Hebrews 12

Lugbara (E’yo Siza Alatararu Munguniri BIBLIA)

← Chapter 11 Jump to: Chapter 13 →

1E’yo ’dirisi ama’i indi, ’ba e’yo eti nzepi ongulumuru karakarau iritile ’diyini ama acele kururisi, ama ma tru afa nzizaru dria, e’yo onzi ama bipi mbeleri be, ama ma nzu ongusi asi tezasi abala ovupi ’bazaru ama driliari ma alia,

2ama ma ’ba mile amani Yesu vu, eri ambo a’ita amani e’dopi azini ’bapi ovuzu fudri ciri’i, ayiko ovupi ’bazaru eri ma driliari ma e’yosi eri ’du candi ’bani eri dizu pati ruaari asi tezasi ra, eri asini drinzani ma e’yosi ku, azini eri: ri va oguna Munguniri ma dri ndiriai ’bo.

3Te emi ma ega Yesunio’data ’ba e’yo onzi ’yepi ’diyini eri o’dazu onzi ’dinileri ’duzu asi tezasiri ma e’yo, ’emi kazu ovuzu andezaru kani ava kokoru asi emiru ma alia ku.

4Emini a’di ’diria e’yo onzi be, emi ’dini omba kpere cazu acini raria nga ku.

5Te e’yo oluza ’yopi emi tia ekile anzi tiarileri avi emi dri, kini, Mva mani, mi ’ba cota Opini mi imbazuri e’yo werele ku, eri ka ega mi dria, mi ma ovu ava kokoru asi mini ma alia ku.

6A’disiku Opini adri ’ba erini lele avasiri co eri imbazu, eri adri anzi dria alu alu erini a’ile ’diyi oco ra.

7Emi a’i cota asi tezasi imbata isuzu. Mungu ’ye emi vu ekile anzi vurile; te mva atini cole eri imbazu kuri ngori ya?

8Te emi ka ovu cota emi imbazu ’ba driani isuleri be ku, ka’dini de di emi alianziru, emi ovuni karianzini ku.

9Te di, ama ovu ama atapi e’yo ruanisi ’diyi be ama cozu imbataru, ama adri yi inzi ra. Ka’dini agapiri ama ngani Ata orindini inzi ovuzu ani idri be ku ya?

10Adaru ’ba nde imba ndra ama o’du were ekile erini ovule onyiru yi ma miliarile, te eri’i, eri ama imba ama ’yezu onyiru, ama ma ovu lani ’ba alatara erini a’ipi ’diyiru.

11Cota ama imbazuri dria ovuni layikoru ama milia ewu curu’dorisi ku, te candiru; te vilerisi eri nga efi e’yo kililiruni asi anzuru beri ka ’ba ’cota ndeni imbaleri ’diyi dri.

12E’yo ’dirisi emi enga emi dri lakazaru ’diyi ra, emi fe okpo kumuti okpo kokoru ’diyi dri,

13azini emi ede geri kililiru pa emini dri, ’dini fala ovupi acozaruri ma nze i i pariasi ku, te ma ovu ani atizaru beni.

14Emi ndru ovuzu asi anzu ru be ’ba dria vu; azini ovuzu asi alatararu be, te ’ba aluni ovupi ’dinile kuri econi Opi ndrezaru ku.

15Emi ma ndre onyiru ’ba aluni kazu ecezu ’yeta anzutiri Mungunisi ku; ola asi onzini kazu idizu candi fezu ku, ’ba kakau yi kazu yi ezazu e’yo nderisi ku;

16’ba mile aci beri, kani ’ba e’yo Munguni ’bapi tokori kazu ovuzu emi eselia ku, ekile Esau ’ba e’yo erini ovuzu mva okoriruri fepi ozipi nyaka nyale vu alurisirile,

17Te emi ni ra vilerisi eri ka le asi ndriza nde a’i awitaru ndo, yi ga eri si, eri isuni pari asi ojazani ku, eri ka tro eri ndru asi driasi mindresi ti.

18’Dini emi ecani oni ’bani ecole elole drisi, vepi acisiri pi vu ku, iriti iniciciruri pie, angu biza pie, oliriko pie,

19guka awu pie, o’duko e’yo ’yopiri pie; ’ba o’duko nde eripi ’diyi ’ba ndra matu ma ’yo e’yo azini ’dinile ’diyi yi tia ku.

20Te yi econi e’yo ovupi azizaru, kini, Ka anyapani ti, ka oni elo, ma o’be eri onisi ra, ’diniri a’izaru ku.

21Te afa e’dapi yi ma miliarini ovule uriuriru turisi, Musa kini, Ma ovu urisi tu, ma ruani ya ya.

22Te emi eca oni Zioni pi vu ’bo, aku Mungu idrirurini, Yerusalemu ’buari pie, malaika karakarau lakokoru ’diyi pie,

23okuza kanisa amuruaanzi yi ma ru sile ’bua ’diyiniri pie, Mungu ’ba dria ma e’yo lipiri pie, orindi ’ba kililiru ovupi ’bazaru ovuzu fudri ci ’diyini pie,

24Yesu ’ba ’ba ecipi Mungu be aziza o’dirusiri pie, ari oyaza e’yo onyiru tu e’yo Habili ma arini ’yoleri agapi rari ’yopiri pie dria.

25Emi ndre onyiru emi ma ga ’ba e’yo ’yopiri ma ti ku. Te ’ba ndra ’ba yi ma bilendu lipi nyakuari ma ti gapi si ’diyi ka ndra eco apazaru ku, ama ka ama oja vile ’ba e’yo ’yopi ’buari ma ti gazu ama nga apa ngoni ngoni ya?

26O’duko eriniri oya ndra nyaku etu ’darisi; te curu’do eri azi kini, Ace nga pale alu dika ma nga ni kiri nyakuni oya a’dule ku, te ’bu indi.

27E’yo ’yole kini, Ace nga pale alu dika, ’diri ece kini eri nga afa oyale ra ’diyi nze ekile afa ovupi ’bazaru ’diyile, ’dini afa oyale ku ’diyi ma ace ani’dani beni.

28E’yo ’dirisi amani opi nyaza ecopi oyapi kuri isulerisi ama ma ovu ’yeta anzutiri be, amani ecozu ani azi ngazu Mungu dri erini lelerile, inzita pisi ruta be;

29te Mungu amaniri ovu aci afa vepiri’i.

← Chapter 11 Jump to: Chapter 13 →