Revelation 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Ak kiageer malaikaiyat age ne kim kochorugei eng’ kipsengwet, kolaachi boldet; ak kimi chemng’isiriet metinnyi, ak ki u togennyi asista, ak ki u kelyekyik tolochikab mat;

2ak kitinyei eng’ eunnyi bukuit ne ming’in ne yatat: ak kiinde keldanyi ne bo tai nyanjet, ak kiinde ne bo katam emet;

3ak kitwek eng’ kutit ne o, ko u ye morori ng’etundo: ak ye kingo kagotwek, kobolyo tulosiek tisabu.

4Ak ye kingo kagobolyo tulosiek tisabu, amach asir: ak kiagas kutit ne bunu kipsengwet kole, Ng’och tuguk che kamwa tulosiek tisabu, amesir.

5Ak kinamji barak eunnyi ne bo tai kotokyi kipsengwet malaikaiyat ne kiageer kotonone nyanjet ak emet,

6ak kiiyosio eng’ inendet ne sobei koigeny ak koigeny, ne kitau koyaei kipsengwet ak tuguk che mitei oloto, ak ng’ony ak tuguk che mi oloto, ak nyanjet ak tuguk che mi orit, kole ma komi kagaetab ge:

7ago eng’ betusiekab kutitab malaikaiyatab tisab, ye tun machei koguut, kogesgei ung’otietab Jehovah ko u logoiywek che miachen che kimwachi otwogikyik maotik.

8Ak kutit ne kiagas kobunu kipsengwet, ko king’alalwa kogeny, kole, Ui nam bukuit ne yatat eng’ eutab malaikaiyat ne tononi eng’ nyanjet ak eng’ ng’ony.

9Awe anyun ole mi malaikaiyat, ak alenji kogona bukuinoto ming’in. Ak kolenja, Nam ak iam; si kogochi kong’wanit moeng’ung’, ago anyinyitu eng’ kuting’ung’ ko u kumiat.

10Ak kianam bukuit ne ming’in eng’ eutab malaikaiyat, ak aam; ak ki anyiny eng’ kutinnyu ko u kumiat: ak kingo kaam, kong’wanit moennyu.

11Ak komwawa, kole, Kanyol imaoten agobo bik che chang’ ak bororiosiek ak kutuswek ak laitorinik.

← Chapter 9 Jump to: Chapter 11 →