Ephesians 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Kale nno nze omusibe w'Omukama mbeegayiridde, muyise mu ngeri esaanira okuyitibwa kwe mwayitirwa,

2n'obwetoowaze bwonna, n'obuteefu, n'obugumiikiriza, nga mulekeragana olw'okwagalana.

3Mwefubirire okunyweza okussa ekimu okwa Mwoyo mu ddembe eribasiba awamu.

4Omubiri guli gumu ne Mwoyo omu nga bwe mwayitibwa mu kusuubira okumu okw'okuyitibwa kwammwe;

5Omukama omu, okukkiriza kumu, Batismu emu,

6Katonda omu era Kitaawe wa bonna, assukkulumye byonna, akolera mu byonna, ali mu byonna.

7Sso buli omu mu ffe yafuna eneema okusinziira nga Kristu bwe yagereka ebirabo bye.

8Kyebava bagamba nti: “Bwe yalinnya waggulu, yatwala eggye ly'abasibe, n'awa abantu ebirabo.”

9Bwe bagamba nti: “Yalinnya,” baba ate bategeeza ki ekirala, wabula nti yakka wansi ekkuzimu mu ttaka.

10Oyo eyakka ye omu eyayambuka n'atumbiira n'okuyisa eggulu lyonna alyoke ajjuze byonna.

11Yawa abamu okuba Abatume, abalala ne baba balanzi, abandi bayigiriza ba Vangili, abalala basumba n'abayigisa,

12olw'okutereeza obulamu bw'abatuukirivu basobole okukola omulimu gw'okuweereza n'okuzimba Omubiri gwa Kristu,

13okutuusa ffenna awamu lwe tulifuuka omu mu kukkiriza ne mu kumanya Omwana wa Katonda, tutuuke ku kubeera omuntu omu atuukiridde, ne ku kwenkanankana Kristu mu bujjuvu bw'obukulu bwe;

14tuleme kubeera baana bato abeekubiira eno n'eri, abayuuyizibwa buli muyaga gwa njigiriza, n'abantu abakwenyakwenya n'obukodyo bwabwe obuwubisa.

15Naye mu kwogera amazima mu kwagala tujja kugenda nga tukula mu buli ngeri nga tufuukamu oyo omutwe gwaffe, Kristu;

16mu ye omubiri gwonna mwe gugattirwa awamu ne gweyunga bulungi mu buli nnyingo eziguliisa, ate buli kitundu bwe kiba nga kikola bulungi, ne zigukuza, ne ziguwa zityo okugenda nga gwezimba mu kwagala.

17Kale nno mbagamba, era ndayidde n'Omukama, temwongera kuyisa ng'ab'amawanga bwe bayisa mu ndowooza yaabwe etayamba.

18Bakutte enzikiza mu ntegeera yaabwe; beesuubye obulamu bwa Katonda olw'obutamanya obubalimu, kubanga baagugubya emitima gyabwe.

19Bafuuse bakakanyavu, bagwenyuse, balulunkanira buli ngeri ya bugwagwa.

20Naye mmwe Kristu si bwe mwamuyiga mutyo.

21Ndowooza nga mwamuwulirako era nga mwamuyigirizibwako, ng'amazima bwe gali mu Kristu.

22Mweyambule nno omuntu omukadde ow'enneeyisa ey'edda, eyali ayonoonese olw'okugoberera amaddu agaamukwenyakwenyanga,

23mudde buggya munda mu mutima gwammwe.

24Mwambale omuntu omuggya eyatondebwa mu nfaanana ya Katonda mu butuufu ne mu butuukirivu obw'amazima.

25Awo nno mulekere awo okulimbagana, buli omu abuulire munne amazima, anti tuli buli omu bitundu bya munne.

26Musunguwale, kyokka temukola ekibi; temusuulanga njuba nga mukyasibye obusungu,

27bwe mutyo ne mutawa Sitaani kyekwaso.

28Abadde abba, alekere awo; wabula akabassane ng'akola emirimu emirungi n'emikono gye, afune bw'atyo kw'aggya okuyamba eyeetaaga.

29Ebigambo ebibi tebifulumanga mu kamwa kammwe, wabula ebyo ebirungi, ebizimba, ebigwanira we bijjira, ebiyamba oyo abiwulira.

30Temunakuwazanga Mwoyo Mutuukirivu wa Katonda nnyini kabonero akaabalambibwako olw'okubeera olunaku olw'okununulibwa.

31Mu mmwe mubuliremu ddala akadubudubu, ennyiike, obusungu, okukaalaama, okuvuma, na buli ttima lyonna.

32Buli omu abeere wa kisa eri munne, musaasiragane, musonyiwagane nga Katonda bwe yabasonyiwa mu Kristu.

← Chapter 3 Jump to: Chapter 5 →