1 Corinthians 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Te ma’i, ma adripi, ma econi e’yo ’yozaru emi tia ekile ’ba orindini ’diyi ma tiarile ku, te ekile ’ba rua ari be ’diyi ma tiarile, ekile odekua Kristo ma alia ’diyi ma tiarile.

2Ma ezo emi lesusi, te nyaka okporusi ku, emini ecole nga kurisi; kpere curu’do ti emi econi ku,

3te emi ovu nga ’ba roani ’diyiru ’dari. Emini nga ovuria ma’yala be agata gaza pie emi eseliaria, emi ovuni ’ba ruani ’diyiru ku ya, azini emi acini ’bani adrile acilerile ku ya?

4De ’ba aluni ’yoria kini, Ma’i ma ’ba Pauloni, aziniri kini, Ma ’ba Apoloni, emi ovuni ’bani ku ya?

5Ka’dini Apoloni a’di’i ya? Pauloni a’di’i ya? Yi ’ba ’ba aza kopi emini e’yo a’izu geri yinisi ’diyi, te ekile Opini fele yi alu alu dririle.

6Ma ri ori ra, Apolo oya yi drinia, te Mungu fe zozanini,

7Ka’dini ’ba ori ripiri toko, ’ba yi oyapiri vini toko, te lu Mungu zozani fepiri’i.

8Ka’dini ’ba ori ripiri pi ’ba yi oyapiri be yi tro tro, ’ba alu alu nga oya i vileri a’i azi ini vusi.

9Te ama ovu ’ba Munguni azi ngapi tualu ’diyi; emi ovu amvu Munguni, azini jo Munguni sileri’i.

10Afa feza ’yeta anzutiriru Munguni fele ma driri vusi, ekile onduou amborile ma ’ba jo etini ma’i, te ’ba azini eri jo si drinia. Te ’ba dria alu alu ma ovu mile be, eri si ngoni ngoni yari ndrezu.

11Te ’ba aluni econi jo eti andini ’bazaru ku, pe jo eti nde ovupi ’bazaru ’bori, ’di Yesu Kristo’i.

12Te ’ba azini ka mele si jo eti nde ma dria, kani dahabuni, kani oni silingi nyapi amboru ’diyi, kani patini, kani aseni, kani ’du pani ti-

13’ba dria alu alu ma azini nga oro ecezaro ra; O’du nderi nga eri eceni, erini ngale i ecele acisirisi; te acini nga ’ba dria alu alu ma azi o’bi, e’yoni ngoni yari ecezu.

14’Ba azini ma azi, erini sile driniari ka nga ace; ci, eri nga ani oya a’i ra.

15’Ba azini ma azi ka nga ve ra, afa erini yi nga avi ra, te eri ma ngulupini nga i pa, te kiri geri aci ma aliarisi ra.

16Emi nini emi ovu hekalu Munguni, azini Orindi Munguni ovu emi alia ku ya?

17’Ba azini ka hekalu Munguni dri ja ra, Munguni nga eri dri ja ra hekalu Mungunirini ovule alatararurisi, he kalu ’diri bani emi’i.

18’Ba azini ma ici i ku. ’Ba azini, ka ega i ovu ’ba onduaru emi eselia ewu ’dorisi, eri ma oja i azazaru ka; eri ma nga ovu ani onduaru beni.

19A’disiku ondua wudrikuru ’dirini ovu azazani Mungu ma milia. Erini: ovule sizarurisi kini, Eri ’ba ’ba onduaru ’diyi obipi lokiri yinisiri’i,

20azini dika kini, Opini asisile ’ba, onduaru ’diyini ni ra kini yi ovu toko.

21E’yo ’disi ’ba azini ma, enya i e’yo ’banisi ku. Te afa dria yii emini,

22kani Paulo’i, kani Apolo’i, kani Kefa’i, kani wudrikuruni, kani idrini, kani dratani, kani afa curu’do indi ’diyi, kani afa ngapi emupi nde ’diyi, yi dria emini;

23te emi ovu Kristoni; azini Kristo eri Munguni.

← Chapter 2 Jump to: Chapter 4 →