Revelation 15

Kalenjin Bible (BUKUIT NE TILIL)

← Chapter 14 Jump to: Chapter 16 →

1Ak kiageer kaborunet age eng’ kipsengwet, ne o ak ko bo kwong’et, malaikaisiek tisab che tinyei korotwek tisab che bo let, amu kigesune choto neregekab Jehovah.

2Ak kiageer kit ne u nyanjetab glasit ne burugot ak mat; ak icheget che kigoterter tionyoto ak kanamwennyi, ak koitetab kainennyi, kotonondos eng’ ye negite nyanjetab glasit, che tinyei ketubosiekab Jehovah.

3Ak kotieni ichek tiendab Musa otwogindetab Jehovah, ak tiendab Aruet, kolen, Eechen boisioniguk ak ko bo kwong’et, ee, Kiptaiyat Jehovah, Kamuktaindet; bo imanda ak ko bo iman ortinweguk, inye Laitoriatab bororiosiek.

4Ng’o ne maiywei kaineng’ung’, ak kotorori, ee Kiptaiyat? Amu i tilil inyege; amu bwanei bororiosiek tugul kogutung’so eng’ taing’ung’; amu kagong’ang’ak boisioniguk che bo imanda.

5Ak kingobata tuguchu, ageer, ak kigiyat hekalut ne bo emaitab baornatet eng’ kipsengwet:

6ak kimong’une hekalunato malaikaisiek tisabu che tinyei korotwechoto tisab, kolaachi ngoroik che tililen, ak kolile bich, ak koratatagei birenoikab tahabu eng’ tegetikwak.

7Ak kiigochi age eng’ tiong’ik ang’wan che soptos malaikaisiek tisab tabok tisab che bo tahabu che nyiitotin neregekab Jehovah, inendet ne sobei koigeny ak koigeny.

8Ak kinyi hekalut iyeto ne kibunu torornatetab Jehovah, ak kamuktaennyi; ak kima imuch chi kwo hekalut orit, agoi kogesgei korotwek tisabu che bo malaikaisiek tisab.

← Chapter 14 Jump to: Chapter 16 →