Galatians 1

Luganda (BIBU1) (BIBULIYA ENTUKUVU)

Jump to: Chapter 2 →

1Pawulo, eyayitibwa okuba Omutume si bantu oba nga kiva mu muntu buntu, wabula mu Yezu Kristu ne Katonda Taata eyamuzuukiza mu bafu,

2era n'abooluganda bonna bwe tuli.

3Ya Ekleziya z'e Galasiya: Eneema ebeere nammwe, ko n'emirembe okuva ewa Katonda Taata ne Mukama waffe Yezu Kristu,

4eyeewaayo okubeera ebibi byaffe okutuwonya emirembe gino emibi, nga Katonda era Taata bwe yayagala;

5oyo agulumizibwe emirembe n'emirembe Amiina.

6Neewuunyizza okulaba nga mwabulidde mangu mutyo oli eyabayita mu neema ya Kristu, ate ne mudda eri evangili endala;

7si kwe kugamba nti waliyo evangili endala, wabula waliwo abamu ababatabula, abaagala okwonoona Evangili ya Kristu.

8Ne bwe yandibadde ffe oba malayika avudde mu ggulu, singa abayigiriza evangili endala eyawukanye ku eyo gye twabayigiriza, avumirirwe.

9Nga bwe twagamba olulala, era bwe nziramu okugamba, nti oba waliwo abayigiriza evangili eyawukanye ku eyo gye mwafuna, avumirirwe.

10Kati nkolerera kusiimibwa bantu, oba Katonda? Nnoonya kusanyusa bantu? Oba nkyayagala kusanyusa bantu, sandibadde muweereza wa Kristu.

11Ka mbabuulire, abooluganda, Evangili gye nabayigiriza, si ya muntu.

12Saagifuna kuva ku muntu; saayigirizibwa buyigirizibwa, wabula yava mu Yezu Kristu bye yambikkulira.

13Anti mwawulira edda bwe neeyisanga nga ndi mu Kiyudaaya; nga bwe nayigganya Ekleziya wa Katonda ne mpitiriza, ne ngezaako okumuzikiriza.

14Neeyongera okukuguka mu Kiyudaaya ne nkubira wala bannange ab'eggwanga lyange bwe twaliwo mu budde obwo, nga ndi muyitirivu mu kutakabanira empisa za bajjajjange.

15Naye nno oyo eyanjawula okuva mu nda ya nnyabo, n'ampita n'eneema ye, bwe yasiima

16okunjoleka Omwana we ndyoke mmuyigirize ab'amawanga, seeyuna muntu,

17era n'e Yeruzaalemu saayambukayo eri abo abansooka okuba abatume; nagenda bugenzi mu Arabiya, ate ne nkomawo e Damasiko.

18Oluvannyuma nga wayise emyaka esatu, kwe kwambuka e Yeruzaalemu okulaba Kefa, ne mmala naye ennaku kkumi na ttaano.

19Mu batume saalabayo mulala, mpozzi Yakobo muganda w'Omukama.

20Ndayira mu maaso ga Katonda nga bye mpandiika bino sirimba.

21Oluvannyuma ne ŋŋenda mu nsi ya Siriya ne mu Silisiya.

22Ekleziya za Kristu ez'omu Buyudaaya zaali tezimmanyi bwe nfaanana.

23Baali bawuliddeko buwulizi nti: “Olumu eyali atuyigganya, ate kati y'ayigiriza okukkiriza kwe yali ayagala okuzikiriza;”

24ne bagulumiza Katonda olw'okubeera nze.

Jump to: Chapter 2 →