1 Corinthians 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo omvele ’ba ti pele Yesu Kristoniriru e’yo Munguni lelenirisiri, adripi Sositene be,

2Kanisa Munguni ovupi Korintoari vu, ’ba ’bale alatararu Kristo Yesu ma alia, omvele ovuzu ’ba alatararu ’diyi, azini ’ba dria ru Opi amani Yesu Kristoni omvepi pari dri dria ’diyi vu indi, eri Opi yini azini amani:

3’Yeta anzutiri pi ma ovu emi vu asi anzuru be engazu Mungu Ata amani pi vu Opi Yesu Kristo be.

4Ma awa’difo fe Mungu mani dri emisi o’du dria, ’yeta anzutiri Munguni ovupi fezaru emi dri Yesu Kristo ma aliarisi,

5emini ovule afa e’iru eri ma aliarisi, e’yo ’yoza dria pisi nita dria be-

6ekile e’yo eti nzeza Kristonirini ecale okporu emi aliarile-

7’dini emi eceni afa feza azinisi aluni ku, emini e’data Opi amani Yesu Kristoni i e’dazuri teria;

8eri’i, eri nga emi ’ba okporu kpere asizaniria asu suza kokoru o’du Opi amani Yesu Kristoniri ma alia.

9Mungu emi omvepi fizu ti ecita Mvi ini Yesu Kristo Opi amaniri beri ma aliari ovu adaru.

10Te ma matu ’ba emi vu, ma adripi, ru Opi amani Yesu Kristonirisi, emi dria ma ’yo e’yo alu, azini emi ma ovu esele coza be emi eselia ku, te emi ma eci emi tualu kilili asisile alusi, egata alusi indi.

11’Ba Kiloeni ece e’yo emini ma dri, ma adripi, kini agata gaza ovu emi eselia.

12Ma ’yo ’dini, efini emi dria alu alu ’yo kini, Ma’i ma ’ba Pauloni, te Ma’i ma ’ba Apoloni, te Ma’i ma ’ba Kefani, te Ma’i ma ’ba Kristoni.

13Awa Kristo ma esele ndu ndu ya? Di Pauloni pati ruaa emisi ra ya? Emi bi baputizi Paulo ma rusi ra ya?

14Ma awa’difo fe Mungu dri mani baputizi fele ’ba aluni emi eseliari dri kurisi, pe Kirisipo pi dri Gayo be;

15’ba aluni kazu ’yozu emi a’i baputizi ma rusi ’dini ku beni.

16(Te ma fe baputizi ’ba Setefana vile joa ’diyi dri indi. Te ma nini ku kani ma fe baputizi ’ba azini dri ra yani.)

17A’disiku Kristo eri peni ma ti baputizi fezu ku te e’yo bari oluzu’i, ondua e’yo ’yozanisi ku, pati alaza Kristoniri kazu ecazu tokoru ku.

18A’disiku ’ba dri japi ra ’diyi dri e’yo oluza pati alazarurini oluzuri ovu ekile e’yo azazarule, te ama ’ba yi opapi ra ’diyi dri eri ovu okpo Munguniri’i.

19Te eri ovu sizaru, Ma nga ondua ’ba onduaru ’diyini dri ja, ma nga e’yo vaza ’ba e’yo vapi ’diyini ’ba tokoru

20’Ba onduaruri ngoa ya? ’Ba e’yo siza nipi rari ngoa ya? ’Ba agata gapi ewu ’dorisiri ngoa ya? Mungu ojani ondua nyaku ’doriniri azazaru ku ya?

21Te ondua Mungu vilerisi ’ba wudrikurua ’diyi nini Mungu ondua yinirisi ku, e’yo ’disi eri ovu onyiru Mungu ma milia ’ba e’yo a’ipi ’diyi opazu geri azaza e’yo oluzanirisi.

22A’disiku ’ba Yahudini yi eceta ndru, ’ba Girikini yi ondua nda,

23te ama amani Kristo dile pati ruaari ma e’yo olu, ’diri ’ba Yahudini dri ekile kumule ’ba pa sizu, te ’ba jururu ’diyi dri eri e’yo azazani,

24te ’ba ovupi omvezaru, ’ba Yahudini ma eselia ’ba Girikini be iri tro ’diyi dri, eri Kristo okpo Munguniri, azini ondua Munguniri’i.

25A’disiku e’yo azazaru Munguniri aga ondua ’baniri ra, azini okpoako Munguniri aga okpo ’baniri ra.

26Te emi ndre omveta emini, ma adripi; omveni ’ba onduaru ruasi ’diyi kakau ku, kani ’ba okpo be kakau ku, kani ’ba osile opianziru ’diyi kakau ku;

27te Mungu ope afa azazaru wudrikurua ’diyi ra drinza fezu ani ’ba onduaru’diyi dri; Mungu ope afa okpo kokoru wudrikurua ’diyi ra, drinza fezu afa okporu ’diyi dri,

28te Mungu ope afa toko toko wudrikurua ’diyi pi afa ngule onzi ’diyi be, ada ope afa ovupi yo ’diyi, afa ovupi indi ’diyi ojazu ani tokoru beni,

29dini ’ba rua ari be ’diyi ma aluni ma enya i Mungu ma milia ku.

30Te emi ovu erisi Kristo Yesu ma alia, eri ovu ndra ’bazaru ama dri ondua ibipi engapi Mungu vuriru, azini laza kililiruriru, ’baza alatararuriru, azini vini ’ba onzezuriru;

31dinile ekile erini ovule sizarurile kini, ’Ba i enyapiri ma enya i Opi ma e’yosini.

Jump to: Chapter 2 →