Song of Solomon 5

Luganda (Luganda Bible 2003) (LB03)

← Chapter 4 Jump to: Chapter 6 →

1Ayi muganzi wange era mugole wange, nzize mu nnimiro yange. Nnoze mirra n'ebyakawoowo byange, ndidde ku mubisi gw'enjuki, ne ku bisasala byazo. Nnywedde omwenge gwange, n'amata gange. Mulye, mmwe abaagalana, munywe; munywe mukkute omukwano!

2Nali neebase, sso nga ntunula, ne mpulira muganzi wange ng'akonkona ku luggi, ng'agamba nti: “Nziguliraawo, muganzi wange, kabiite, omulungi wange, ataliiko kamogo! Omutwe gwange gutobye omusulo, enviiri zange zijjudde ssuulwe.”

3Nga nneeyambudde dda nze! Nziremu ate nnyambale? Nanaabye dda ebigere! Nziremu ate mbiddugaze?

4Muganzi wange n'ayisa omukono mu kituli mu luggi, nzenna ne mbugaana essanyu, kubanga ali awo.

5Ne ngolokoka okumuggulirawo, ebibatu byange n'engalo zange nga bitobye omuzigo ogw'akawoowo oguyitibwa mirra, ne gukulukutira ku kisiba oluggi.

6Ne nzigulirawo muganzi wange, kyokka nga yabuzeewo dda! Ne njagala mpulire bw'ayogera, ne mmunoonya, nga sikyamulaba! Ne mmuyita, nga tanziramu.

7Abakuumi ne bansanga nga balawuna ekibuga, ne bankuba, ne banteekako ebiwundu. Abakuumi b'ekibuga abo, ne bannyagako omunagiro gwange!

8Mbalayiza mmwe abawala b'omu Yerusaalemu, bwe mulaba muganzi wange, mumugamba nti okwagala nze kunzita, kummalawo!

9Ggwe nnalulungi, mu bakazi bonna, kiki ekyawula muganzi wo ku bantu abalala? Kiki ky'alina ekyenjawulo olyoke otulayize bw'otyo?

10Muganzi wange mulungi era wa maanyi. Ali omu yekka mu bantu omutwalo!

11Omutwe gwe guli nga zaabu omulungi ennyo nnyini. Enviiri ze za mayengo, nzirugavu nga nnamuŋŋoona.

12Amaaso ge gali ng'enjiibwa eziri ku mabbali g'obugga obukulukuta amazzi, nga ziri ng'ezinaaziddwa mu mata, ziri awo ziwummudde.

13Amatama ge gali ng'ennimiro omuli ebimera ebyobuwoowo, n'ebirungo by'enva ebyakaloosa. Emimwa gye giri ng'amalanga agatonnyolokokako eky'akawoowo ekiyitibwa mirra.

14Emikono gye giri ng'empeta eza zaabu eziwundiddwamu amayinja ga berulo. Omubiri gwe guli ng'ogwakolebwa mu ssanga eriwundiddwamu amayinja ga safiro.

15Amagulu ge gali ng'empagi ez'amayinja amayooyoote, ezisimbiddwa mu binnya ebya zaabu omulungi ennyo. Waakitiibwa ng'ensozi z'e Lebanooni, okuli emivule emiwagguufu.

16Emboozi ye mpoomerevu, na buli ekimuliko kinsanyusa. Mmwe abawala b'e Yerusaalemu, bw'atyo bw'ali muganzi wange, ye wuuyo mukwano gwange.

← Chapter 4 Jump to: Chapter 6 →