Joshua 24

Lugbara (E’yo Siza Alatararu Munguniri BIBLIA)

← Chapter 23 Jump to:

1Yosua nga di suru ’ba Israelini oku dria Sekemua ’daa, omve ’ba deza ’ba Israelini, ’ba ’wara pie, ’ba e’yo lipi ’diyi pie, ’ba yi dri cepi ’diyi be, yi nga mu yi ecezu Mungu drilia.

2Yosua ’yo di ’ba dria ma tia kini, Yehova Mungu Israeliniri e’yo ’dini kini, Andra drio emi a’bipi ovu Yi Ara ma tia ’aa’dasi, Tera Iburahimu ma ati Nahori be; yi nga ndra azi adrou toko ’diyi dri.

3Ma ’du ndra emi a’bi Iburahimuni. Yi Ara nderi tia ’aa’dasirisi, eri dri cezu acizu angu Kananini ma alesi dria, ori erini ezuzu kakau. Ma fe ndra Isakani eri dri indi;

4Isaka dri ma nga Yakobo pi fe Esau be. Esau dri ma nga oni Seirini fe ’duzu eriniru, te Yakobo pi anzipi be yi si Misiria.

5Ma nga di Musa pi ma ti pe Aroni be, ma nga Misiri inza ’yeta mani ’yele eselenia ’diyi vusi; te vilerisi ma nga ani emi ofu ndo.

6Ma ofu emi a’bipi Misiriasi ra, emi eca ani miri tia; te ’ba Misiria ’diyi nga emi a’bipi ma vuti dro ongusi gari ombani pisi ’ba nzupi akanya dria ’diyi be, kpere Miri Ekarua.

7Yini-owuria o’duko urusi Yehova vu, eri nga angu biza ’ba emi eselia ’ba Misiria ’diyi be ci, nga vini miri eji yi ma dria yi a’buzu; emi mile ndre e’yo mani ’yele ndra Misiria ’diyi ra; emi ovu vini angu roko driaria o’du kakau.

8Ma nga vini emi ji angu ’ba Amorini ovupi Yoridani tia ’aa’dasi ’diyiniria; yi nga a’di ’di emi be, te ma fe ndra yi emi dria, emi nga ani angu yini ’du ra, ma ja vini yi dri emi miliasi ra.

9Balaki Zipori mvi opi Moabuari nga di enga omba ’bazu ’ba Israelini be; nga vini ojiou ma ti pe Balamu Beori mvini omvezu emi trizu,

10te ma ga ndra Balamuni eriko si; e’yo ’disi eri fe asi ndriza emi dri; ma opa emi ’dini eri ma driarisi ra.

11Emi nga Yoridanini zo cazu Yerikoa; ’dale ’ba Yerikoa ’diyi pi nga omba ’ba emi be, ’ba Amorini pie, ’ba Perizini pie, ’ba Kananini pie, ’ba Hitini pie, ’ba Girigasini pie, ’ba Hivini pie, ’ba Yebusini pie dria; te ma nga yi fe dria emi dria.

12Ma nga dirili ma ti pe emi drilia, ’ba odrozu emi driliasi ra, ’ba nde yi opi iri ’ba Amorini ’diyi; te ovuni sei eminisi ku, kani osu eminisi ku indi.

13Ma fe ndra emi dri angu emi inzazu ani kuri, aku ambo ambo emini sile emi’i ku ’diyi, emini ovuzu alenia ’di; emi vini amvu zabibuni azini mizeituni emini sale ku ’diyi ma efi nya ’di.

14E’yo ’disi curu’do emi ma ru di Yehovani, azi ngazu eri dri emi asi lokiri kokorusi, azini e ’yo adasi; emi o’be di adrou toko toko emi a’bipini ndra azi ngale yi dri Yi Ara ma tia ’aa’dasi, azini Misiria ’diyi amve fo, emi ma nga azi Yehovani’i.

15Te emi ka ega kini azi ngazu Yehova driri onzi, ’yeke, emi pe di o’du andru ’dorisi kani eminga azi nga a’di dri ya? kani adrou emi a’bipini ndra azi ngazu yi dri Yi Ara ma tia ’aa’dasi ’diyi, kani adrou ’ba Amorini emini ovuzu angu yinia ’diyini; te ma’iruni ’ba ma joa’diyi be, ama nga azi nga Yehova dri.

16’Ba yi nga di e’yo omvi, ’yo ra, Mungu ma oga ama amani Yehova kuzu si fo, amani azi ngazu adrou toko ’diyi dri;

17a’disiku Yehova Mungu amaniri eri’i onze ndra ama ama a’bipi be engazu angu Misiriniasi, engazu jo amani ndra ovuzu ati’baruriarisi, ’ye ndra vini eceta amboru ama milia ’dayini, mba ama ta geri dria amani muzu ani ’diyisi, azini suru dria amani agazu yi ma eselia ’diyi dri indi;

18te Yehova odro suru dria engazu ama driliarisi ra, ’ba Amorini ovupi ndra angu ’di ma alia ’diyi; e’yo ’disi ama nga azi nga Yehova dri, erini ovule Mungu; amanirisi.

19Yosua nga vini ’yo ’ba ’diyi ma tia, Emi econi azi nga Yehova dri ku; erini ovule Mungu alatararurisi; eri Mungu a’yaru; eri ngani te ezata emini wu e’yo onzi emini ’diyi be ku.

20Emini ngaria Yehovani kuria azi ngazu adrou ani’bo vile ’diyi dri, eri nga i oja afa onzi ’yezu emi vu, emi dri jazu onyi erini ’yele emi vuri ma vutia.

21Te ’ba ’diyi nga ’yo Yosua tia kini, ’Dini yo; ama nga azi nga Yehova dri ra.

22Yosua nga di ’yo ’ba ’diyi ma tia, Emi nze e’yo eti emi ngulupi ma dria ’bo, kini emi pe emini Yehovani, azi ngazu eri dri’i. Yi nga di a’i ra kini, Ama ’ba e’yo eti nzepi ’diyi ada.

23Eri nga ’yo ra, Ka’dini emi ma onze adrou ani’boru ovupi emi vile ’diyi ra fa, azini emi oja emi asi Yehova Mungu Israeliniri vu.

24Ka’dini ’ba nde ’diyi nga di ’yo Yosua ma tia kini, Ama nga azi nga Yehova Mungu amaniri dri, azini ama nga bile co o’duko erini vu indi,

25’Dini Yosua azi aziza ’ba nde pie o’du ’dasi, si azita yi dri, azi e’yoni indi Sekemua ’daa.

26Yosua nga di e’yo ’diyi si buku azita Mungunirini ma alia; ’du ani amboru indi, i’di eri ’daa kumara pati pari alatararu Yehovaniri ageiari ma etia.

27Te Yosua ’yo ’ba dria tia kini, Emi lu, oni ’diri nga ovu e’yo eti nzepiri ama ruaa; a’disiku eri eri e’yo Yehovani ’yole ama tia ’diyi ra; e’yo ’disi eri di nga ovu e’yo eti nzezu emi ruaa, emi kazu Mungu emini gazu ku.

28’Dinile Yosua nga di geri fe ’ba ’diyi dri, ’ba dria alu aluni emvizu awuruso ini vu.

29Eri nga eca afa ’diyi ma vutia ’dini, Yosua Nuni mvi ati’bo Yehovaniri nga dra ra, erini ovuria eli be turu alu drini mudri.

30Te yi nga eri sa angu erini erini ’dule awurusoru ’Timinati-seraaria, eri ovu angu oni ruaa Efiraimua oni Gaasi ma kala andraleruri vualeru.

31Te ’ba Israelini nga azi Yehova dri o’du Yosuani ma alia dria, azini o’du ’ba ’wara ovupi Yosua ma vutia, azi dria Yehovani erini ngale Israeli dri ’diyi nipi ra ’diyinia dria.

32Te fala Yusufuni anzi Israelini ’diyini ejile engazu Misiria ’diyi yi sa Sekemua, angu liza nde Yakoboni jele ndra anzi Hamori Sekemu ati vile ’diyi dri silingi turu alusiri’i; angu nde nga ani i oja awuruso anzi Yusufu vile ’diyiniru.

33Eleazari Aroni mvi dra ra; yi sa eri oni mvi erini Finehasi vile, ndra ovupi fezaru eri dri angu oni ruaa Efiraimuaria.

← Chapter 23 Jump to:

Recommended Reading

Commentary Joshua Commentaries → Devotional Joshua Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →