Ephesians 1

Luganda (BIBU1) (BIBULIYA ENTUKUVU)

Jump to: Chapter 2 →

1Pawulo, Omutume wa Yezu Kristu olw'okwagala kwa Katonda. Y'abatuukirivu bonna abakkiriza mu Kristu Yezu.

2Eneema ebeere nammwe ko n'emirembe okuva ewa Katonda Kitaffe n'Omukama Yezu Kristu.

3Katonda oyo era Kitaawe wa Mukama waffe Yezu Kristu atenderezebwe, eyatuwa mu Yezu Kristu buli mukisa ogw'omu ggulu ogwa Mwoyo.

4Nga bwe yatweroboleza mu ye nga n'ensi tennabangibwawo, tubeere batuukirivu nga tetuliiko musango mu maaso ge.

5Yatuteebeza mu kwagala kwe okwebonanyizibwa ng'abaana ng'ayita mu Yezu Kristu, nga bwe yateekateeka mu kwagala kwe,

6aweese eneema ye ey'ekitiibwa ettendo, gye yatugemulira olw'ekisa mu Mwana we Omwagala.

7Mu ye twanunulibwa mu musaayi gwe, ne tusonyiyibwa ebibi, okusinziira ku bungi bw'eneema ye,

8gye yatuwa mu buyitirivu mu magezi gonna ne mu kumanya.

9Kubanga yatuwa okumanya ekyama ky'okwagala kwe, nga kwe kusiima kwe, nga bwe yateesa atyo mu Kristu,

10entegeka ey'okugoberera okutuusa ng'emirembe gyonna gituukiridde, byonna abigatte wamu mu Kristu, ebiri mu ggulu n'ebiri mu nsi.

11Mu ye naffe mwe yatweroboleza ng'obusika, nga bwe yatuteebeza ng'aggya ku ntegeka ye, oyo atuukiriza byonna ng'agoberera enteesa y'okwagala kwe.

12Ffe abaasookera ddala okusuubira mu Kristu, twayitirwa okutendanga ekitiibwa kye.

13Mu ye nammwe mwawulira ekigambo ky'amazima, Evangili y'okulokoka kwammwe, ne mumukkiriza, ne mussibwako akabonero ka Mwoyo Mutuukirivu omusuubize,

14nga gwe musingo gw'obusika bwaffe, okutuusa nga tubufunye, ekitiibwa kye kifune ettendo.

15Nange nno olw'okuwulira nga bwe mukkiriza Omukama Yezu n'engeri gye mwagalamu abatuukirivu bonna,

16sisobola kulekera awo kwebaza ku lwammwe nga mbajjukira mu ssaala zange,

17Katonda nnyini kitiibwa Kitaawe wa Mukama waffe Yezu Kristu, abawe omutima ogutegeera, ababikkulire mumumanye;

18amulise amaaso g'omutima gwammwe, mutegeere essuubi lye yabayitira, n'obungi bw'ekitiibwa eky'obusika bwe bwe yawa abatuukirivu be,

19n'obukulu bw'amaanyi ge amasukkirivu g'ayoleseza mu ffe abakkiriza, mu bikolwa by'obuyinza n'amaanyi ge,

20bye yakola mu Kristu bwe yamuzuukiza mu bafu, n'amutuuza ku mukono gwe ogwa ddyo mu ggulu,

21ng'asukkulumye okusinga obukungu bwonna, n'obuyinza, n'amaanyi, n'obufuzi, na buli linnya eryali lituumiddwa, si mu mulembe guno gwokka, naye ne mu gulijja;

22byonna n'abissa wansi w'ebigere bye, yennyini n'amuwa okubeera omutwe gwa buli kintu ku lw'Ekleziya;

23gwe mubiri gwe, obujjuvu bw'oyo ajjuza byonna mu byonna.

Jump to: Chapter 2 →