Revelation 8

Kalenjin Bible (BUKUIT NE TILIL)

← Chapter 7 Jump to: Chapter 9 →

1Ak ye kingoyat ng’okset ne bo tisab, kosis kipsengwet olo bo kebebertab sait.

2Ak kiageer malaikaisiek tisab che kitonondos eng’ taitab Jehovah; ak kigigochi iriagok tisab.

3Ak kinyo malaikaiyat age konyo kotonone ole bo kapkorosut, kotinyei teret ne bo tahabu; ne kibeele nyamdutik; ak kigigochi nyamdutik che chang’ che kibeelei, si kotese sautikab che tililen tugul eng’ kapkorosutab tahabu, ne kimi taitab ng’echeretab laitornatet.

4Ak kitogosta iyetab nyamdutik che kibeelei, koboto sautikab bik che tililen, eng’ taitab Jehovah eng’ eutab malaikaiyat.

5Ak kiib malaikaiyat teronoto; ak konde matab kapkoros konyi, ak kowirji ng’ony: ak kibiit tulosiek, ak kutuswek ak kalyelosiek, ak botanetab ng’ony.

6Ak kochopgei malaikaisiek tisabu che kitinyei iriagok tisab si koguut.

7Ak kiguut malaikaiyat ne bo tai, ak kibiit koikab ropta ak mat, che burugotin ak korotik, ak kigiwirji ng’ony: ak kilal kebeberta agenge eng’ somok ne bo ng’ony, ak kilal kebeberta agenge eng’ somok ne bo ketik, ak kilalyo suswek tugul che tuonen.

8Ak kiguut malaikaiyatab aeng’, ak kigiwirji nyanjet kit ne u tulwet ne o kolalei: ak kiek korotik kebeberta agenge eng’ somok ne bo nyanjet:

9ak kime kebeberta agenge eng’ somok ne bo tiong’ik che kimi nyanjet, che kisoptos; ak kiging’em kebeberta agenge eng’ somok ne bo melisiek.

10Ak kiguut malaikaiyatab somok, ak kirorok kecheiyat ne o eng’ kipsengwet, kolalei ko u tait, ak kiibutyi kebeberta agenge eng’ somok ne bo ainosiek, ak kondametusiekab beek;

11ak kigiguure kainetab kecheiyandanato Ng’wanindo: ak king’wanit kebeberta agenge eng’ somok ne bo beek, ak kibek bik che chang’ eng’ beechoto, amu kiga kiyai kong’wonegitu.

12Ak kiguut malaikaiyatab ang’wan, ak kigikwer kebeberta agenge eng’ somok ne bo asista, ak kebeberta agenge eng’ somok ne bo arawet, ak kebeberta agenge eng’ somok ne bo kecheik; si koimenit kebeberta agenge eng’ somok ne bo tuguchoto, ama iluu betut eng’ kebeberta agenge eng’ somok, ak koigei noto agine kemout.

13Ak kiageer kipsichit kotirireni eng’ kwenutab kipsengwet, ak agas, kolen eng’ kutit ne o, Bwa, bwa, bwa agobo ichek che menyei ng’ony, amu cheosiek alak che bo iriagok che bo malaikaisiek somok che ta koguutei!

← Chapter 7 Jump to: Chapter 9 →