Ephesians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Nze Pawulo omusibe wa Kristu Yezu, kyenva neegayirira ku lwammwe ab'amawanga.

2Nsuubira nti temwalema kuwulirako nga bwe nakwasibwa ku lwammwe omulimu ogw'eneema ya Katonda,

3ng'ekyama kye mbawandiikiddeko mu bikulembedde bwe kyambikkulirwa.

4Bwe mubisoma musobola okulaba nga bwe nategeera ekyama kya Kristu,

5ekitaamanyisibwa bantu mu mirembe giri nga Mwoyo bw'akimanyisizza kaakano Abatume be abatukuvu n'abalanzi,

6nti n'abamawanga nabo bafuuse basika wamu naffe, nabo bitundu bya mubiri, abagabana ku bisuubizo mu Kristu Yezu olw'Evangili.

7Eyo ye Vangili gye natumibwa okuweereza olw'ekirabo ky'eneema ya Katonda ekyampeebwa nga kiva mu kukola kw'amaanyi ge.

8Nange, nze asemba mu batuukirivu bonna, eneema eno yampeebwa, ab'amawanga okubabuulira obugagga bwa Kristu obuteefumiitirizika,

9n'okumanyisa abantu bonna ekyama kino nga bwe kigenda kikola. Kyali kikwekeddwa okuva ddi mu Katonda eyatonda byonna,

10kati amagezi ga Katonda ag'engeri ennyingi galyoke gamanyisibwe abafuzi n'ab'obuyinza mu ggulu nga kino kiyita mu Ekleziya.

11Kino yakikola ng'agoberera enteesa ye ey'emirembe gyonna gye yatuukiriza mu Kristu Yezu Mukama waffe,

12omutuviira okuguma, ne tumusemberera nga tetutya olw'okumukkiriza.

13Kale nno mbeegayiridde muleke kuterebuka olw'ennaku ze nnimu ku lwammwe; kye kitiibwa kyammwe.

14Kyenva nno nfukamira mu maaso ga Taata,

15oyo buli buzadde mu ggulu ne mu nsi kwe buggya erinnya,

16ng'ayima ku bugagga bw'ekitiibwa kye, abawe ng'ayita mu Mwoyo we mweyongere munda yammwe amaanyi n'obuvumu,

17ne Kristu abeere mu mitima gyammwe olw'okukkiriza; emirandira nga mugisimbye mu kwagala era nga kwe muzimbiddwa,

18musobole okufuna amaanyi awamu n'abatuukirivu bonna okutegeera obugazi, obuwanvu, obugulumivu, n'okukka wansi,

19mumanye n'okwagala kwa Kristu, okusukkiridde amagezi gonna, mulyoke mujjulire ddala mwenna Katonda mu bujjuvu bwe.

20Oyo, ng'ayita mu buyinza obukolera mu ffe, akola n'ayitiriza n'okuyitiriza ku kye tuba tusabye oba tulowooza,

21oyo aweebwe ekitiibwa mu Ekleziya ne mu Kristu Yezu mu mazadde gonna emirembe n'emirembe. Amiina.

← Chapter 2 Jump to: Chapter 4 →