Proverbs 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Ma mvi la, mi ka nga e’yo mani ’yole ’diyi a’i ra, mi ka nga azita mani ’diyi ma ta mba mi asia,

2mi bile cozu ondua vu ani, mi asi fezu e’yo vaza vu ani;

3ada, mi ka nga wu e’yo amaza lezu, mi ka nga mi o’duko enga e’yo vaza omvezu,

4mi ka eri nda dahabule, mi ka eri ndru ekile lonyi zile zi’diyile;

5mi nga di ruta Yehovani ruzuri ma e’yo va ra, mi nga nita ’bani Mungu nizuri isu indi.

6A’disiku Yehovani ondua feni; nita pi efu eri ma tilia e’yo vaza be;

7eri mba ondua alaruri ma ta ’ba kililiru ’diyi dri; eri gombereni ’ba acipi kililiru ’diyi dri,

8geri e’yo lizaniri ma agei teu ani, ’ba alatararu ini ’diyi ma geri ma ta mbazu indi.

9Mi nga di onyi pi ma e’yo va; e’yo liza be, azini e’yo kililiru, adaru geri onyiru dria;

10a’disiku onduani nga fi mi asia, nitani nga ovu aluzaru orindi mini dri,

11e’yo amazani nga mi agei teni; e’yo vazani nga mi ta mba ra;

12yi nga mi ari geri e’yo onziniri ma alia, azini ’ba e’yo lokiriru ’yopi ’diyi ma dria indi;

13’ba nde ’diyi ku geri e’yo kililirurini yi ma aci ani geri inini ma alia beni;

14’ba nde ’diyi ovu ayikosi e’yo onzi ’yezu, e’yo onzi ’yeza ma lokiri fe yi, dri ayiko tu;

15yi ’ba acipi geri goligoliruri ma alia ’yepi lokirisi leti yinia ’diyi.

16Yi nga vini mi ari oku saaruri dri, oku mile aci be ’ba inzipi lokirisiri dri;

17oku nde ku agupi ini eri jepi zanasiri, eri dri avi Mungu mi ma azizasi ra;

18a’disiku jo erini si va dra vu, geri erini kpere ’ba draza ’diyi vu;

19’ba mupi eri vu ’diyi ma eselia ’ba emvini aluni ku, yi cani leti idrini ’diyia dika ku.

20Mi ma aci ani ’ba onyiru ’diyi ma geria, mi ma mba ’ba kililiru ’diyi ma leti ma ta.

21A’disiku ’ba kililiru ’diyi nga adri angua, ’ba lokiri kokoru ’diyi nga awu alenia ’danini;

22te yi nga ’ba onzi ’diyi ma dri ja anguasi, yi nga ’ba ’yepi lokirisi ’diyi onze anguasi ra.

← Chapter 1 Jump to: Chapter 3 →