Galatians 4

Luganda (BIBU1) (BIBULIYA ENTUKUVU)

← Chapter 3 Jump to: Chapter 5 →

1Kye ŋŋamba kye kino, nti omusika bw'aba akyali muto, yadde nga byonna ye nnyinibyo, aba talina ky'asinza muddu.

2Abakuza n'abalabirira ebintu bye be bamufuga okutuusa ebbanga kitaawe lye yamuteeseza.

3Naffe bwe tuli. Bwe twali tukyali bato, twali baddu b'amaanyi g'ebintu ensi mwe yakolebwa.

4Naye obudde bwe bwatuuka, Katonda n'atuma Omwana we, n'azaalibwa omukazi, nga naye atwalibwa Tteeka,

5alyoke anunule abo Etteeka be lyafuganga, tulyoke twebonanyizibwe ng'abaana.

6Kubanga nno muli baana, Katonda kyeyava asindika Mwoyo w'Omwana we mu mitima gyaffe, akoowoola nti: “Abba, Taata.”

7Awo nno tokyali muddu, wabula mwana mu Katonda; ate kubanga oli mwana, oli na musika.

8Weewaawo luli Katonda nga temunnamumanya, mwaweerezanga buddu ebyo mu butonde ebitali Katonda n'akatono.

9Kale nno, mumaze okumanya Katonda, oba ka ŋŋambe nti nga mumaze okumanyibwa Katonda, muyinza mutya okudda ku bintu ebyo ebinafu omutali kantu, bye mwagala okuttukiza mubeere baddu baabyo?

10Mukuza ennaku n'emyezi, obudde bw'omwaka n'emyaka.

11Mbatiiriridde, nti sikulwa nga nafaabiinira bwereere ku lwammwe.

12Abooluganda, mubeere nga nze, kubanga nange nafuuka nga mmwe; temunkolanga kibi.

13Luli obukosefu mu mubiri bwe bwandeetera okusookera ku mmwe okubatuusaako Evangili.

14Newandibadde embeera gye nalimu yabasobeza, kyokka temwannyooma wadde okunneekanasa; naye mwannyaniriza nga malayika wa Katonda, nga Kristu Yezu yennyini.

15Okunsanyukira okwo kwonna kuzze wa? Sibalimbamu, olwo singa kyali kisoboka, n'amaaso gammwe mwandigatunguddemu ne mugampa.

16Kati okubabuulira amazima kye kinfudde omulabe wammwe?

17Bagezaako okubettanira, naye si lwa bulungi; baagala kubaawukanya ku ffe, mulyoke mwettanire bo.

18Okwettanira olw'ensonga ennungi kintu kirungi, ne bwe mba nga siri eyo nammwe.

19Baana bange, nzizeemu nnumwe, mbazaale buggya okutuusa Kristu ng'atondeddwa mu mmwe?

20Nandyagadde mbeere eyo nammwe kati nkyuse mu njogera gye njogeramu, kubanga kati mbabuusabusaamu.

21Mumbuulire, mmwe abaagala ate okufugibwa Etteeka: Etteeka temuliwuliranga?

22Kubanga kyawandiikibwa nti: “Yiburayimu yalina abaana babiri: omu yamuzaala mu mukazi muzaana, omulala mu wa ddembe.

23Naye gwe yazaala mu muzaana, yazaalibwa mu butonde, sso gwe yazaala mu w'eddembe, yazaalibwa ng'ayita mu kisuubizo.

24Ekyo nno kifaayo kya makulu: Abakazi abo ababiri ze ndagaano ebbiri: emu esibuka ku lusozi Sinayi, y'ezaala abaana b'obuddu; ye Agari.

25Kati nno Agari lwe lusozi Sinayi mu Arabiya; luli nga Yeruzaalemu ow'omu budde buno kubanga ali mu buddu n'abaana be.

26Naye Yeruzaalemu ali waggulu ye wa ddembe, ye nnyaffe.

27Anti kyawandiikibwa nti: “Sanyuka ggwe omugumba atazaalangako; yamira, leekaana, ggwe atazaalangako; kubanga abaana b'oyo eyayabulirwa bangi okusinga ab'oyo aliko bba.”

28Kati ffe, abooluganda, ffe baana ab'ekisuubizo nga Yizaake bwe yali.

29Nga luli, oli eyazaalibwa mu butonde kyokka bwe yayigganya eyazaalibwa mu Mwoyo, na kaakano bwe guli.

30Kazzi ebiwandiiko bigamba bitya? “Goba omuzaana ne mutabani we; kubanga omwana w'omuzaana taliba musika wamu na mwana wa ddembe.”

31Awo nno, abooluganda, tetuli baana ba mukazi muzaana, naye b'oli ow'eddembe.

← Chapter 3 Jump to: Chapter 5 →