Galatians 5

Luganda (BIBU1) (BIBULIYA ENTUKUVU)

← Chapter 4 Jump to: Chapter 6 →

1Kristu yatusumulula tulyoke tubeere mu ddembe; awo nno munywere, muleme kwezza ate mu kikoligo kya buddu.

2Nze Pawulo mwene nze mbagamba, nti oba mutayirirwa, Kristu tajja kubagasa kantu.

3Nziramu okukakasa buli muntu eyeewaayo okutayirirwa, nti oyo abanjibwa okukwata Etteeka lyonna.

4Mmwe abaagala okufuulibwa abatuukirivu olw'Etteeka, mukutuddwa ku Kristu; mukongose ku neema.

5Sso ffe mu Mwoyo ku lw'okukkiriza, tulinda ebyo obutuukirivu bye busuubiza.

6Anti mu Kristu Yezu okutayirirwa n'obutatayirirwa byombi tebirina makulu, wabula okukkiriza okweyolekera mu kwagala.

7Mwali mudduse bulungi, ate ani oyo abaziyiza okugondera amazima?

8Okubaseemyaseemya kuno si kw'oyo eyabayita.

9Ekizimbulukusa ekitono kizimbulukusa obutta bwonna.

10Neesiga Mukama nga temujja kugoberera ndowooza ndala; oyo abatabula, ne bw'anaaba ani, gulimusinga.

11Kale nno, abooluganda, oba nze nkyayigiriza okutayirirwa, lwaki bakyanjigganya? Bwe guba gutyo, n'ekyesittazo ky'omusaalaba kiggiddwawo.

12Nandyagadde abo ababatabangula beesonjolereko ddala!

13Abooluganda, mmwe mwayitirwa ddembe; kyokka eddembe eryo temulyeyambisa kukola bya mubiri, naye buli omu abeere muweereza wa munne mu kwagala.

14Anti Etteeka lyonna lifunzibwa mu kigambo kimu: “Oyagalanga munno nga ggwe wennyini bwe weeyagala.”

15Oba mulumagana, mulyaŋŋana mutyo, mwekkaanye sikulwa nga mumalaŋŋanawo.

16Kyenva ŋŋamba nti: mutambulire mu Mwoyo, olwo lwe mutaakole mubiri bye gwegomba.

17Anti omubiri bye gwegomba bikontana n'eby'omwoyo bye gwegomba; n'omwoyo bye gwegomba bikontana n'eby'omubiri bye gwegomba. Byombi, ekimu kirwanyisa kinaakyo, ne mutakola kye mwandyagadde kukikola.

18Bwe muba nga mutwalibwa Mwoyo, olwo temufugibwa Tteeka.

19Anti ebikolwa by'omubiri bimanyiddwa: obuseegu, obwenzi, obugwenyufu,

20okuwongera balubaale, okuloga, akaluyi, okuyomba, ebbuba, obusungu, obukodo, endasano, obutakkaanya,

21obuggya, obutemu, obutamiivu, ebiduula n'ebirala ebiringa ebyo. Mbalabula, era nga bwe nabalabula olulala, ebyo ababikola tebalisikira bwakabaka bwa Katonda.

22Kyo ekibala kya Mwoyo kibeera: kwagala, ssanyu, ddembe, kugumiikiriza, kisa, bulungi, bwesigwa,

23buteefu, bwetangize. Ebyo tebiriiko tteeka libiwakanya.

24Abo abeewa Kristu Yezu, omubiri gwabwe bagukomerera ku musaalaba ko n'amaddu gaagwo ne bye gwegomba.

25Oba nno tuli balamu lwa Mwoyo, tutambulire mu Mwoyo.

26Tuleke kwegomba kitiibwa kitaliimu n'okusosonkerezagana, n'okukwatiragana obuggya.

← Chapter 4 Jump to: Chapter 6 →