Proverbs 1

Lugbara (E’yo Siza Alatararu Munguniri BIBLIA)

Jump to: Chapter 2 →

1E’yo o’beza Sulemani Daudi mvi, opi Israelinirini ’diyi:

2’Ba ma ni ani ondua imbata be, ’ba ma ama ani geri e’yo vazaniri,

3imbata a’izu geri ’bani azi ’yezu onduasi, e’yo onyirusi, e’yo lizasi, azini e’yo kililirusi;

4’ba ondua kokoru ’diyi ma ovu ani ondua be, nita pi fezu karilau dri, e’yo vaza be-

5’ba ondua beri ma eri, ma ere nita -erini ani, ’ba e’yo vaza beri ma ca kpere ovuzu egata be onyiru,

6eri ma va ani e’yo o’beza ma efi, e’yo ecetaruri be, eri ma va e’yo ’ba onduaru ’diyini, e’yo zizaru yini be.

7Ruta ’bani Yehovani ruzuri ovu nita ma e’dozani; te ’ba ondua kokoru ’diyi yi ngu ondua pi imbata be onzi. Imbata onduaniri

8Mva mani, mi eri e’yo rili atini rili imbazuri, mi ga mi andri ma imbata si ku;

9imbata nde nga ovu oku ndrizaru mi driariru, azini nyoro mi ombeleariru.

10Ma mvi la, ’ba azi onzi ’yepi ’diyi ka mi bile ewi ra, mi ma a’i ku.

11Yi ka ’yo ra, Mi emu ama be, ama mu te ’ba ari adazu, ama mu ’ba e’yo kokoru ’diyi mbazu toko;

12ama oki yi mile be ekile Pari ’ba drazanirini ’ba okilerile, ama oki yi pi ekile ’ba avu sale ’bilea ’diyile;

13ama nga afa dria onyiru isu ra, ama nga fe; amani ’diyi ga afa amani opale ’diyisi tre;

14mi eci ti ama be fo, jurua ama driani nga ovu alu-

15ma mvi la, rili ma aci yi be geria ku, rili oga pa mini leti yini

16yi ma pani nzule e’yo onzi vurisi, yi ’ye mbele mbele ari ’bani adazu.

17A’disiku ’ba ese ’ba ti aria ma miliasi;

18te ’ba ’diyi yi ari yi ma ngulupini te, yi te yi ma ngulupi ma idri mbazu.

19’Ba dria alu alu li ’bapi afasi ’diyi ma geri ovu ’dinile; li nderi nga e’i ma idri fu ra.

20Ondua otre okposi geria; eri enga o’duko erini uru gboko walaru ’diyi ma alia;

21eri otre pari ’bani yi okuzu turia; pari ’bani efizu kalitilearia indi, eri e’yo erini olu aku amboru ma alia, ’yozu:

22Emi ’ba nita kokoru ’diyi la, emi nga nitaako le avasi 0’du ngopi ya? ’Ba ’ba edepi ’diyi nga edematara le avasi o’du ngopi ya? ’Ba ondua kokoru ’diyi indi nga nita ngu onzi o’du ngopi ya?

23Emi ma oja emi, mani egale emi driarisi; emi ndre, ma nga e’yo ma asiari ma eti nze emi dri teketeke; ma nga fe emi ma ni e’yo mani o’yole ’diyi.

24A’disiku ma omve ndra emi ra ’bo, te emi ga si, ma eju ma dri, te ’ba asipini aluni yo,

25te emi ’ba e’yo mani amaleri dria toko, emi leni ma ma ega emi dria aluni ku,

26e’yo ’disi ma mani nga emi ogu ogu o’du emini ovuzu ocoko berisi, ma nga emi ede ede uri ka nga emi bi raria,

27uri emini ka nga eca ekile akulukuni ecalerile, ocoko emini ekile olirikoni ecalerile, o’du imvoni ngazu ecazu emi ruaa asi otiza berisi.

28O’du ’dasi yi nga ma omve, te ma ngani a’i ku; o’du ’dasi yi nga ma nda asi driasi, te yi ngani ma isu ku.

29A’disiku yi ngu ndra nita onzi, yi peni ndra Yehovani ruzu ku,

30yi leni e’yo mani amaleri aluni ku, yi ’ba egata mani egazu yi driari dria aparakaru;

31e’yo ’disi yi nga geri yini acizuri ma efi nyani, yi nga ga e’yo yini otule ’diyisi tre.

32A’disiku asiza vile ’ba ondua kokoru ’diyiniri yi ofu ra, azini asimaruku ’ba azazaru ’diyiniri eri yi ma dri ja ra;

33te ’ba e’yo mani eripiri nga adri uri kokoru, eri nga adri e’yo ’yaasi, ngani e’yo onzi ru ku.

Jump to: Chapter 2 →