Galatians 6

Luganda (BIBU1) (BIBULIYA ENTUKUVU)

← Chapter 5 Jump to:

1Abooluganda, ng'omuntu akwatiddwa n'agwa mu nsobi, mmwe aba Mwoyo mumugolole n'eggonjebwa. Nammwe mwegendereze muleme kukemebwa.

2Buli omu asitulireko munne omugugu, bwe mutyo mutuukirize etteeka lya Kristu.

3Kubanga oli bw'alowooza ng'aliko bw'ali sso nga taliiko bw'ali, oyo yeerimba.

4Buli omu yeekebere alabe nga bw'akola, olwo aneepima n'alaba ekimwewaanya, naye n'ateegeranya ku mulala.

5Anti buli omu obuzito alyetikka bubwe.

6Oyo asomesebwa ekigambo agabane byonna ebirungi by'alina n'oli asomesa.

7Muleke kuwubisibwa, Katonda teri ayinza kumukwenyakwenya, kubanga omuntu ky'aliba asize era ky'alikungula.

8Asiga mu mubiri gwe, mu mubiri gwe era mw'alikungula olumbe; asiga mu Mwoyo, mu Mwoyo mw'alikungula obulamu obutaggwaawo.

9Tuleme kukoowa kukola bulungi, kubanga bwe tutaddirira, tujja kukungula ng'obudde butuuse.

10Kale nno ebbanga nga bwe tukyalirina, tukolere bulungi abantu bonna, naddala abo ab'omu maka g'okukkiriza.

11Mulabe bwe mbawandiikidde n'omukono gwange mu nnyukuta ennene.

12Bonna abo abaagala okweraga mu by'omubiri, be bo ababawaliriza okutayirirwa, baleme kuyigganyizibwa lwa musaalaba gwa Kristu.

13Sso n'abo abaatayirirwa Etteeka tebalikwata, naye baagala mmwe mutayirirwe, balyoke beetendere mu kituuse ku mibiri gyammwe.

14Kikafuuwe nze okwetenda, wabula beppo mu musaalaba gwa Mukama waffe Yezu Kristu; mu gwo ensi ekomereddwa ku nze, nange nga nkomereddwa ku yo.

15Okutayirirwa tekulina makulu, n'obutatayirirwa nabwo bwe butyo; ekikulu kwe kubeera ekitonde ekiggya.

16Eddembe n'okusaasirwa bibeere ku abo abagoberera etteeka lino, era ne ku Yisirayeli wa Katonda.

17N'okuva kati wabulewo antawaanya, kubanga enkovu za Yezu mpita nazo ku mubiri gwange.

18Eneema ya Mukama waffe Yezu Kristu ebeerenga n'omwoyo gwammwe, abooluganda. Amiina.

← Chapter 5 Jump to: