Hebrews 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1E’yo ’dirisi, adripi alatararu omveta ’buari a’ipi tualu ’diyi, lemi ma ega Yesu ’ba ti epele azini atalau edeta edepi agapi ra a’ita amani e’daleriniri’i.

2Eri ovu asi be ’ba eri ’bapi atalaururi vu, kile Musani ovule asi adaru be jo Munguni ma alia driarile.

3Te la leri onyiru diza isuzu aga Musa ra, ekile ’ba jo sipirini inzita isule tu jo nde agazurile.

4A’disiku jo dria alu alu ovu afa ’bani sileniri’i, te ’ba afa dria ’bapiri eri Mungu’i.

5Te Musa ovu ndra asi adaru be jo Munguni ma alia dria ekile ati’bole, e’yo yini ngale ’yole etu vilerisi ’diyi ’ma e’yo eti nzezu;

6te Kristoni, ekile mvile, ovu asi adaru be jo Munguni ma drilia. Jo nderi ama’i, ama ka asi okporu amaniri pi bi ci, ayiko e’yo tezaniri be, kpere ewu asizuria.

7E’yo ’dirisi, ekile Orindi Alatararuni ’yolerile, Andru emi ka o’duko erini eri,

8emi ma ’ba asi emini mbazaru ku ekile o’du awatanisirile, ekile o’du o’bita roko driarinisirile,

9emi a’bipini ndra ma o’bizu yini ma oberiarile, yi ndre ndra ’yeta mani eli kali suo

10E’yo ’dirisi asi mani ve aokosi anzi nde ’diyi ma e’yosi, ma ’yo ra, Yi ovu abazaru asi yini ma alia o’du dria; yi nini nga geri mani ku.

11Ekile mani oyo sole adra manisirile, Yi ma fi ava liza mani ma alia aluni ku.

12Emi te emi agei, ma adripi, ’ba azini alu emi eseliari kazu ovuzu asi onzi a’ita kokoruri be ku, Mungu idriruri kuzu.

13Te emi ma imba emi asi emi eselia o’du dria, de nga o’du omvele andruri eri indi, ’ba azini alu emi eseliari ma asi kazu ovuzu mbazaru lokiri e’yo onzinisi ku.

14A’disiku ama eca ovuzu ’ba Kristo isupi ’diyiru ’bo, ama ka a’ita amani okokeleri bi ci kpere ewu asizuria,

15yini nga ’yoria ’dani, Andru emi ka o’duko erini eri emi ma ’ba asi emini mbazaru ku ekile o’du awatanisirile.

16Te ’ba e’yo eripi ’diyi ma eselia, ’ba awapi eri be ’diyi a’di piyi ya? Yi ’ba dria efupi ndra Misiria Musasi ’diyi ku ya?

17Azini asi erini ve aokosi eli kali su a’di piyi ma e’yosi ya? Ovuni ’ba e’yo ezapi, yi ma; avuni o’dezu roko dria ’diyi ku ya?

18Te eri so oyo yi ma fi ava liza erini ma alia aluni ku a’di piyi dri ya? Ovuni kiri ’ba e’yo eripi ku ’diyi ku ya?

19’Dini ama ndre econi yini fizaru ku, a’ita yinini ovule yorisi.

← Chapter 2 Jump to: Chapter 4 →