset, ak ibetab ge; tesoksei, ak isubegei rumisiet.

3Rirei anyun emet, ak nyaluli age tugul ne menyei oloto, koboto tiong’ikab timin ak taritikab barak; ee, kiistoi agichek njirenikab nyanjet.

4Ago amat kotiiyo chi eng’ choto, anan koger kong’; amu u biguk ichek che ibeligei ak tisiindet.

5Ago ibuti bet, ak obutosi koboto maotiot kemoi; ak abar komet.

6Kigeng’em bikyuk amu matinyei naet: amu kiiesie naet, aesioin agane, si ma iegu tisiindet eng’ ane: amu kiiutie ng’atutikab Kamuktaindeng’ung’, autie agane lagoguk.

7Ko u ye kitesak, ko u noto kitesak koyaiywa tengekto; awale torornatenywa koek tewernatet.

8Baegei ichek tengektab bikyuk, ak koboiboitune yaitienywa.

9Ak kit ne u eng’ bik, ko u noto eng’ tisiindet: ak abire ichek amu ortinwekwak, ak ayaakyi boisionikwak.

10Ak koamisiei, ama biyong’dos; yaei kugoinatet, ama tesoksei: amu kigometa koepchi it Jehovah.

11Istoi kugoinatet ak divaik ak divaik che leelach, kaguiyet.

12Somei bikyuk kiruoget eng’ ketik, iborjin ichek siarinywa: amu kiimaas ichek tamirmirietab kugoinatet, ak kigoba koyai kugoinatet, kometo Kamuktaindenywa.

13Enyei tiseiywek eng’ tulonok barak, ak kobeelei nyamdutik eng’ tulonok, eng’ kelutab ketik, ak ketik alak che u siliboik, ak ketik alak che ter, amu mie uruenywa: yaei anyun tibikwok kugoinatet, ak koyai murerenikwok ibetab ge.

14Mabire tibikwok ye yaei kugoinatet, anan murerenikwok ye yaei ibetab ge; amu mastoi icheget koboto che yaei kugoinatet, ak koenyei tiseiywek koboto chepkugonik: ak kobutyo bik che maiguitos.

15Agot ngiyae inye Israel kugoinatet, ko mat koyai Juda; amobwa Gilgal, anan otogoste Bet-aben, anan oyosie ole, Ko u ye sobei Jehovah.

16Amu kigongelel Israel, ko u roriat ne uui met; baei Jehovah anyun ichek ko u aruetab kechir eng’ ole baraa.

17Kigonamgei Epraim ak kanamonik; bagakte inegei.

18Kigomindililitu tugukwak che eei: yaei kugoinatet kotugul; chamei bounikyik tewernatet mising’.

19Kagotuch usonet inendet eng’ kebebaikyik; ak ililandos amu tisieywekwak.

← Chapter 3 Jump to: Chapter 5 →