Ephesians 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Nammwe mwali bafu olw'ebyonoono n'ebibi byammwe

2bye mwatambulirangamu luli nga mukyagoberera empisa y'ensi eno, nga mukyatwalibwa omukungu alina obuyinza obw'omu nsi eno, omwoyo ogwo ogukyakola na buli kati mu bajeemu.

3Naffe ffenna edda twalinga kimu nabo, nga tutwalibwa amaddu g'omubiri gwaffe, nga tukola ebyo emibiri n'emitima gyaffe bye gyegomba; mu buzaale, nga tuli zzadde eryasunguwalirwa nga bwe kyali ku balala bonna.

4Naye nno Katonda omugagga mu kusaasira, olw'okwagala kwe okunene kwe yatwagalamu,

5ne bwe twali tukyali bafu olw'ebibi byaffe, yatuzzaamu obulamu wamu ne Kristu – eneema ye ye yabalokola, -

6naffe n'atuzuukiza wamu naye, n'atutuuza wamu naye mu ggulu mu Kristu Yezu,

7alyoke mu mirembe egirijja ayoleke obugagga bw'eneema ye obusukkirivu ng'atugirira ekisa mu Kristu Yezu.

8Anti eneema ye yabalokola mu kukkiriza, tekyava ku mmwe, kino kirabo kya Katonda.

9Tekyava mu bikolwa byammwe; waleme kubaawo nno yeetenda.

10Tuli mulimu gwe, yatutonda mu Kristu Yezu tukole ebikolwa ebirungi Katonda bye yatutegekera edda, mwe tuba tutambulira.

11Awo no mujjukire ng'olumu mwali b'amawanga mu buzaale obw'omubiri, nga muyitibwa abatali batayirire abo abatayirire ab'okutayirirwa okwali okw'omubiri nga kukoleddwa bantu,

12nti olwo mwali temulina Kristu, nga muli bweru wa kibiina kya Yisirayeli, nga muli bagwira eri endagaano z'ekisuubizo, nga temulina ssuubi mu mmwe, nga temulina Katonda mu nsi.

13Sso kati mu Kristu Yezu, mmwe luli abaali beesuubye, mwasembezebwa kumpi olw'omusaayi gwa Kristu.

14Anti ye lye ddembe lyaffe; ffembi atufudde omuntu omu, ng'ayita mu mubiri gwe n'amenyawo ekisenge eky'obulabe ekyatwawulangamu.

15Yaggyawo Etteeka n'ebiragiro byalyo n'empisa zaalyo alyoke atondewo mu ye omuntu omuggya awabadde ababiri, n'azzaawo bw'atyo eddembe,

16ffembi atutabaganye ne Katonda mu mubiri gumu nga yeeyamba omusaalaba, akomye bw'atyo obulabe obwaliwo.

17Yajja n'ayigiriza eddembe mwe abaali beesuubye na bali abaali okumpi;

18kati ffembi ng'ayita mu ye mu Mwoyo omu tusobola okutuuka ku Taata.

19Awo nno, temukyali bagwira oba basuze busuze, naye muli bannansi wamu n'abatuukirivu n'ab'omu maka ga Katonda.

20Mwazimbirwa ku mwaliiro gw'Abatume n'abalanzi; Kristu Yezu yennyini nga lye jjinja ery'entabiro.

21Mu ye ekizimbe kyonna mwe kyegattira, ne kikula, ne kifuuka Ekiggwa ekitukuvu mu Mukama.

22Mu ye nammwe mwe mwazimbirwa, ne mufuuka ekisulo kya Katonda mu Mwoyo.

← Chapter 1 Jump to: Chapter 3 →