Ephesians 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Nga bwe muli abaana ba Katonda abaagalwa, mumufaanane.

2Mutambulire mu kwagala nga mulabira ku Kristu nga bwe yatwagala ne yeewaayo okubeera ffe ng'ekitambiro kye yatambirira Katonda ekiwunya akawoowo ak'akaloosa.

3Nga bwe kigwanira abatuukirivu, mu mmwe temumenyerwangamu bwenzi, buseegu n'okululunkanira ebintu.

4Eby'ensonyi, okunyumya eby'obusiru, n'okubalaata, ebyo tebibagwanidde, wabula mu mmwe mubeeremu kwebaza.

5Kino mukitegeere nti teri museegu yenna, oba mugwagwa, oba alulunkanira ebintu, kwe kugamba nti oyo asinza balubaale, alina busika mu bwakabaka bwa Kristu n'obwa Katonda.

6Tebabaguyanga n'ebigambo ebitaliimu; ebintu ng'ebyo bye bireetera Katonda okusunguwalira abajeemu.

7Muleke nno kwetaba nabo.

8Anti edda luli mwali nzikiza nsa, sso kati muli kitangaala mu Mukama; muyise nno ng'abaana b'ekitangaala.

9Anti ebibala by'ekitangaala birabikira mu bulungi bwonna, n'obutuufu, n'amazima.

10Mufube okumanya ekisanyusa Omukama.

11Ebikolwa eby'omu nzikiza ebyo omutali mugaso muleme kubyetabikamu; wabula ate mubyatuukirize bwatuukiriza.

12Mazima bye bakola eyo mu nkiso bikwasa n'ensonyi okwogera.

13Buli kyonna ekitangaala kye kikubako kyerulibwa, buli kyeruddwa kifuuka kitangaala.

14Kyebava bagamba nti: “Zuukuka, ggwe eyeebase, zuukira mu bafu, Kristu ajja kukumulisa.”

15Kale nno, abooluganda, mwegendereze engeri gye mutambulamu, si ng'abasiru, wabula ng'abagezi

16abamanyi okuggya omugaso mu budde buno, anti obudde bwe tulimu bubi.

17Kale nno temuba basiru, wabula mutegeere Omukama ky'ayagala.

18Muleke na kutamiira mwenge, kubanga obwo busaasaanyi, wabula mujjule Mwoyo Mutuukirivu.

19Mwogeraganyenga mu zabbuli, amatendo n'ennyimba entukuvu, nga muyimba, nga mutendereza Omukama n'omutima gwammwe gwonna,

20Katonda Taata nga mumwebaza byonna bulijjo na buli wantu mu linnya lya Mukama waffe Yezu Kristu.

21Buli omu agonderenga munne mu kutya Kristu.

22Abakazi mugonderenga babbammwe nga bwe mugondera Omukama.

23Kubanga omusajja gwe mutwe gw'omukazi nga Kristu bw'ali omutwe gw'Ekleziya, omubiri gwe era yennyini Omulokozi waagwo.

24Era ng'Ekleziya bw'agondera Kristu, n'abakazi bwe batyo bagonderenga babbaabwe mu byonna.

25Abasajja, mwagalenga bakazi bammwe, nga Kristu bwe yayagala Ekleziya ne yeewaayo okubeera ye,

26alyoke amutukuze ng'amulongoosa mu kunaazibwa mu mazzi n'ekigambo,

27alyoke mu kitiibwa yessizzeewo mu maaso ge Ekleziya ataliiko musango na lukanyanya newandibadde akantu akalala ak'engeri eyo, alyoke abeere mutukuvu nga taliiko kasobye.

28N'abasajja bwe balagirwa okwagalanga bwe batyo bakazi baabwe kyenkana ng'emibiri gyabwe gyennyini. Anti ayagala mukazi we nga yeeyagadde yennyini.

29Kubanga tewabanga akyawa mubiri gwe, naye aguliisa, n'agulabirira, nga Kristu bw'alyowa Ekleziya,

30Kubanga tuli bitundu bya mubiri gwe.

31Olw'ekyo omusajja kyaliva alirekanga kitaawe ne nnyina, ne yeegatta ku mukazi we; ababiri balifuuka omubiri gumu.

32Ekyama kino kikulu, nze mu kyo ntegeezaamu Kristu n'Ekleziya.

33Kale buli muntu mu mmwe ayagalenga mukazi we nga ye bwe yeeyagala yennyini, n'omukazi atyenga bba.

← Chapter 4 Jump to: Chapter 6 →