1 Corinthians 16

Lugbara (E’yo Siza Alatararu Munguniri BIBLIA)

← Chapter 15 Jump to:

1Curu’do, e’yo afa okuzu ’ba alatararu ’diyi ma aza kozuri ma e’yosi ekile mani e’yo azile kanisa Galatiaa ’diyi ma tiarile, emi ma ’ye ’dinile indi.

2Sabato ma o’du alu vusi dria, emi dria alu alu ma ’ba afa kalaa tani mbazu i vu ci, ekile ini drileba isulerile, ’dini emi ma nga afa azini oku mani ecaria ku beni.

3Te ma ka eca ra, ma nga ’ba emini opele waragasi ’diyi ma ti pe afa feza emini jizu Yerusalemua.

4Te eri ka ovu ’yeke mani muzu indi, yi nga mu ama be.

5Te ma nga emu emi vu, mani agaria Makedonia ma alesi ’boria, a’disiku ma nga aga Makedoniaarisi ra,

6te kani ma nga ovu emi be ra yani, kani tezu ewu egbeniri ma alia dria, emini ma jizu kuzu geri mani muzu ngoa yaniria beni.

7Te ma leni emi drezu curu’do mani agaria geria ku; a’disiku ma ’ba ma asi tezu emi be ewu fudri ci, Opi ka fe raria.

8Te ma nga ovu Efesoa kpere o’du Pentekositonisi,

9a’disiku zi jotile amboru ma dri ’bo, mani ani e’yo ’yezu tu, te ’ba ma geri ogapi ’diyi Yi kakau.

10Te Timoteo ka emu ra, emi mire onyiru eri ma ovu emi eselia uri kokoru, a’disiku eri azi Opini nga mani ngalerile.

11’Ba aluni ma ede eri ku. Te emi ma ji eri ku geria asi anzurusi, eri ma emu ani ma vu; mani eri ma mile gale adripi ’diyi berisi.

12Te adripi Apolo ma e’yo ’dini, ma ’ba matu eri vu tu eri ma mu emi vu adripi ’diyi be, te eri leni muzu curu’do aluni ku. Te eri nga mu etu ecopirini ecaria ra.

13Emi ovu mile be, emi so pa a’ita ma alia ci, emi ovu asi be agupiru, emi ovu okpo be.

14Emi ’ye e’yo dria leta avasirisi fo!

15Te ma adripi, emi ni ’ba Setefana vile akua ’diyi, yi ovu anyadri kapi oko Akaya ma aliari’i, azini yi ede yi ’ba alatararu ma aza kozu ’bo;

16ma matu ’ba emi vu, lemi ma eri ’ba ’dinile ’diyi pi ma e’yo, ’ba dria azi ngapi ama be tualu ’diyi pie, ’ba yi ecandipi azisi ’diyi be.

17Ma ovu ayikosi Setefana pini ecale, Foritunato pie, Akaiko pierisi, te afa emini ecepi ’yele kuri, yi ’ye ra,

18te yi ’ba ma orindi, azini emi orindi ma enga ekile o’dirule. Emi ma ni ani ’ba ’dinile ’diyi ra.

19Kanisa Asiaa ’diyi yi zi emi ci ci. Akula pi Pirisika be yi zi emi ci ci tu Opi ma alia, kanisa ovupi yi vile joari be.

20Adripi dria yi zi emi ci ci. Emi zi emi emi eselia o’deza ava alatararunisi.

21Zita mani sile ma ngulupi ma drisiri ’di, ma’i Paulo.

22’Ba ka; Opini le ku, eri ma ovu trizaru. Opi amani emu ra!

23’Yeta anzutiri Opi Yesu Kristoni ma ovu emi be.

24Leta mani avasiri ma ovu emi be dria Kristo Yesu ma alia. Amena.

← Chapter 15 Jump to: