Joshua 22

Lugbara (E’yo Siza Alatararu Munguniri BIBLIA)

← Chapter 21 Jump to: Chapter 23 →

1Yosua omve ’ba Rubenini piyi ’ba Gadini pie, suru ali Manaseni be,

2nga ’yo yi tia, Emi ’ye e’yo Musa ati’bo Yehovanini azile emi tiari dria ’bo, emi eri vini o’duko mani e’yo dria mani azile emi tiari ’yezu indi;

3emi kuni emi adripi yi o’du kakau ’diyisi ku, ecazu kpere andru o’du ’doria, te emi ’ye azita Yehova Mungu eminini azile kini emi ma ’yeri ’bo.

4Te curu’do Yehova Mungu emini fe di emi adripi dri ava liza ’bo, erini ’yole yi tiarile; ka’dinile emi ma oja emi, emi ma mu hema eminia kpere angu emini ’dule eminiruria, Musa ati’bo Yehovanini fele emi dri Yoridani tia ’aa’dasiri.

5Emi ma mba lu emi ngulupi ma ta asi driasi, aziza azini azita Musa ati’bo Yehovanini azile emi tiari ’yezuni, Yehova Mungu emini lezu avasi, acizu geri erinia dria, azita erini ma ta mbazu, emini emi ekpazu eri be, ovuzu ati’ba erini azi ngazu eri dri asi emini driasi azini orindi emiru driasi indi.

6’Dini Yosua nga di asi ndriza fe yi dri, nga vini geri fe yi dri mvizu; yi nga di geri bi muzu hema yinia.

7Isu de Musa fe ndra suru Manase ma ali azini dri awuruso Basania ’bo; te ali aziniri dri Yosua fe awuruso yiniri adripi yini ma eselia Yoridani ma tia ’aa’dosi etuni ’derialeru. Te Yosua ka geri fe yi dri mvizu hema yinia, eri fe asi ndriza yi dri indi,

8eri ’yo yi tia kini, Emi ma mvi hema eminia lonyi be kakau, anyapa piyi kakau tu, dahabu pie, mele pie, mola pie, aya pie, bongo pie karakarau tu; emi ma awa lonyi emini opale juru emini driri emi adripi dri indi.

9Vutinia ’ba Rubenini piyi ’ba Gadini pie, suru ali Manaseni be, yi nga mvi ibizu Israeli anziyi ma eselia Silo ovupi angu Kananini ma aliaria ’dalerisi, nga geri muzu Gileadiari bi, angu yini ’dule yiniru yi ma adri aleniari, aziza Yehovani azile Musa tiarisirile.

10Yini caria angu Yoridani ma kalati angu Kananiaria, Rubeni anziyi piyi Gadi anziyi pie, suru ali Manaseni ’diyi be, yi nga pari edeta edezu e’dapi endrepi reri si Yoridani tia.

11Anzi Israelini eri ani kini, Emi lu, Reubeni anziyi piyi Gadi anziyi pie, suru ali Manaseni ’diyi be si pari edeta edezuri angu Kananini ma drilia, angu Yoridani ma kalati woko Israeli anziyi vileria ’bo.

12’Dini Israeli anziyi ka e’yo ’diri eri ra, ’ba ongulumuru Israeli anziyini nga yi oku dria tualu Siloa, ma otu yi muzo a’di ’dizu yi be.

13Te anzi Israelini ’diyi nga ojiou ti pe Rubeni anziyi pi vu, Gadi anziyi pie, suru ali Manaseni be, angu Gileadinia; ’ba ti pele ’diyi Finehasi Eleazari ’ba edeta edepiri ma mvi pi,

14’ba ’wara mudri mupi eri be ’diyi pie, yi ’ba ambo suru yi ma atapini driliari, alu alu suru alu alu Israelini vusi; ’ba ’wara ’diyi alu alu ovu yi ma atapi ma suru dri cepiriru Israeli alifu alifu eselia.

15Yi nga ca Rubeni anziyi pi vu Gadi anziyi pie, suru ali Manaseni be angu Gileadinia, nga ’yo yi tia kini,

16’Ba ongulumuru Yehovaniri dria ’yo ’dini: Ezata ’diri emini ezale Mungu Israeliniri vuri, efini ngoni ya? emi mvi andru vile Yehova ma vuti bizu ku, pari edetani emini sizu’i ya? ovuni kini andru emi mbu Yehova ma ruaa amve ’dini ku ya?

17E’yo onzi amani ’yele e’yo Peorinisi ’dari funi dri ama dri ku ya? Ama’i kpere o’du ’diri andru ama ’bani nga ama alaru e’yo onzi ndesi ku, azo muani ka tro ovu ’ba ongulumuru Yehovani ’diyi ma ruaa e’yonisi ti.

18Emi’i andru vini emi le asi vile Yehova ma vuti bizu kuru ’dini ya? Eri ngani eca ’dini ku ya, emi mbu emini Yehova ma ruaa amve andru ’di, te drusi eri nga ovu aokosi ’ba ongulumuru Israelini i ’diyi vu dria.

19Emi ka angu emini ’duleri ndre ovuzu alaru ku, ’yeke, emi ezo emuzu angu ovupi awita Yehovanirurialeru, hema Yehovanini ovuzuria, emi ma ’du emini angu ama eselia beni; te emi ma mbu Yehova ma ruaa amve ’dini ku, ama’i alu vini emi ma mbu ama ruaa amve indi ’dini ku, emini vini pari edetani sizu emi dri pari Yehova Mungu amani edezuri ma paria.

20Akani Zera mvi eza ndra afa trile tririsi, adra efuni ndra ’ba ongulumu Israelini dria ma dria ku ya? Agu nderi jani dri a’dulesi ku erini ezale ’disi.

21Rubeni anziyi pi Gadi anziyi pie, azini suru ali Manaseniri be, nga di e’yo omvi ’ba ’wara ’ba Israelini alifu alifu ma drilia ’diyi tia,

22Yehova Mungu, Mungu dria ma driliari’i! Yehova Mungu, Mungu dria ma driliari’i! Eri ni ra, azini Israelini nga ni indi! Ka amani mbuzu amve Yehova ma ruaa’i, kani amani Yehova ezazu’i, ’dinile ma pa ama andru ku,

23ama ka pari edeta edezuri si ama dri amani ama ojazu vile Yehova ma vuti bikokoru; kani amani ti pi vezu drinia, edeta anyafurasi ’diyi pi, kani ama ma ede edeta asi anzuruni ’diyi, ’dini Yehova ma ngulupi ma ofe di e’yo ndeni.

24Te ama sini ’diri lu e’yo ’diri ma urisi ku ya? amani ’yoria kini, O’du ecapirisi anzi emini kani yi nga ’yo anzi amani ma tia kini, E’yo emini Yehova Mungu Israeliniri beri ngoni ya?

25A’disiku Yehova co ama esele emi be yi ara Yoridaninisi, emi Rubeni anziyi, Gadi anziyi ’diyi la; esele emini Yehova ma alia aluani yo. ’Dinile anzi emini yi te nga fe anzi amani ma ku Yehovani ruzu ja.

26Ka’dinile ama ’yo ra, Ama ma ede ama asi pari edetani sizu ama dri, te ma ovu afa edetaru evezu ku, kani edeta edezu ’dini ku,

27te lu ma ovu afa e’yo eti nzezuriru ama dri emi be, a’bianzi amani ngapi ovupi vile ama vutia ’diyi dri a’bianzi emini be, ama ma inzi Yehovani edeta amani vele eri ma milia ’diyi pisi, edeta amani edele ’diyi pie, edeta asi anzuruni ’diyi be; anzi emini ma ’yo anzi amani ma tia o’du vilerisi, Esele emini Yehova vuri aluani yo, ’dini ku.

28E’yo ’dirisi ama ’yo ani, Ka nga ovu ewu vilerisi, yi ka nga ’yo ama tia, kani a’bianzi amani ma tia e’yo ekile ’dini ’diyile, ama nga ’yo yi tia, Emi ma lu pari edetani Yehovaniri ma wura vu, ama a’bipini edeleri, te afa edetaru evezu ku, kani edeta edezu ’dini ku, te eri afa e’yo eti nzezuriru amani emi be.

29Mungu ma oga ama mbuzu amve Yehova ma ruaasi fo! amani ama ojazu andru vile Yehova ma vuti bikokoru; Mungu ma oga ama pari edetani sizu ama dri afa edetaru piyi evezu edeta anyafurasiri pie, edeta azini ’diyi pie, pari edetani ovupi Yehova Mungu amani ma hema driliari ma aziru ’dinirisi!

30Finehasi ’ba edeta edepiri, ’ba ’wara ongulumuruni ’diyi be, ovupi ’ba Israelini alifu alifu ’diyi ma drileru ovupi eri be ’diyi, yini e’yo Rubeni anziyi pini ’yole Gadi anziyi be, azini Manase anziyi beri eriria, e’yo nde nga ayiko fe yi dri tu.

31Ani Finehasi ’ba edeta edepi Eleazari mvi nga di ’yo Rubeni anziyi pi tia Gadi anziyi pie, Manase anziyi pie kini, Ama ni di bani andru ’di, kini Yehova eri ama eselia indi, emini ezata ’diri ezale Yehova vu geri ’dirisi kurisi; geri ’dirisi emi opa Israeli anziyi, Yehova ma dri ma ri yi ma dria ku beni.

32Vilerisi Finehasi Eleazari mvi ’ba edeta edepiri pi ’ba ’wara ’diyi be tualu, mvi angu Gileadiasi Rubeni anziyi pi vusi Gadi anziyi pie, Manase anziyi be, yi ca angu Kanania Israeli anziyi vu, e’yo ’diyi omvizu yi dri.

33E’yo ’di nga ayiko fe Israeli anziyi dri, ka’dinile Israeli anziyi nga Mungu inzi, yi ’yoni vini e’yo azini kini yi ma tu uru omba ’bazu yi be, angu nde Rubeni anziyi pini ovuzu Gadi anziyi beri ezazu, ’dini ku.

34Rubeni anziyi pi Gadi anziyi be yi nga pari edetani nderi ma ru ’da Edi’i; yini ’yole kini, Eri e’yo eti nzezuriru ama eselia kini, Yehova eri Mungu’i-risi.

← Chapter 21 Jump to: Chapter 23 →

Recommended Reading

Commentary Joshua Commentaries → Devotional Joshua Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →