Joshua 23

Lugbara (E’yo Siza Alatararu Munguniri BIBLIA)

← Chapter 22 Jump to: Chapter 24 →

1Eri nga eca ’dini o’du kakau ma vutia, Yehova ka Israeli anziyi dri ava liza fe ’bo, juru yini dria yi acepi ’diyi ma omba asuzu, de Yosua ovu di mbazauru eli be kakau,

2’dini Yosua nga ’ba Israelini omve dria, ’ba deza piyi ’ba ’wara pie, ’ba e’yo lipi ’diyi pie, ’ba yi dri cepi ’diyi be, nga ’yo yi tia kini, Curu’do ma mbazauni, eli mani kakau;

3emi ndre e’yo dria Yehova Mungu eminini ’yele ’ba jururu dria ’diyi vu emi ma e’yosiri dria ra; a’disiku Yehova Mungu emini ’di ndra a’di emi drini.

4Emi lu, ma awa emini ’ba jururu acepi ’diyi ma angu odrisisi ’bo, ’ba jururu mani ndra dri jale ’bo ’diyi ma angu be, suru emini ma bi ani angu nde awuruso yiniru, engazu yi ara Yoridaniniasi cazu kpere miri amboru etuni ’derialeruri vu.

5Yehova Mung emini ma ngulupi nga yi omvu ofuzu emi drilia yi drozu emi miliarisi ra; emi ma nga angu yini ’du eminiru ani, Yehova Mungu eminirini ’yole emi tiarile.

6E’yo ’disi emi ma ovu di ani asi agupirusi tu, emi ma mba e’yo ovupi sizaru buku azita Musaniri ma aliari ma ta dria yi ’yezu indi, emi kazu emi ojazu dri ejia kani dri ndia yi kuzu ku,

7emi kazu fizu ’ba jururu acepi emi be ’diyi ma eselia ku, emi kazu adrou yini ma ru ajizu ku, emi so oyo adrou nde ’diyi ma rusi ku indi, kani azi ngazu yi dri ku, kani avuzu va yi ma drilia ku indi;

8kiri emi ma ekpa emi Yehova Mungu eminiri be, emini ’yele kpere o’du andru ’dorisirile.

9Yehova odro suru ambo ambo okpo be ’diyi emi driliasi ’bo; te emiruni, ’ba aluani soni pa emi drilia ecazu kpere andru ku.

10’Ba emini aluri nga ’ba yini alifu alu dro ra, Yehova Mungu eminirini a’di ’dile yi be eminirisi, ekile erini ’yole emi tiarile.

11E’yo ’disi emi te emi agei asi driasi tu, emi ma le Yehova Mungu eminiri avasi.

12Te emi ka nga mvi emi ecizu ’ba jururu ’diyi ma joloko be, ada ’ba acepi emi eselia ’diyi, emini oku jezu emi eselia yi be, emini ani fizu yi vu lazini yini efizu emi vu,

13ka’dini emi ma ni di ani kini Yehova Mungu emini ngani ri juru ’diyi odro emi miliarisi ’dini ku; te yi lu nga ovu emba azini esese emi bizuriru, emi rua cozuriru, azini oci emi mile osozuriru, kpere emini dri jaria teketeke angu onyi be Yehova Mungu eminirini fele emi dri ’diriasi.

14Emi ma lu, curu’do ma’i ma mani mu geri ’ba dria ovupi nyakua ’diyini muzuria; te emi ni, asi emini driasi azini orindi emini driasi indi kini e’yo onyiru dria Yehova Mungu eminini ’yole emi e’yosi ’diyi ma eselia aluni eceni ku; ’ye yi emi dri dria dria ’bo, yi ma alua avini ku.

15Te eri nga eca ’dini, e’yo onyiru dria Yehova Mungu eminirini ’yole emi tiari yini ecale emi ruaa trotrorile, ’dinile indi Yehovani nga e’yo onzi dria eji emi ruaa trotro, de nga eri jani emi dri angu onyi be Yehova Mungu eminirini ndra fele emi dri ’diriarisi ku.

16E’yo ’diyi nga yi ’ye ra, emi ka aziza Yehova Mungu eminirini ndra azile emi driri eza ra, emini ngaria muria azi ngazu adrou toko ’diyi dri, avuzu va yi drilia indi; etu ’dasi adra Yehovani nga ti ko ve emi ruaa, emi nga dri ja mbele mbele angu onyi be erini ndra fele emi dri ’diriasi.

← Chapter 22 Jump to: Chapter 24 →

Recommended Reading

Commentary Joshua Commentaries → Devotional Joshua Devotional Guide → Get This Bible Lugbara (E’yo Siza Alatararu Munguniri BIBLIA) Study Bible →