Judges 2

Khmer (ព្រះគម្ពីរបរិសុទ្ធកែសម្រួល ២០១៦)

← Chapter 1 Jump to: Chapter 3 →

1នៅគ្រានោះ ទេវតារបស់ព្រះ‌យេហូវ៉ាបានឡើងពីគីល‌កាលទៅបូគីម ហើយពោលថា៖ «យើងបានយកអ្នករាល់គ្នាឡើងចេញពីស្រុកអេស៊ីព្ទមក ហើយបាននាំចូលមកក្នុងស្រុកដែលយើងបានស្បថថា នឹងឲ្យដល់បុព្វ‌បុរសរបស់អ្នករាល់គ្នា។ យើងបានប្រាប់ថា "យើងនឹងមិនក្បត់សេចក្ដីសញ្ញារបស់យើងចំពោះអ្នករាល់គ្នាឡើយ ។

2រីឯអ្នករាល់គ្នាវិញ មិនត្រូវតាំងសញ្ញានឹងពួកអ្នកស្រុកនេះឡើយ គឺត្រូវរំលំអស់ទាំងអាសនារបស់គេចេញ" ។ ប៉ុន្ដែ អ្នករាល់គ្នាមិនបានស្តាប់តាមបង្គាប់យើងសោះ។ ហេតុអ្វីបានជាអ្នករាល់គ្នាប្រព្រឹត្តដូច្នេះ?

3ដូច្នេះ យើងសុំប្រាប់ឥឡូវនេះថា យើងមិនបណ្តេញគេចេញពីមុខអ្នករាល់គ្នាឡើយ គឺគេនឹងក្លាយជាបន្លាចាក់នៅចំហៀងអ្នករាល់គ្នាវិញ ហើយព្រះទាំងប៉ុន្មានរបស់គេ នឹងបានជាអន្ទាក់ដល់អ្នករាល់គ្នា»។

4កាលទេវតារបស់ព្រះ‌យេហូវ៉ាបានប្រាប់សេចក្ដីទាំងនេះ ដល់អស់ទាំងពួកកូនចៅអ៊ីស្រា‌អែលរួចហើយ គេក៏នាំគ្នាទ្រហោយំ។

5ដូច្នេះ គេដាក់ឈ្មោះកន្លែងនោះថា បូគីម រួចគេនាំគ្នាថ្វាយយញ្ញ‌បូជាដល់ព្រះ‌យេហូវ៉ានៅទីនោះ។

6កាលលោកយ៉ូស្វេបានឲ្យប្រជាជនចេញទៅ ពួកកូនចៅអ៊ីស្រា‌អែលក៏ទៅចាប់យកទឹកដីជាមត៌ករបស់គេរៀងខ្លួន។

7ប្រជាជនគោរពប្រតិ‌បត្តិដល់ព្រះ‌យេហូវ៉ា នៅអស់មួយជីវិតរបស់លោកយ៉ូស្វេ និងអស់មួយជីវិតរបស់ពួកចាស់ទុំ ដែលរស់នៅក្រោយលោកយ៉ូស្វេដែរ ជាពួកអ្នកដែលបានឃើញគ្រប់ទាំងកិច្ចការធំៗ ដែលព្រះ‌យេហូវ៉ាបានធ្វើដល់ពួកអ៊ីស្រា‌អែល។

8លោកយ៉ូស្វេជាកូនរបស់លោកនុន ជាអ្នកបម្រើរបស់ព្រះ‌យេហូវ៉ា បានស្លាប់ក្នុងជន្មាយុមួយរយដប់ឆ្នាំ ។

9គេបានបញ្ចុះសពលោកនៅព្រំដី ដែលជាមត៌ករបស់លោក នៅធីមណាត-ហេរេស ក្នុងស្រុកភ្នំអេប្រាអិម ខាងជើងភ្នំកាអាស។

10មនុស្សនៅជំនាន់នោះទាំងអស់ក៏បានមូលទៅជួបជុំនឹងបុព្វ‌បុរសរបស់គេគ្រប់គ្នាដែរ ហើយមនុស្សមួយជំនាន់ទៀតកើតមកតាមក្រោយ។ គេមិនបានស្គាល់ព្រះ‌យេហូវ៉ាទេ ក៏មិនបានស្គាល់កិច្ចការដែលព្រះ‌អង្គបានធ្វើដល់ពួកអ៊ីស្រា‌អែលដែរ។

11គ្រានោះ ពួកកូនចៅអ៊ីស្រា‌អែលបានប្រព្រឹត្តអំពើអាក្រក់ នៅព្រះ‌នេត្រព្រះ‌យេហូវ៉ា ហើយគេនាំគ្នាគោរពប្រតិ‌បត្តិតាមព្រះ‌បាល។

12គេបានបោះ‌បង់ចោលព្រះ‌យេហូវ៉ា ជាព្រះនៃបុព្វ‌បុរសរបស់គេ ដែលបាននាំគេចេញពីស្រុកអេស៊ីព្ទមក។ គេបែរទៅតាមព្រះដទៃ ក្នុងពួកព្រះរបស់សាសន៍ទាំងប៉ុន្មានដែលនៅជុំ‌វិញគេ ព្រមទាំងក្រាបថ្វាយបង្គំដល់ព្រះទាំងនោះ ហើយបានបណ្ដាលឲ្យព្រះ‌យេហូវ៉ាមានសេចក្ដីក្រោធ។

13គេបានបោះ‌បង់ចោលព្រះ‌យេហូវ៉ា ហើយទៅគោរពប្រតិ‌បត្តិតាមព្រះ‌បាល និងព្រះ‌អាសថារ៉ូតវិញ។

14ដូច្នេះ សេចក្ដីក្រោធរបស់ព្រះ‌យេហូវ៉ាក៏ឆួលឡើងទាស់នឹងពួកអ៊ីស្រា‌អែល ហើយព្រះ‌អង្គប្រគល់គេទៅក្នុងកណ្ដាប់ដៃពួកចោរព្រៃ ដែលមកប្លន់ទ្រព្យសម្បត្តិរបស់គេ ក៏លក់គេទៅក្នុងកណ្ដាប់ដៃខ្មាំងសត្រូវដែលនៅជុំ‌វិញ ធ្វើឲ្យពួកគេមិនអាចទប់ទល់នឹងខ្មាំងសត្រូវបានឡើយ។

15ពេលណាដែលគេចេញទៅ ព្រះ‌ហស្តរបស់ព្រះ‌យេហូវ៉ាចេះតែទាស់នឹងគេជា‌និច្ច ឲ្យគេជួបតែនឹងសេចក្ដីអាក្រក់ ដូចព្រះ‌យេហូវ៉ាបានព្រមានរួចមកហើយ ហើយក៏ដូចព្រះ‌យេហូវ៉ាបានស្បថនឹងគេដែរ។ ដូច្នេះ គេមានសេចក្ដីវេទនាយ៉ាងខ្លាំង។

16គ្រានោះ ព្រះ‌យេហូវ៉ាតាំងឲ្យមានពួកចៅ‌ហ្វាយឡើង ដើម្បីសង្គ្រោះពួកគេឲ្យរួចពីកណ្ដាប់ដៃអស់អ្នកដែលបានប្លន់គេ។

17ប៉ុន្តែ គេមិនបានស្តាប់តាមពួកចៅ‌ហ្វាយរបស់គេទេ ព្រោះគេបានផិតទៅតាមព្រះដទៃ ហើយក្រាបថ្វាយបង្គំព្រះទាំងនោះទៀតផង។ គេឆាប់នឹងងាកចេញពីផ្លូវបុព្វបុរសរបស់គេ គឺគេពុំបានប្រតិបត្តិតាមបទបញ្ជារបស់ព្រះ‌យេហូវ៉ា ដូចបុព្វបុរសរបស់គេទេ។

18កាលណាព្រះ‌យេហូវ៉ាបានតាំងឲ្យមានពួកចៅ‌ហ្វាយដល់គេ ព្រះ‌យេហូវ៉ាគង់ជាមួយចៅ‌ហ្វាយនោះ ហើយព្រះ‌អង្គសង្គ្រោះពួកគេឲ្យរួចពីកណ្ដាប់ដៃរបស់ខ្មាំងសត្រូវ នៅអស់មួយជីវិតរបស់ចៅ‌ហ្វាយនោះ ដ្បិតព្រះ‌យេហូវ៉ាអាណិតអាសូរនៅពេលគេស្រែកថ្ងូរ ព្រោះតែអស់អ្នកដែលសង្កត់‌សង្កិន ហើយធ្វើបាបពួកគេ។

19ប៉ុន្ដែ ពេលណាចៅ‌ហ្វាយនោះស្លាប់ទៅ គេក៏ត្រឡប់ទៅជាប្រព្រឹត្តអំពើអាក្រក់ ជាងបុព្វ‌បុរសរបស់គេទៅទៀត ដោយដើរតាមព្រះដទៃ គោរពប្រតិ‌បត្តិ ហើយក្រាបថ្វាយបង្គំដល់ព្រះទាំងនោះ។ គេមិនបានលះបង់ចោលអំពើដែលគេប្រព្រឹត្ត ឬចរិតរឹងចចេសរបស់គេឡើយ។

20ដូច្នេះ សេចក្ដីក្រោធរបស់ព្រះ‌យេហូវ៉ាបានឆួលឡើងទាស់នឹងពួកអ៊ីស្រា‌អែល ហើយព្រះ‌អង្គមានព្រះ‌បន្ទូលថា៖ «ដោយព្រោះប្រជាជននេះបានប្រព្រឹត្តរំលងសេចក្ដីសញ្ញា ដែលយើងបានតាំងនឹងបុព្វ‌បុរសរបស់គេ ហើយមិនបានស្តាប់តាមសំឡេងរបស់យើង

21នោះយើងនឹងលែងបណ្តេញសាសន៍ណាមួយ ដែលយ៉ូស្វេបានបន្សល់ទុក ក្រោយពេលគាត់ស្លាប់ទៅនោះ ចេញពីមុខគេឡើយ

22ដើម្បីឲ្យយើងបានល្បងលអ៊ីស្រា‌អែលមើល ថាតើគេនឹងខំប្រឹងដើរតាមផ្លូវរបស់ព្រះ‌យេហូវ៉ា ដូចបុព្វ‌បុរសរបស់គេបានកាន់តាមឬទេ»។

23ដូច្នេះ ព្រះ‌យេហូវ៉ាបានទុកសាសន៍ទាំងនោះ ឥតបណ្តេញគេចេញយ៉ាងរហ័សទេ ហើយព្រះ‌អង្គក៏មិនបានប្រគល់គេមកក្នុងកណ្ដាប់ដៃលោកយ៉ូស្វេដែរ។

← Chapter 1 Jump to: Chapter 3 →