Proverbs 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Ma mvi la, mi dri ma avi imbata manisi ku, te asi mini ma mba azita mani ’diyi ma ta ci;

2a’disiku azita nde ’diyi nga fe o’du minini yi erezu kakau, eli mini adrizuidriru ’diyi be, nga vini drileba e’yo ’yaasiri fe mi dri indi.

3Mi fe yiki pi ma ku mi e’yo ada be ku; mi ombe yi mi ombelea, mi si yi karatasi mi asiari ma dria.

4Geri ’disi mi nga ondua isu, e’yo minini nga Mungu pi va ’ba be va indi.

5Mi a’i Yehovani mi asi driasi, mi ati mi ondua minisi ku;

6mi ma ni eri geri mini vusi dria, erini ngazu ani leti mini ’bazu kililiru.

7Mi ma ovu onduaru mi ma ngulupi ma milia ku; mi ma ru Yehovani, mi ma ona mi e’yo onzisi.

8E’yo ’diri nga rua mini ’ba alaru, mi fala ’bazu onyiru oso be indi.

9Mi inzi Yehovani afa mini ’diyisi dria’i, azini afa mini kapi oko ’diyisi dria;

10geri ’disi ero mini nga ga afa driasi tre, obi mini ’diyi vini nga ga patiefi su o’dirurisi tre, driniri razu va.

11Mva mani, mi ngu cota Yehovani mi cozu imbatasiri onzi ku, mi ma ande vini egata erini; egazu mi driarisi ku indi.

12A’disiku Yehovani adri ega ’ba erini ile ’diyi ma dria, ekile atani egale mva ini lele turi ma driarile.

13’Ba ondua isupiri pi ma ayiko indi, ’ba e’yo vaza isupiri be,

14a’disiku oleza eriniri aga oleza dahabuniri ra, orodri erini aga mele onyiruri ra.

15Ondua nde ma e’yo aga nyoro ekaru ’diyiniri ra, ’ba econi afa dria ’bani ecole lele avasi ’diyi o’bizaru ondua be ku.

16Idri izururi ci eri ma dri ndiria eri ma dri ejiria lonyi pi indi inzita be.

17Geri erini ovu geri ayiko fepi ’diyi, leti erini ’diyi dria asi anzuruni.

18Ondua eri pati idriniri ’ba eri bipi ’diyi dri; ’ba dria eri ma ta mbapi ’dani ’diyi ovu ayikosi.

19Onduasi Yehova ’ba ndra nyaku eti ra; e’yo vazasi eri ’ba ndra ’bu ovuzu ’dani;

20nita erinirisi eri co ndra yi aliru ma esele, ’bu iriti beri fe andrali oti va.

21Ma mvi la, mi mba ondua kililiruri ma ta e’yo amaza be; mi fe afa ’diyi ma avi mi, miliasi ku,

22’dinile yi nga mi orindi ’ba idriru ani, yi nga onyi fe mi ombeleni ndrizu.

23Mi nga di aci geri mini ma alia uri kokoru, kumu ngani mi pa si ku,

24Mi ka la va, mi ngani ovu urisi ku; ada, mi nga la va, azini o’du koza mini nga alu alu.

25Mi ma ru uri ecapi mbelekociciri ku, kani dri jata ’ba azi onzi ’yepi ’diyiniri ku indi eri ka nga ecea ra;

26a’disiku Yehovani nga ovu asi teza miniruni, i eri nga mi pa ma ta mba, ’ba kazu eri bizu ku.

27Mi ku onyi ’yeko ’ba yi sipi onyi nde a’izu ra ’diyi vu ku,mi dri ka ovu okpo be onyi nde ’yezu raria,

28Mi ’yo mi agyi ma tia ku kini, Mi mu, mi emvi dika, ma nga di fe dru-de isu afa nde ovu ci mi vu ogogo.

29Mi otu e’yo onzi mi agyi o’api mi ageia asi ’bapi mi driari ma ruaa ku.

30Mi ga agata ’ba azini be toko ku eri ka e’yo onzi ’ye mi vu oko ku.

31Mi ovu ma’yalasi ’ba e’yo ’yepi eganasiri ma e’yosi ku, mi pe geri erini ’diyi ma azi aluni ku;

32a’disiku ’ba ’yepi ambosi akari eri afa Yehovani ngule onziri’i, te eri ti eci ’ba asi kililiru ’diyi be.

33Trita Yehovani ovu ’ba onzi ’diyi ma aku ma dria, te eri asi ndriza fe pari ’ba onyiru ’diyini adrizu aleniari ma dria.

34Adaru eri ’ba edematararu ’diyi ede ede, te eri asi ndriza fe ’ba e’yere ’diyi dri.

35’Ba onduaru ’diyi nga inzita isu awitaru, te idrita ’ba azazaru ’diyini eri drinzani,

← Chapter 2 Jump to: Chapter 4 →