Revelation 17

Kalenjin Bible (BUKUIT NE TILIL)

← Chapter 16 Jump to: Chapter 18 →

1Ak kinyo age eng’ malaikaisiechato tisab che kitinyei tabok tisab, ak konyo kong’alalwa, kole, Nyo yu, si aborun kiruogetab chepkugoniot ne o ne tebe beek che chang’;

2ne kiyai sokset laitorinikab ng’ony ak inendet, ak kibogityo ichek che menyei ng’ony, eng’ divaikab soksennyi.

3Ak kiimuta eng’ Tamirmiriet agoi surkwen: ak kiageer kobogoriot kotebe tiondo ne birir, ne nyiitat kainaikab chubisiet, ne tinyei metowek tisab ak kuinoik taman.

4Ak kiilaachi kobogoriot ngoroik che arusen ne birir ak che biriren, ak kigilelesonjine tahabu ak koik che bo kamanutiet ne o mising’ ak sonoek che kororon, ak kotinyei eng’ eunnyi kikombet ne bo tahabu ne nyiitat tuguk che kiwechei, tugukab simdo che bo soksennyi,

5ak kigisirji togennyi kainet kele, UNG’OTIET, BABULON NE O, KAMETAB CHEPKUGONIK AK NE BO TUGUK CHE KIWECHEI CHE BO NG’ONY.

6Ak kiageer kwonyoto ko kagobogit eng’ korotikab bik che tililen, ak eng’ korotikab baorinikab Jesu. Ak ye kingageer inendet, akwong’ eng’ kwong’et ne o.

7Ak kilenja malaikaiyat, Kekwong’ amu nee? Amache amwaun ung’otietab kwonyito ak ne bo tiondo ne keseni inendet, ne tinyei metowek tisab ak kuinoik taman.

8Tionyi kegeere komi, ama komi; ak ko negit komong’ eng’ keringet ne maigoksei, ak kwo luset. Ak kwong’dos ichek che menyei ng’ony, che kima kisirji kainaikwak bukuitab sobondo koboch ngab kelumda ng’ony, ye keer tiondo, amu kimi, ama komi, ak kota konyonei.

9Mi yu kaguiyet ne bo ng’omnatet. Metowechoto tisab ko tulonok tisab, che tebe kwonyoto:

10ak choto ko laitorinik tisab; kogobutyo mutu, mitei agenge, tomo konyo age; ak ye nyo, konyoljin koteb ne matia.

11Ak tionyoto kimi, ama komi, inendet ko ne bo sisiit, ak ta ko agenge eng’ chun tisab; ak kowendi luset.

12Ak kuinoichoto taman che kegeer ko laitorinik taman che tom konam bounatet; ak konyoru kimnatet ko u laitorinik, koboto tiondo, eng’ boroindab sait agenge.

13Tinyei chuto kabwatet agenge, ak kogochin ichek kamugenywa tiondo ak kimnatenywa.

14Baregei chuto ak Aruet ak koterter Aruet ichek, amu inendet ko Kiptaiyatab kiptainik, ak ko Laitoriatab laitorinik; ak icheget che mi koboto inendet, che kigiguur ak che kigilewen ak che kiyani.

15Ak kilenja, Beechu kegeere, che katebe chepkugoniot, ko bik, ak tuiyosiek, ak bororiosiek, ak kutuswek.

16Ak kuinoichu kegeere taman, ak tiondo, ko tun wechei chepkugoniot, ak kometo kotebi inegei, komi ach ngor, ak koam banyekyik, ak kobeel inendet eng’ mat kogesgei.

17Amu kiinde Jehovah mugulelwekwak koyai ko u ye ibwati, ak kosich tugul kabwatet agenge, ak kogochi tiondo bounatenywa, agoi kosulda ng’alekab Jehovah.

18Ak kwonyi kegeere ko nganaset ne o, ne bou laitorinikab ng’ony.

← Chapter 16 Jump to: Chapter 18 →