Revelation 19

Kalenjin Bible (BUKUIT NE TILIL)

← Chapter 18 Jump to: Chapter 20 →

1Kingobata tuguchu, agas kit ne u kutit ne o ne bo tuiyet ne o eng’ kipsengwet, kole, Haleluya. Bo Jehovah nenyo yetunet, torornatet, ak kamuktaet;

2amu bo iman ak ko bo imanda kiruogutikyik; amu kagoruokyi chepkugoniot ne o, ne kiimuruon ng’ony eng’ soksennyi, ak kagoyaakta mugetut ne bo korotikab otwogikyik eng’ eutab kwonyoto.

3Ak kimwa kogeny ne bo aeng’ kole, Haleluya. Ak togostoi iyetanyi koigeny ak koigeny.

4Ak kiibutyi ng’ony boisiek tiptemu ak ang’wan che soptos ak kolos Jehovah ne tebe ng’echeretab laitornatet, komwaei kolen, Amen; Haleluya.

5Ak kimong’ kutit eng’ ng’echeretab laitornatet, kole, Olosu Jehovah nenyo, okwek tugul otwogikyik che oiywei inendet, che mengechen ak che eechen.

6Ak kiagas kit ne u kutitab tuiyet ne o, ak ko u cheetab beek che chang’, ak ko u cheetab tulosiek che kimen, kole, Haleluya: amu laitorani Kiptaiyat Jehovah nenyo, Kamuktaindet.

7Ongeboiboitu ak kigasge mising’, ak kigochi torornatet inendet: amu kagoit katunisietab Aruet, ak kagochopgei osotiondennyi.

8Ak kigigochi inendet kolaach gei eng’ katanit ne kararan, ne leel kot ak ko tilil; amu katanit ne kararan ko boisionikab imanda che bo bik che tililen.

9Ak kolenja, Sir ile, Boiboen ichek che keguurjin igortab katunisietab Aruet. Ak kilenja, Chu ko ng’alekab iman che bo Jehovah.

10Ak kiabutyi kelyekyik alosu inendet. Ak kolenja, Ameyai ko u noto: ki otwogik tuwai koboto tupchosieguk che tinyei baornatet ne bo Jesu. Ilosu Jehovah: amu baornatetab Jesu ko tamirmirietab maoinatet.

11Ak kiageer koyatak kipsengwet, ak ogeero, mbartanyit ne leel, ak inendet ne kitebe, ko kigiguure Ne Kiyani ak ko Iman; ak koruochi ak koyaei luget eng’ imanda.

12Ak ki u konyekyik liblibenetab mat, ak kimi metinnyi nariosiek che chang’; ak kotinyei kainet ne kigisir, ne mami chi ne ingen kobate inendet inegei.

13Ak kiilaachi ngoriet ne kigirong’ji korotik: ak kiguure kainennyi NG’OLYOTAB JEHOVAH.

14Ak kiisubi inendet lugosiek che mi kipsengwet che lanyei mbartanyisiek che leelach, kolaachi katanisiek che kororon che leelach kot ak ko tililen.

15Ak kimong’une kutinnyi rotwetab chok ne ng’atib, si kobiit kobire bororiosiek: ak koboi ichek eng’ kiroktab karnet: ak kotiech sabibuk eng’ ole kituisie che bo koromnatet ne bo neregekab Jehovah ne bo Kamuktaet.

16Ak kotinyei eng’ ngoriennyi ak eng’ kubestanyi kainet ne kigisir kole, LAITORIAT NE BO LAITORINIK, AK KIPTAIYAT NE BO KIPTAINIK.

17Ak kiageer malaikaiyat kotononi eng’ asista; ak kiwaach eng’ kutit ne o, kolenji taritik tugul che tirirendos eng’ kwenutab kipsengwet, Obwa otuiyechi igorta ne o ne bo Jehovah;

18si kobiit oam borwekab laitorinik, ak borwekab kiptainikab luget, ak borwekab bik che kimen, ak borwekab mbartanyisiek ak che bo che lanyei ichek, ak borwekab bik tugul, che itiagotin ak che ratotin, ak che mengechen ak che eechen.

19Ak kiageer tiondo, ak laitorinikab ng’ony, ak lugosiekwak, ko kaiyomogei koyai luget ak inendet ne kiga tebe mbartanyit, ak lugennyi.

20Ak kiginam tiondo, koboto maotiondonoto ki bo lembech ne kiyaei kaborunoik eng’ tainnyi, ne kiiberberi che kiga kinde berutietab tiondo, ak ichek che kiilosu kanamwennyi: kigiwirji choto tuwai kosoptos araraita ne bo mat ne lalei eng’ koik che laldos:

21ak kigibar ichek che king’et eng’ rotwetab chok ne kimong’une kutitab inendet ne kitebe mbartanyit, ak kibiyong’so taritik tugul eng’ borwekwak.

← Chapter 18 Jump to: Chapter 20 →