Hebrews 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Mungu ndra e’yo ndu ndu ’yopi drio geri ndusi ndusi ama a’bipi ma tia geri nabi vurisiri,

2eri ’yo ama ria ewu vile asizu ’dori ma alia geri Mvi ini vurisi, erini ’bale afa dria nyazu eriniru, Munguni vini afa dria ’bazu erisiri’i.

3Eri ovu diza alatara Munguni e’dapiri, azini wura eri ma ada ecepiri indi, eri afa dria ta mba e’yo ’yoza erini okpo berisi, Eri ka e’yo onzi ede alaru ’bo, eri ri va Mungu ovupi Ambo Inzizaru angu uru ’buariari ma dri ndiria,

4aga malaika onyisi ra, ekile erini ru yi agapi onyisi rari isulerile.

5Te eri ’yo ndra malaika ngori ma tia ya, kini, Mima Mvi’i, andru ma ti mi ra? Azini dika, Ma nga ovu eri ma ataru, azini eri nga ovu mvi maniru?

6Azini dika, eri ka mva tile okori eji nyakua, eri ’yo kini, Malaika Munguni dria ma inzi eri.

7Te e’yo malaikanisi eri ’yo kini, Eri o’ba malaika erini ’diyi ovuzu olile, azini ati’ba erini ’diyi aci ma andredrilele.

8Te e’yo Mvinisi eri ’yo, Mungu la, oguna mini opiniri ovu ’dani ’dani, azini kali mini suri dri cezuri eri kali e’yo kililirurini.

9Mi le e’yo kililiruri ra, mi ngu e’yo onzi onzi; e’yo ’dirisi Mungu, Mungu miniri,osu odu ayikoniri mi dria agyi mini ’diyi agazu.

10Azini, Opi la, okokele mi ’ba nyaku eti mi, ’bu ovu azi mi drini ’yeleniri’i;

11yi nga dri ja ra, te mi ovu ’dani ’dani; yi dria nga de afa suzale,

12mi nga yi tra bongo ’bezale, yi nga yi oja ndu afa suzale. Te mi ovu ojakokoru ’dani, eli mini ngani asi ku.

13Te eri ’yo ndra malaika ngori ma tia ya, kini, Mi ri ma dri ndiria, de nga ma ’bani ari’ba mini ovuzu afa mi pa ’bazu driniariru ku.

14Yi ovuni dria orindi ti opele azi ’yezu ’ba ’yepi pata isupi awitaru ’diyi ma aza kopi ’diyiru ku ya?

Jump to: Chapter 2 →