Joshua 11

Lugbara (E’yo Siza Alatararu Munguniri BIBLIA)

← Chapter 10 Jump to: Chapter 12 →

1Eri nga di eca ’dini, Yabini opi Hazoriari ka e’yo ’diri eri ’bo, eri pe ’ba ti Yobabu opi Madoniari pi vu, opi Simironiari pie, opi Akisafuari pie,

2opi andralerua ’diyi pie, oni ruaa ’diyi pie, Araba Cineroti ma kala uruleruria ’diyi pie, a’bu alia ’diyi pie, oni Dori ma ruaa etuni ’derialeruria ’diyi pie,

3’ba Kananini ovupi etuni efurialeru azini etuni ’derialeru ’diyi pie, ’ba Amorini pie, ’ba Hitini pie, ’ba Perizini pie, ’ba Yebusini ovupi oni ruaa ’diyi pie, ’ba Hivini Herimoni ma etia angu Mizipania ’diyi pie dria.

4’Dini yi fu dria, yi’i, asikari ongulumuru yini pie, ’ba karakarau ekile cinya ovupi miri tia lakokorurile, akanya ombani pie gari ombani pie o’biru tu.

5Opi ’diyi ka yi oku dria tualu ’bo, yi emu hema asozu dria tualu yi Meromuni ma tia, omba ’bazu ’ba Israelini be.

6Te Yehova ’yo Yosua ma tia, Uri ma bi mi yisi ku, te drusi etu ’donile ma nga yi fe dria ofuzaru Israeli ma drilia; mi nga akanya yini ma isu oli ra, azini mi nga gari yini ombani ’diyi eve acisi ra.

7’Dini Yosua emu ra, ’ba ombani ’diyi be dria, a’di ’dizu yi be yi Meromuni ma tia, yi e’de yi ma dria ’daa rru.

8Te Yehova ofe yi ’ba Israelini ma dria, yi ofu yi ani, dro yi kpere Zidoni amboruria, kpere Misirefoti-maimua, kpere a’bu Mizipeni etuni efurialeruria indi; ofu yi ’dani de nga kuni ’ba alu acepini ku.

9Yosua ’ye yi vu ekile Yehovani azile eri ma tiarile; oli akanya yini ma isu, eve gari yini ombani ’diyi acisi ra.

10Etu ’dasi Yosua atri dri vile emu Hazorini pazu, fu opi angu ndeari seisi; Hazori ndeni ndra okorisi ovule suru ’diyi ma drilia drianirisi.

11’Dini yi ofu ’ba idri be alenia ’diyi dria sei ma sisi, ja yi ma dri teketeke; kuni ’ba aluni ava ’yapi ’diyi idriru ku; eri eve vini Hazorini acisi ra.

12Azini akui amboru dria opi nde ’diyini, opi amboru alenia ’diyi pie, Yosua bi yi ra, ofu yi sei ma sisi, ja yi ma dri teke teke, ekile Musa ati’bo Yehovanini ndra azilerile.

13Te aku amboru acepi pa sopi abi pari yini ma dria ’diyi, ’ba Israelini eveni yi ku, pe lu Hazori’i a’dule, Yosuani eveleniri.

14Afa dria aku amboru nde ’diyini ’diyi anyapa pie, anzi Israelini o’du di yiniru; te ’ba dria alu alu yi ofu yi sei ma sisi kpere yini yi ma dri jaria ’boria, yi kuni ’ba alu ava ’yapini ku.

15Ekile Yehovani azile Musa ati’bo erini ma tiarile, ’dinile indi Musa azi Yosua ma tia, Yosua ’ye ’dinile indi; eri kuni afa aluni Yehovani azile Musa ma tiari ’yekokoru ku.

16’Dini Yosua opa di angu ’diyi dria, angu oni ruaari pi, angu dria Uruleruri pi, angu dria Goseniari pi, angu senderuri pi, Araba pi, angu oniru Israelini pi, a ’bu erini pie dria;

17opa angu dria engazu oni Halaki dri fepi tuzu Seiriariasi cazu kpere Baali-gadi ovupi a’bu Lebanoninia oni Herimoni ma etiaria dria. Obi opi yini dria, o’di yi, ofu yi ra.

18Yosua pi ’di a’di opi ’dayi dria be o’du kakau.

19Aku amboru aluni ndra asi anzuru edepi anzi Israelini beri yo, pe lu ’ba Hivini ovupi Gibeonia ’diyi; yi obi yi dria a’disi ra.

20A’disiku Yehova fe yi dri asi mbazanini, ’dini yi ma emu omba ’bazu ’ba Israelini be beni, ’dini i ma ja yi dri teketeke ani, azini yi ma isu asi ndriza aluni ku beni, te i ma la yi ma dri, ekile Yehovani azile Musa tiarile.

21Ewu ’dasi Yosua nga di emu ’ba Anakini dri jazu engazu oni ruaarisi, azini engazu Hebironi piarisi, Debiri pie, Anabu pie, angu oni dria Yudaniri dria pie, angu oni dria Israeliniri dria pie; Yosua ja yi ma dri teketeke aku amboru yini pie,

22’Ba Anakini aluni aceni ndra anzi Israelini ma angua ku; yi ma azi ace lu ndra Gaza pi ma alia, Gatu pie, Asidodi be.

23’Dini Yosua pa angu pi ekile e’yo dria ndra Yehovani ’yole Musa ma tiarile; te Yosua fe eri Israeli dri awitaru esele yini vusi suru yini vusi indio Angu nderi li di ava omba ’bazasi ra.

← Chapter 10 Jump to: Chapter 12 →