1 Corinthians 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te ma’i, ma adripi, mani emuria emi vu, ma ecani ndra e’yo eti nzeza Munguni oluzu emi tia e’yo ’yoza ndrizaru tu kani ondua agapi turisi, ’dini ku.

2A’disiku ma ede ndra e’yo ma asia kini ma ngani e’yo azini ni emi eselia ku pe Kristo bani yini di pati ruaari’i.

3Te ma ovu ndra emi eselia okpo kokoru, uri be, azini rua yaza be tu.

4E’yo mani ’yoleri pi e’yo oluza mani be, ovuni e’yo ’yoza ’ba obezu onduasiri be ku, te e’yo eceza Orindinisi azini okponisi,

5a’ita emini ma so pa ani ondua ’bani ma alia ku te okpo Munguni ma alia.

6Te ti, ama adri e’yo onduaru ’yo ba mbapi e’yosi ’bo ’diyi ma eselia, te ovuni ondua ewu ’doriniri’i ku, kani ’ba ’ba dri cepi ewu ’dosi yi ojapi tokoru ’diyiniri’i ku,

7te ama adri ondua Munguniri ’yo e’yo zizasi, ondua ovupi ndra zizaru Munguni pele okokele de nga ewu azini ’diyini ovuria yoria diza amani ma e’yosiri’i.

8’Ba ’ba dri cepi ewu ’dosi ’diyi ma azi aluni nini ondua ’diri ku; a’disiku ka ndra ni ra te’do dini ndra Opi dizaniri pati ruaa ku.

9Te erini ovule sizarurile, Afa mileni ndrele ku, azini bileni erile ku, azini fipi ’ba asia ku, afa nde Munguni edele ’ba eri lepi avasi ’diyi dri ’diyi,

10Mungu ece yi ama dri Orindisi ra. Orindini e’yo dria ma eti ndru, ka adri e’yo Munguni aliru ’diyi ti.

11Te ’ba eselia, e’yo ’bani nipi rari a’di’i ya; eri kiri orindi ’ba ndeni ovupi eri ma aliari’i ku ya? ’Dinile indi ’ba aluni vani e’yo Munguni ku, pe kini Orindi Munguniri’i.

12Te ama a’ini orindi nyakuniri ku, te Orindi engapi Mungu vuri’i, ama ma ni ani afa Munguni fele ama dri avasi ’diyi beni.

13Ama e’yo nde ’diyi ’yo e’yo ’yoza ondua ’banini imbaleri ’diyisi ku, te Orindini imbaleri ’diyisi, e’yo orindini o’bizu e’yo orindini be.

14Te ’ba ovupi kiri orindi ’bani be’iri a’ini Orindi Munguniri ma e’yo ku, yini ovule e’yo azazaru eri ma miliarisi; te econi erini yi nizaru ku, yini ovule vazaru orindisirisi.

15Te ’ba orindiniri adri e’yo dria va ra, te ’ba aluni vani agu nderi ma e’yo ku.

16Te a’di ni asisile Opini, erini ani eri imbazuni ya? Te ama ovu asisile Kristoni be.

← Chapter 1 Jump to: Chapter 3 →