Joshua 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te Yosua Nuni mvi pe ’ba iri ma ti engazu Sitimuasi muzu angu ma orile gazu ndindiru, kini, Emi mu angu nderi pi ma orile gazu, Yeriko be. Te yi mu ra, yi eca oku awuouru alu vile joa, runi Rahabu’i, te yi la ’daa,

2Te ’ba olu e’yoni opi amboru Yerikoari dri kini, Mi lu, ’ba azini yi emu te ’dia inisi engazu anzi sraelini ma eselia, angu ma orile gazu.

3Ka’dini opi amboru Yerikoari pe ’ba ti Rahabu vu kini, Mi ofu ’ba emupi mi vu fipi mi vile joa ’diyi; yini ecale angu ’dori dria ma orile gazurisi.

4Te oku nde ji ’ba iri ’diyi, ozi yi ra; eri ’yo ra, E, ’ba nde ’diyi emu ma vu ’do ra ’bo, te ma nini te yi enga ngoari ku;

5eri nga eca etu ’bani kalitile opizurisi ’dini, angu ka bi ’bo, ’ba nde yi fu ra; ’ba nde ’diyi mu ngoari, ma nini ku; emi dro yi ma vuti mbele mbele, a’disiku emi nga ca yi isu ra.

6Te de isu oku nde ji te yi jo dria uru, ozi yi ’bo baka palale erini ajale jo driari ma eselia.

7Ka’dini ’ba nde ’diyi dro yi geri muzu Yoridaniarisi kpere kiji yi zozuria; ’ba yi dropi ’diyi ka fu ’bo, coti yi opi kalitile ci.

8De nga yi lani va ku, oku nderi tu yi vu uru jo dria ’dale,

9azini eri ’yo ’ba nde ’diyi ma tia, Ma ni ra Yehova fe emi dri angu ’diri ’bo, azini emi ma uri bi ama dria ’bo, te ’ba dria angu ma alia ’diyi aka emi drilia aka aka.

10A’disiku ama eri e’yo ndra Yehovani yi Miri Ekarurini fezu nzuzu emi drilia, emini efuria Misiriarisiri ra, azini e’yo emini ’yele opi amboru iri Amorini Yoridania ’aa’dasi ’diyi vuri, yi Sihoni pi Ogi be, emini dri jale tekereke ’diyi.

11Te coti ama ka eri ’dini ’bo, asi amani ca ra, azini ’ba aluni ma orindi aceni okpo be yi ma alia ku emi ma urisi; a’disiku Yehova Mungu eminiri, erini ovule Mungu uru ’bua azini va nyakua indirisi.

12E’yo ’dirisi curu’do ma zi emi tia, mani ’yele emi vu asi ndrizasirisi, emi so oyo ma vu ru Yehovanisi ci, kini emi nga ’ye ori’ba ma atini vu asi ndrizasi indi, azini emi fe ma dri eceta adari indi,

13emi nga ma atini pa idriru, ma andri pie, ma adripi pie, ma amvipi pie, afa dria yini ovuzu yi beri pie, emi nga ama idri opa dra dri indi.

14Te ’ba nde ’diyi ’yo oku nderi ma tia, Idri amani idri emini ma paria, mi ka ayua amani ’diri ma e’yo ece kuria; te eri nga ovu ’dini Yehova ka nga ama dri angu ’diri fe ’boria, ama nga mi ’ye asi ndrizasi, e’yo ada be indi.

15Eri nga di yi osi va bakasi geri derisa ma aliarisi; a’disiku jo erini ovu sizaru abi kaliru aku ageiari ma dria, azini eri adri abi ma dria.

16Eri ’yo yi ma tia, Emi apa oni dria, ’ba emi vuti dropi ’diyi kazu muzu emi isuzu ku; emi ma zi emi ’daa o’du na kpere ’ba emi vuti dropi ’diyini emvizu ’boria; vutinia emi di nga mu geri eminia ndo.

17Te ’ba nde nga di ’yo oku nderi ma tia, E’yo ngani ama nde oyo mini fele amani sole ’disi ku.

18Mi lu, amani efiria angu ’diria, mi nga baka ekaru ’diri ombe derisa ndra mini ama osizu aleniasiria ci; azini mi nga mi ati pi oku mi vile joa mi andri pie, mi adripi pie, ’ba mi ati vile joa ’diyi pie dria.

19Te eri nga ovu ’dini, ’ba fupi mi vile jotilesi ra, mupi gbokoari, ari erini nga ovu eri ma ngulupi ma dria, te e’yoni ngani ovu ama dria ku; te ’ba ngapi ovupi mi be joa ’daniri ma arini nga ovu ama dria, ’ba ka dri ’ba eri ma ruaa raria.

20Te mi ka ayua amani ’di ma e’yo ece ra, e’yo ngani ama nde oyo mini fele ama ma sori ma e’yosi ku.

21Oku nde ’yo ra, Ekile emini ’yole ’borile, eri ma ovu di ’dinile. Azini eri pe yi ma ti ra, yi mu di ra; eri nga di baka ekaru nderi ombe derisaa ci.

22Te yi mu ra, yi ca oni vu, yi ovu ’dale o’du na kpere ’ba ndra yi vuti dropi ’diyini mvizu ’boria; ’ba yi ma vuti dropi ’diyi ndru yi geri vusi dria ti, te yi isuni yi ku.

23Etu ndesi ’ba iri ’diyi atri dri ra, yi esi engazu oni driarisi, yi zo ra, ca Yosua Nuni mvi vu; yi olu tinia e’yo dria yi ’yepi yi ma ruaa ’diyi ra.

24Yi ’yo Yosua ma tia, Ndi, Yehova fe angu ’dari dria ama dri ’bo; azini ’ba dria adripi angu ndea ’diyi aka ama drilia aka aka.

← Chapter 1 Jump to: Chapter 3 →