Ephesians 6

Luganda (BIBU1) (BIBULIYA ENTUKUVU)

← Chapter 5 Jump to:

1Mmwe abaana, muwulirenga bazadde bammwe mu Mukama; kubanga kino kituufu.

2“Ossangamu kitaawo ne nnyoko ekitiibwa,” kye kiragiro ekisooka okubaako ekisuubizo:

3“Lw'onooba obulungi n'owangaala ku nsi.”

4Nammwe abazadde mulekenga kunyiiza baana bammwe, naye mubagunjulenga mu mpisa ennungi ne mu bibuuliriro by'Omukama.

5Mmwe abaddu, nga bwe muwulira Kristu, bwe muba muwuliranga ne bakama bammwe ab'oku nsi, mu kutya ne mu kukankana, nga temussaamu kantu;

6si lwa kulabibwa kyokka, kyenkana ng'abanoonya okutendebwa abantu, wabula nga bwe muli baweereza ba Kristu, mukole Katonda ky'ayagala n'omutima gwonna.

7Muweerezenga nga mwagala ng'abaweereza Omukama, sso si abantu obuntu,

8nga mumanyi nti buli omu, oba muddu oba si muddu, buli ky'aliba akoze empeera yaakyo aligifuna okuva ew'Omukama.

9Nammwe bakama baabwe, abaweereza mubayisenga mu ngeri ye emu; muleke kubawerera, nga mumanyi nti Mukama waabwe era owammwe ali mu ggulu era ye taliimu kusosola.

10Ekisembayo, mubeerenga ba maanyi mu Mukama n'obuyinza bw'amaanyi ge.

11Mwambalenga mubune ebyokulwanyisa ebya Katonda, musobole okuziyiza obukodyo bwa Sitaani.

12Kubanga tetulwanyisa mubiri na musaayi, naye tulwanyisa abakungu n'ab'obuyinza, tulwanyisa abafuga ensi ey'enzikiza eno, tulwanyisa emyoyo emibi egy'eyo waggulu.

13Kale nno mukwatenga ebyokulwanyisa bya Katonda, lwe munaasobola okutala ku lunaku olw'akabi, nga mumaze okukola kyonna ekisoboka, musigale nga muli banywevu.

14Muyimirirenga nno, nga mwesibye ebimyu, ge mazima, nga mwambadde n'ekizibawo eky'ekyuma, bwe butuukirivu,

15nga munaanise n'engatto mu bigere okwetegekera okulangirira Evangili ey'eddembe.

16Okusinga byonna, nga mukutte engabo, kwe kukkiriza, gye muneeyamba okuzikiza obusaale bw'omubi obwengeredde ng'omuliro.

17Mukwate n'enkufiira eŋŋumu ey'obulokofu, n'ekitala ekya Mwoyo, kye kigambo kya Katonda.

18Mwegayirirenga ebbanga lyonna mu Mwoyo, nga muweereza essaala n'okuwanjaga. Olwa kino temukoowa kutunula nga musabira abatuukirivu,

19nange nga munsabira nfune ebigambo, njasamye akamwa kange n'obuvumu okumanyisa ekyama ky'Evangili

20gye natumirwa eno mu nvuba ng'omubaka, ngirangirire nga bwe nteekeddwa okwogera.

21Nammwe okumanya bwe ndi ne bye nkola, ebyo byonna Tukiko owooluganda omwagalwa, omuweereza omwesigwa mu Mukama, anaabibabuulira.

22Mmubasindikidde lwa nsonga eno, mumanye nga bwe tuli era abagumye emitima.

23Eddembe, okwagala n'okukkiriza okuva ewa Katonda Taata n'Omukama Yezu Kristu bibeere n'abooluganda.

24Eneema ebeere n'abo bonna abaagala Omukama Yezu Kristu n'okwagala okutagooka.

← Chapter 5 Jump to: