Galatians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Basiru mmwe Abagalasiya, ani abagulise, mmwe mu maaso gammwe Yezu omukomerere ku musaalaba be yalagibwa?

2Kale mbabuuza kino kyokka: Mwoyo mwamufuna kubanga mwatuusa ebikolwa by'omu Tteeka, nandiki kubanga mwawulira n'okukkiriza?

3Bwe mutyo bwemusiriwadde? Mmwe abaatandika ne Mwoyo ate mumaliriza na mubiri?

4Byonna ebyo bye mwabonaabonamu byali bya busa? - singa ddala byali bya busa.

5Eyabawa Mwoyo we era akola n'ebyewuunyo mu mmwe akozesa bikolwa bya mu Tteeka, oba kubanga mwawulira n'okukkiriza?

6“Yiburayimu yakkiriza Katonda ne kimubalirwa ng'obutuukirivu.”

7Awo nno mulaba nti abakkiriza be baba abaana ba Yiburayimu.

8Ekiwandiiko ekitukuvu bwe kyalengera nga Katonda amawanga aligafuula matuukirivu lwa kukkiriza, ne kibuulirirawo Yiburayimu amawulire ag'essanyu nti: “Mu ggwe amawanga gonna galiweebwa omukisa.”

9Abakkiriza nno ba mukisa wamu ne Yiburayimu eyakkiriza.

10Awo nno bonna abagendera ku bikolwa eby'Etteeka bakolimire; anti kyawandiikibwa nti: “Buli yenna atanyweza byonna ebyawandiikibwa mu kitabo ky'Etteeka n'atabituusa, mukolimire.”

11Awo nno Etteeka terisobola kufuula muntu mutuukirivu mu maaso ga Katonda, kubanga “Omutuukirivu aliba mulamu olw'okukkiriza.”

12Etteeka lyo teryesigamye ku kukkiriza, kubanga “Aliba abikoze, aliba mulamu olw'okubeera byo.”

13Kristu yatununula mu kikolimo ky'Etteeka bwe yafuuka ekikolimo olw'okubeera ffe, kubanga kyawandiikibwa nti: “Buli yenna awanikibwa ku muti, mukolimire.”

14Kristu Yezu yatununula, mu ye omukisa gwa Yiburayimu gujje ku b'amawanga, naffe olw'okukkiriza tufune Mwoyo eyasuubizibwa.

15Abooluganda, singa tulabira ku bibaawo bulijjo, endagaano y'omuntu bw'emala okukakasibwa, tewali muntu asobola kugisazaamu oba kugiwaayiramu birala.

16Ebisuubizo byasuubizibwa Yiburayimu n'ezzadde lye. Tagamba nti: “N'amazadde ge,” ng'amangi; naye mu bumu nti: “N'ezzadde lyo;” ezzadde eryo ye Kristu.

17Kino nze kye ntegeeza, nti Etteeka eryajja nga wamaze okuyita emyaka ebikumi bina mu asatu teriyinza kudibya ndagaano Katonda gye yali amaze okukakasa, bye yasuubiza ne bifa busa.

18Oba obusika bugoba biri mu Tteeka, awo nno tebugoba kisuubizo; sso Katonda yabuwa Yiburayimu ng'agoba ebiri mu kisuubizo.

19Etteeka nno lyaki? Lyagattibwako olw'ebisobyo okutuusa ezzadde eryasuubizibwa ekisuubizo lwe lirijja. Lyateekebwateekebwa bamalayika nga bayita mu mutabaganya.

20Omutabaganya tatabaganya omu, sso Katonda ali omu.

21Awo nno Etteeka liggyawo Katonda bye yasuubiza? N'akatono. Singa wassibwawo Etteeka erisobola okuwa obulamu, ggwe wamma obutuukirivu bwandivuddenga mu Tteeka.

22Sso Ekiwandiiko ekitukuvu byonna kyabissa mu buyinza bwa kibi, olw'okukkiriza Yezu Kristu ekisuubizo kiryoke kibeere ky'abo abakkiriza.

23Kati nno okukkiriza kwali tekunnajja, ffenna twali tussiddwa mu kkomera ly'Etteeka, nga tukuumirwa mu nkomyo okutuusa akadde okukkiriza lwe kulibikkulibwa.

24Awo nno Etteeka lyatukuumira mu ggunjuliro okutuusa ku Kristu, tulyoke tufuulibwe abatuukirivu olw'okukkiriza.

25Naye kati okukkiriza nga kumaze okutuuka, tetukyafugibwa mukuumi,

26Kubanga mwenna olw'okukkiriza, muli baana ba Katonda mu Kristu Yezu.

27Anti mwenna nga bwe mwabatizibwa mu Yezu Kristu, mwambadde Kristu.

28Tewakyali ono Muyudaaya, ono Mugereeki; tewakyali ono muddu, ono mwana wa ddembe; tewakyali ono musajja, ono mukazi; anti mmwe mwenna muli muntu omu mu Kristu Yezu.

29Oba muli ba Kristu, awo nno muli zzadde lya Yiburayimu, muli basika okusinziira ku kisuubizo.

← Chapter 2 Jump to: Chapter 4 →