1 Chronicles 28

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 27 Jump to: Chapter 29 →

1គ្រានោះ ព្រះបាទដាវីឌប្រមូលពួកអ្នកដែលជាប្រធានក្នុងសាសន៍អ៊ីស្រា‌អែល ពួកចៅ‌ហ្វាយនៃកុល‌សម្ព័ន្ធទាំងប៉ុន្មាន ពួកនាយដែលត្រួតលើពួកអ្នកផ្គត់‌ផ្គង់ស្បៀងថ្វាយស្តេចតាមវេន ពួកមេទ័ពធំតូច ពួកអ្នកដែលត្រួតលើព្រះរាជ្យទ្រព្យរបស់ស្តេច និងពួកបុត្រាទ្រង់ទាំងប៉ុន្មាន និងពួកឧកញ៉ា គឺជាពួកខ្លាំងពូកែ មានចិត្តក្លាហានទាំងអស់មកប្រជុំគ្នានៅក្រុងយេរូ‌សាឡិម

2រួចព្រះបាទដាវីឌក្រោកឈរឡើង មានរាជ‌ឱង្ការថា៖ «ឱបង‌ប្អូន ជាប្រជា‌រាស្ត្ររបស់យើងអើយ ចូរស្តាប់ចុះ ឯយើងបានមានបំណង ចង់ស្អាងព្រះ‌វិហារ សម្រាប់ឲ្យហិបនៃសេចក្ដីសញ្ញារបស់ព្រះ‌យេហូវ៉ាបានសម្រាកនៅ ហើយទុកជាទីកំណល់កល់ព្រះបាទរបស់ព្រះនៃយើងរាល់គ្នា យើងក៏បានត្រៀមទុកសម្រាប់ការស្អាងនោះដែរ

3តែព្រះ‌ទ្រង់មានព្រះ‌បន្ទូលមកយើងថា "ឯងមិនត្រូវស្អាងព្រះ‌វិហារ សម្រាប់ឈ្មោះយើងឡើយ ដ្បិតឯងជាមនុស្សធ្លាប់ធ្វើចម្បាំងមក ហើយបានកម្ចាយឈាមផង"។

4ប៉ុន្តែ ព្រះ‌យេហូវ៉ា ជាព្រះនៃសាសន៍អ៊ីស្រា‌អែល ព្រះ‌អង្គបានរើសយើងចេញពីពួកវង្សរបស់បិតាយើងទាំងប៉ុន្មាន ឲ្យបានធ្វើជាស្តេចលើពួកអ៊ីស្រា‌អែលជាដរាបទៅ ដ្បិតព្រះ‌អង្គបានរើសពួកយូដាទុកជាមេ ហើយក្នុងពួកវង្សយូដា ព្រះ‌អង្គបានរើសយកវង្សរបស់បិតាយើង ហើយក្នុងពួកបុត្ររបស់បិតាយើង ព្រះ‌អង្គបានសព្វព្រះ‌ហឫ‌ទ័យនឹងយើង ដើម្បីលើកឡើងជាស្តេចលើសាសន៍អ៊ីស្រា‌អែលទាំងអស់

5ហើយក្នុងពួកបុត្រយើងទាំងប៉ុន្មាន (ដ្បិតព្រះ‌យេហូវ៉ាបានប្រោស ឲ្យយើងបានបុត្រជាច្រើន) ព្រះ‌អង្គបានរើសសាឡូម៉ូន ជាបុត្រយើង ឲ្យបានគង់លើបល្ល័ង្ក‌រាជ្យនៃព្រះ‌យេហូវ៉ា ដើម្បីគ្រប់‌គ្រងលើសាសន៍អ៊ីស្រា‌អែល

6ព្រះ‌អង្គមានព្រះ‌បន្ទូលមកយើងថា "សាឡូម៉ូន ជាកូនឯងនឹងស្អាងព្រះ‌វិហារ ព្រមទាំងទីលានឲ្យយើង ដ្បិតយើងបានរើសគេ ឲ្យបានធ្វើជាកូនយើង ហើយយើងនឹងធ្វើជាឪពុកដល់គេ។

7យើងនឹងតាំងរាជ្យឲ្យនៅជាប់ជា‌និច្ចទៅ គឺបើគេកាន់ខ្ជាប់តាមក្រឹត្យ‌ក្រម និងបញ្ញត្តិទាំងប៉ុន្មានរបស់យើង ដូចជាសព្វថ្ងៃនេះ"។

8ឥឡូវនេះ អ្នករាល់គ្នានៅចំពោះពួកអ៊ីស្រា‌អែលទាំងអម្បាល‌ម៉ាន ជាក្រុមជំនុំនៃព្រះ‌យេហូវ៉ា ហើយនៅចំពោះព្រះនៃយើងរាល់គ្នា ដូច្នេះ ចូរអ្នករាល់គ្នាស្វែងរក ហើយកាន់តាមអស់ទាំងក្រឹត្យ‌ក្រមនៃព្រះ‌យេហូវ៉ា ជាព្រះនៃអ្នករាល់គ្នាចុះ ដើម្បីឲ្យបានស្រុកល្អនេះ ទុកជាកេរ‌អាករនៃអ្នករាល់គ្នា ហើយទុកជាមត៌កដល់កូនចៅអ្នករាល់គ្នាខាងក្រោយតទៅ។

9ឯឯង ឱសាឡូម៉ូន ជាកូនអើយ ចូរឲ្យឯងបានស្គាល់ព្រះនៃឪពុកឯងចុះ ព្រមទាំងប្រតិ‌បត្តិតាមព្រះ‌អង្គ ដោយអស់ពីចិត្ត ហើយស្ម័គ្រស្មោះផង ដ្បិតព្រះ‌យេហូវ៉ាស្ទង់អស់ទាំងចិត្ត ក៏យល់អស់ទាំងសេចក្ដីដែលយើងគិតដែរ បើឯងរកព្រះ‌អង្គ នោះនឹងបានឃើញមែន តែបើឯងបោះ‌បង់ចោលព្រះ‌អង្គវិញ ព្រះ‌អង្គក៏នឹងបោះ‌បង់ចោលឯងជាដរាបទៅ

10ឥឡូវនេះ ចូរឯងប្រុងប្រយ័ត្ន ដ្បិតព្រះ‌យេហូវ៉ាបានរើសឯង ឲ្យបានស្អាងព្រះ‌វិហារ ទុកជាទីបរិសុទ្ធ ដូច្នេះ ចូរឯងមានកម្លាំងឡើង ហើយធ្វើសម្រេចចុះ»។

11នោះដាវីឌក៏ប្រគល់គំរូនៃរបស់ទាំងប៉ុន្មាន ដល់សាឡូម៉ូន ជាបុត្រទ្រង់ គឺជាគំរូនៃថែវ មន្ទីរទាំងប៉ុន្មាន ឃ្លាំង បន្ទប់ខាងលើ បន្ទប់ខាងក្នុង និងកន្លែងដាក់ទីសន្តោសប្រោស

12ហើយនឹងគំរូនៃរបស់ទាំងប៉ុន្មានដែលទ្រង់បានដោយព្រះ‌វិញ្ញាណ សម្រាប់ទីលានរបស់ព្រះ‌ដំណាក់របស់ព្រះ‌យេហូវ៉ា អស់ទាំងបន្ទប់នៅជុំ‌វិញ ដែលសម្រាប់ជាឃ្លាំងរបស់ព្រះ‌ដំណាក់នៃព្រះ និងឃ្លាំងនៃតង្វាយបរិសុទ្ធទាំងប៉ុន្មាន

13ហើយសម្រាប់វេនពួកសង្ឃ និងពួកលេវី ហើយសម្រាប់កិច្ច‌ការនៃការ‌ងារទាំងអស់ ក្នុងព្រះ‌វិហាររបស់ព្រះ‌យេហូវ៉ា ព្រមទាំងគ្រឿងប្រដាប់ដែលប្រើក្នុងព្រះ‌វិហាររបស់ព្រះ‌យេហូវ៉ា

14ព្រះបាទដាវីឌក៏ប្រគល់គំរូនៃប្រដាប់ដែលត្រូវធ្វើពីមាសសម្រាប់ប្រើគ្រប់យ៉ាង ព្រមទាំងទម្ងន់នៃប្រដាប់នីមួយៗនោះ និងគំរូនៃប្រដាប់ ដែលត្រូវធ្វើពីប្រាក់សម្រាប់ប្រើគ្រប់យ៉ាង ព្រមទាំងទម្ងន់នៃប្រដាប់នីមួយៗនោះដែរ

15គឺកំណត់ទម្ងន់មាស សម្រាប់ធ្វើជើងចង្កៀងមាស និងតួចង្កៀងនោះ គឺជាទម្ងន់ជើងចង្កៀងនីមួយៗ និងតួចង្កៀងនីមួយៗ ហើយកំណត់ទម្ងន់ប្រាក់ សម្រាប់ធ្វើជើងចង្កៀងប្រាក់ ទាំងជើង និងតួចង្កៀងនោះផង តាមរបៀបប្រើជើងចង្កៀងនីមួយៗនោះ

16ហើយមាសសម្រាប់ធ្វើតុនំបុ័ងតាំងទុក និងប្រាក់សម្រាប់អស់ទាំងតុធ្វើពីប្រាក់ដែរ

17ព្រមទាំងសម ចានគោម និងពែងដែលធ្វើពីមាសសុទ្ធ និងផ្តិលមាស តាមទម្ងន់នីមួយៗ ហើយផ្តិលប្រាក់ទាំងប៉ុន្មានតាមទម្ងន់

18និងមាសសុទ្ធសម្រាប់អាស‌នាគ្រឿងក្រអូបតាមទម្ងន់ផង ទ្រង់ក៏ប្រគល់គំរូ ដែលសម្រាប់ធ្វើរទេះ និងចេរូ‌ប៊ីម ដែលត្រដាងស្លាបគ្របពីលើហិបនៃសេចក្ដីសញ្ញារបស់ព្រះ‌យេហូវ៉ាដែរ។

19ព្រះបាទដាវីឌមានរាជ‌ឱង្ការថា៖ «ទាំងនេះ គឺបានកត់ត្រាទុកដោយព្រះ‌ហស្តព្រះ‌យេហូវ៉ា ឲ្យយើងបានយល់ហើយ គឺអស់ទាំងរបៀបនៃគំរូទាំងនេះ»។

20ព្រះបាទដាវីឌមានរាជ‌ឱង្ការទៅសាឡូម៉ូនជាបុត្រាថា៖ «ចូរមានកម្លាំង និងចិត្តក្លាហានឡើង ហើយធ្វើសម្រេចចុះ កុំខ្លាច ឬរសាយចិត្តឡើយ ដ្បិតព្រះ‌យេហូវ៉ាដ៏ជាព្រះ គឺជាព្រះនៃយើង ព្រះ‌អង្គគង់នៅជា‌មួយឯង ព្រះ‌អង្គមិនដែលខាននឹងជួយឯងឡើយ ក៏មិនបោះ‌បង់ចោលឯងដែរ ដរាបដល់ធ្វើព្រះ‌វិហាររបស់ព្រះ‌យេហូវ៉ានេះបានសម្រេច។

21មានវេនពួកសង្ឃ និងពួកលេវី សម្រាប់គ្រប់ទាំងការ‌ងារក្នុងព្រះ‌ដំណាក់នៃព្រះដែរ ឯអស់អ្នកណាដែលស្ម័គ្រចិត្ត ហើយមានថ្វីដៃខាងការអ្វីក៏ដោយ គេនៅជា‌មួយឯង ដើម្បីនឹងសម្រេចការនេះ។ ចំណែកពួកចៅ‌ហ្វាយ និងប្រជាជនទាំងអស់គ្នានឹងនៅក្នុងបង្គាប់ឯងដែរ»។

← Chapter 27 Jump to: Chapter 29 →